صندوق الإسلام 01 : الإسلام والمافيا

اهلا بيكم في الحلقة الأولى من سلسلة حلقات صندوق الاسلام،

صندوق الاسلام بيفكرنا بصندوق الدنيا اللي كنا واحنا اطفال بنلعب عنده

ونشوف في ثقب معين عالم تاني ودنيا تانية غير العالم اللي احنا نعرفها في القرى والمدن اللي اتربينا فيها

ودي كانت فكرتي اني كل يوم احط ايدي في صندوق الاسلام واطلع منه قضية جديدة مشكلة جديدة ناس كتير متتعاملش معاها ،

احنا كلنا واحنا صغيرين لحد حتى لما كبرنا دايما نقول انا مسلم وافتخر من غير ما نعرف نفتخر بايه ومسلم ليه

فضل الاسلام حاططنا في الصندوق ده فمبنشوفش غيره

لكن لما بنطلع برا الصندوق بنبتدي نشوف افكار تانية وزاوية تانية بتعرفنا حاجات في الاسلام مكانش تخطر على بالنا

علشان كنا مزنوقين داخل الصندوق،

صندوق الاسلام مش هجوم على حد

ومش هجوم على عقيدة

وانما محاولة للتفكير الحر اللي هي في الدول العربية والاسلامية ممنوعة ومحرمة،

دلوقت في موجة .. موضة جديدة ماشية في الدول العربية خاصة في مصر

اسمها اصلاح الاسلام وتجديد الخطاب الديني

وهتلاقي ناس زي الاستاذ اسلام البحيري هتلاقي ناس زي دكتور عدنان ابراهيم الدكتور محمد شحرور وغيرهم

بيقولوا ان الاسلام في عصر النبي كان جميل جدا ومفهوش مشاكل وكان متسامح ودين رحمة

وبعدين جم الامويين العباسيين وابتدوا ان هما يحرفوا الاسلام او يفسروه باسلوب غلط

وفضل الاسلام ماشي كدا بتاع 1400 سنة

مشوه ومش مفهوم ويساء فهمه ويساء استخدامه

ويفضل بعد 1400 سنة ينتظر الاسلام مجئ الناس اللي فاهمينه صح بقى،

اللي هما بيفسروه صح وبيقولوا الاسلام دين رحمة ودين سلام،

انا ليا نظرية مختلفة تماما في هذا الموضوع

وهو ان الاسلام يعني بدأ كدين متوحش

هو طبيعته كدا في وسط الجزيرة العربية

مكة والمدينه كانت مدن لا تعد بأي مدنية أو اي حضارة أو اي ثقافة

وقبائل تجمعت وغزت الجزيرة العربية

وبعد كدا ابتدت تغزو العالم كله

ولما الأمويين والعباسيين جم هما اللي ابتدوا يهذبوا هذا الوحش

ويخلوه يتمشى مع الحضارة

هما اللي اخترعوا سيرة للنبي علشان يحطوه في اطار حضاري معين

هما اللي اخترعوا علوم الفقه والحديث علشان يحطوه في أطر معينة

تابعتم كلكم اكيد فترة الحوار او المناظرة بين الدكتور اسلام البحيري والشيخ اسامة الأزهري والشيخ حبيب على الجفري

و انا بصراحة يعني شفت في هذه المناظرة

والحوارات اللي حصلت بعدها مآساة الاسلام اللي احنا عايشنها لحد النهارده

ان احنا برضو حتى المصلحين نفسهم حتى المصلحين نفسهم مش عارفين يخرجوا خارج الصندوق

حتى المصلحين لازم انه هو يفصل بين حاجتين

النبي والقرآن حاجة والتاريخ الاسلامي حاجة تانية خالص

وده شئ مش مفهوم ومش مقبول بالمرة

كل شئ حصل في تاريخ الاسلام هو مترتب على ما حدث في القرن الأول

كل شئ حدث في تاريخ الاسلام بيستمد شرعيته من اللي حصل في الجزيرة العربية ايام النبي ما كان عايش،

يعني انا وانا بقرأ تاريخ الاسلام شفت النبي لما كان بيدعو دعوة سلمية

ادعو الي سبيل ربك بالحكمة والموعظة الحسنة

محدش آمن بالدعوة إلا قلة قليلة جدا

ميقدرش يعمل بيهم دولة،

الدولة الاسلامية بقا اللي هما بيسموها دي نشأت على أي اساس؟

نشأت على اساس انه اتعمل جيش ،

والجيش ده ابتدى يعمل غزوات ويهاجم قوافل

وابتدى يعمل اقتصاد اسلامي قائم على فكرة الغزو ،

يعني انا لما دورت النبي والصحابة كانوا بيشتغلوا ايه في المدينة بعد الهجرو لقيتهم مبيشتغلوش حاجة ،

لا بيتاجروا ولا بيزرعوا ولا بيعملوا حاجة

بيعملوا الغزوات

وبعد الغزوة بيجي يوزع الغنائم فابتدت الاعداد تكتر مع هذا المنطق

قبل كدا لما كان بيدعوا بس بالحكمة وبالموعظة الحسنة مكانش في اعداد كبيرة آمنت بالاسلام ،

الاعداد ابتدت تيجي امتى؟

لما ابتدى يبقى فيه فايدة سياسية واقتصادية ،

انك لما تنضم الى هذه المجموعة هيبقى ليك سهم من اسهم الغنايم

انا وانا بقرا تاريخ الاسلام او بقرا آية من القرأن

بتقولك الله ليه الخمس منها وهو للرسول

برضو حاجة يعني غريبة جدا من منطق عقائدي ومنطق ديني ،

ازاي يكون اله ليه خمس غنائم الحروب وجاية منين

في تشبيه انا هعمله ما بين نشأة الاسلام والمافيا ،

نشأة الاسلام ونشأة المافيا

التشبيه ده بيضايق ناس كتير

وطبعا مفهوم ان محدش عايز من المؤمنين انه يسمع تشبيه للاسلام بالمافيا

ولكن لمعرفة او لفهم الازمة التي يعيشها المسلمين

ان الاسلام يعيش مصيبة مع نفسه ومصيبة يسببها للعالم بسبب نشأة الاسلام التي لم يتحرر منها المسلمون حتى الآن،

انا بسمي ده العيب الخلقي للاسلام

اللي هو هذه النشأة ، النجاح السريع السياسي والاقتصادي والتوسع او الفتوحات والغزوات

هي اللي اصبحت ما سبب للاسلام في الماضي النجاح والتقدك هو اللي بيسبب للاسلام النهارده انه مش عارف يخرج من الصندوق

ازاي؟ المافيا ، حركة المافيا نشأت ازاي ؟

لو قارننا بدقة هنلاقي ان نشأة حركة المافيا شبيهة جدا بنشأة الاسلام

ازاي؟ المافيا دي نشأت ازاي ؟

نشأت في جزيرة صقلية في جنوبها،

اشمعنا جزيرى صقلية بالذات ؟

جزيرة صقلية كانت محتلة من العرب

مفيش ثقافة أثرت على صقلية اكتر من الثقافة العربية

هما اللي اثروا في الزراعة مفهوم التجارة

هما اللي دخلوا فكرة الجزية والأتاوات لجنوب ايطاليا ،

لو تفتكروا كان في .. القذافي مرة كان قال حاجة اعتبرناها نكتة ،

لكن اللي قاله ده كان فيه شئ من الحقيقة

قال ان كلمة مافيا اصلها عربي ومعناها معفية

الكلام ده صحيح

يعني متخصصين في تاريخ المافيا بيقولوا ان اصل الكلمة عربي ولو كانوا هما مش متأكدين

هل هيا جاية من كلمة معفية

يعني معافى اللي بيدفع الضرايب والجزية

اللي هما بيسموها بقى المافيا مبيسموهاش جزية بيسموها …

بيبقى تحت الحماية

فهو الابتزاو واخذ الاتاوات

زي فيلم الحرافيش وعاشور الناجي يدفع الأتاوة واللي يدفع يعدي ،

نفس الفكرة بالظبط من ايام تأسيس دولة المدينة فكرة انك تغزو تاخد الغنايم توزع الغنايم

ويبقا هو ده اقتصادك قائم على هذا الشئ

انك تحمي مجموعة من البشر مقابل انك تاخذ منهم اتاوة علشان تحميهم،

الاسلام تأسس سياسيا كدا

سواء احنا بقا شئنا او ابينا هي دي الحقيقة

اللي ولا اسلام البحيري ولا اللي بيهاجموا اسلام البحيري بيقدروا ينكروها

فانت تيجي بعد كل دا وتقول

لأ ده حاجة مش .. ملهاش علاقة بالاسلام وهما شوهوا الاسلام فيما بعد،

المافيا … كان فيه قبيلة عربية في صقلية اسمها المعافر المعافر

وده تقريبا الاسم جاي من هذا الاتجاه

المعافر دول هما اللي جابوا نظام الأتاوات الى صقلية

يروحوا جايين يغيروا على منطقة معينة يفرضوا سيطرتهم عليها ويفرضوا أتاوات على الناس ويبتدوا يجمعوا هذه الأتاوات

القبيلة دي حتى بعد العرب ما انطردوا سياسيا من صقلية فضل ليها جذور في صقلية

لحد ما حركة المافيا الجديدة بقى في القرن ال19

اتأسست على نفس الأساس

كانوا موظفين اللي هما بيجمعوا الايجار من صغار الفلاحين للبشوات للاقطاعيين

الموظفين اللي احنا كنا بنسميهم في الافلام الابيض واسود كنا بنسميهم ايه ؟ الخولي،

ف الخولي او الخوالي دول كان معاهم سلاح فكانوا يروحوا يجمعوا الايجار والضرايب من صغار الفلاحين

فجات فترة .. فجات فترة صقلية استقلت وكان فيه فوضى في الجزيرة

كان في فوضى في جزيرة صقلية

فابتدوا ان الموظفين دول اللي معاهم سلاح يقوموا بدور الدولة ،

ان هما يروحوا يعني يفرضوا الأمن

زي اللجان الشعبية كدا في وقت الثورات ،

ومادام معاهم السلاح مادام معاهم السلطة

والسلطة غايبة ابتدأ هو يفرض قانون الغاب بتاعه،

تديني فلوس احميك

اللي ميدينيش فلوس ماحميهوش ،

يغير على ناس وياخد منهم حاجاتهم،

ده بداية حركة المافيا اللي شبيهة جدا ببداية الاسلام ،

ايه اللي حصل في بداية الاسلام ؟

ايه اللي حصل في بداية الاسلام ؟

لما النبي 12 سنة في مكة بيدعو و…

بيقول كلام جميل وآيات قرآنية

اجمل آيات القرآن هتلاقيها من الفترة المكية

هتلاقيه بيدعو للتسامح

هتلاقيه بيقول للناس لكم دينكم ولي ديني

ادعو الي سبيل ربك بالحكمة والموعظة الحسنة

وجادلهم بالتي هي احسن

هتلاقيه لا يدعو الي عنف او الي حرب

كلمة قتال او حرب مظهرتش غير في المدينة

يعني كل المبادئ الجميلة الناس مستجابتش ليها في مكة ،

لما انتقل وراح المدينة تغير كل شئ،

ايه النقلة اللي حصلت ؟

ده الشئ اللي ناس كتير بتحكي التاريخ بسرعة كدا كأنها بتاكل اكلة سريعة كدا وعايزة تبلعها بسرعة ،

لا اهضم قبل ما تبلع . لا اهضم قبل ما تبلع،

ايه اللي حصل اللي خلاهم يدخلون في دين الله افواجا

ايه اللي حصل بالظبط ايه النقلة اللي حصلت ،

النقلة ان كان في تحالف عسكري من نوع غريب جدا ،

احنا كلنا المعروف لنا في التاريخ

هو ان الرسول تحالف مع الأوس والخزرج

واصبح بينهم وأسس دولة في المدينة ،

قبل الأوس والخزرج ما يكون ليهم دور كان فيه فرقة تانية النبي تحالف معاها

والكلام ده موجود في الكتب،

الفرقة دي اسمها ايه بقا ؟

فرقتين، فرقة اسمها الصعاليك ،

الصعاليك دول كانوا مجموعة من المجرمين وقطاعين الطرق

اللي عاليشين في الجبل جبل تهامة او تهامة ،

المطاريد دول او الصعاليك دول كانول مطرودين من القبائل ،

شباب عادي من شباب القبائل اللي يرتكب جريمة

اللي سرق شئ اللي عمل فعل فاضح

يعني احرج القبيلة بتاعته او اهان شرفها فبيطردوه

فبيتجمعوا المطاريد دول في الجبل ويبتدوا يكونوا مجموعات مسلحة

ويروحوا يغيروا على القوافل ، يغيروا على القبائل يخطفوا نساء يخطفوا اطفال يبيعوهم عبيد

وعايشين على السطو وعلى الغنائم ،

لما هاجر النبي الي المدينة اول شئ عمله انه كتبلهم رسالة يأمنهم ،

يا معشر الصعاليك ان انا منكم وانتم مني

لو اتبعتم ديني وساندتوني كل شئ انتم عملتوه الدم اللي عليكم اللي سرقتوه كله حلال

بس تيجوني وتبقوا جزء من دولتي الجديدة.

هاجروا الصعاليك

وأول هجوم على القوافل كان من الصعاليك ،

ليه ؟

لان يهود الميدنة كانا ضد فكرة انك تهاجم انك تستخدك المدينة للهجوم

احنا ندافع معاك آه عن المدينة ،

لكن انت متهاجمش من المدينة على قبائل تانية علشان انت كدا بتحرجنا ،

حتى الأوس والخزرج في البداية مشاركوش في غزوة بدر

ومشاركوش في الهجمات اللي على القوافل قبل كدا ،

فالصعاليك كانوا اساس النجاح .

جاه بعد كدا قبيلة اسمها قبيلة غفار بتاعة أبو ذر الغفاري ا أبو ذر الغفاري

والقبيلة كلها كانت قطاع طرق

وهي القبيلة الوحيدة التي هاجرت عن بكرة ابيها

كلهم هاجروا من غفار الي المدينة

كلهم استوطنوا في المدينة ،

ليه .

اشمعنا القبيلة دي بالذات هي اللي هاجرت

لأن النبي عايزهم،

النبي عايزهم علشان يقووا شوكته

ما هم عرف ان القبائل العربية صعب ان هي تبتدي تهاجك قريش

لان عندها مصالح مع قريش ،

حتى الأوس والخزرج في البداية كان فيه نوع من الحرج

هو ورطهم فيما بعد في الحروب وخاصة بعد ما يبقى يعني نجح ابتدوا يساعدوه

لكن في البداية هما الصعاليك وقبيلة غفار اللي ابتدوا يخلوا للاسلام قيمة ووزن ،

وهكذا نشأ الاقتصاد الاسلامي وظل هكذا قرون طويلة جدا ،

الاقتصاد الاسلامي قائم منذ بدايته على هذه الافكار

السبي السطو تقسيم الغنائم، الجزية ، بيع البشر ،

كلمة مؤذية جدا

أيوة تجارة العبيد كان من عصب الاقتصاد الاسلامي لحد الدولة العثمانية

لحد ما بعد تحرير العبيد في امريكا ابراهام لنكولن

لما ابتدوا يعملوا مواثيق دولية لمنع تجارة العبيد

وهو ده الشئ على فكرة اللي اضر بالاقتصاد الاسلامي

لأن اللي متعود طول حياته…

لو تفتكروا الكلام اللي قاله ابو اسحق الحويني قالك

ان احنا ضعفنا من ساعة ما بطلنا نعمل غزوات على بلاد الكفار

وعنده حق فعلا

ما هو لأن الاقتصاد كله كان قايم على هذا الاساس ،

انك تروح تسطو، هو كان يقولك يعني تروح تسطو على بلد تاخدلك راس راسين

تبيعهم تفك بيهم ازمتك

هو كان الاقتصاد الاسلامي فعلا قايم على هذه الفكرة

ولما غابت امكانية السطو والغزو والغنائم والسبي وبيع العبيد

اكتشفوا ان معندهمش حاجة يبيعوها للبشرية،

الاقتصاد العالمي حاليا قائم على فكرة انك بتبيع شئ البشرية محتاجاه

هو اللي بيسيطر على العالم النهارده معادش اللي هو معاه سلاح اكتر ولا اللي هو معاه ناس متوحشين وبيهجموا على القرى والقبائل

لأ اللي بيسيطر حاليا على العالم هو اللي عنده شئ بيبيعه للعالم

تلاقي اهم دول في العالم دلوقت هي الدول اللي سايبة منتجات في بيتك

انت دور في بيتك شوف ايه المنتج الأمريكي أو الالماني أو الياباني أو الصيني هتعرف ان هي دي الدول القوية ،

فين المنتج السعودي اللي في بيتك فين المنتج الباكستاني اللي في بيتك فين المنتج المصري المغربي الشامي .. مش هتلاقي ،

فهي دي الأزمة

وهي دي المشكلة ان الاسلام نشأته كان فيها عيب خلقي ،

نشأته كان فيها عنف

كان فيها اقتصاد قائم على الجور على الآخر واخد حقوقه

ولما هذه الاسباب غابت ، لما البشرية تطورت وطورت اقتصادها وسياستها

ظل العالم الاسلامي محشور في الصندوق القديم بتاعه اللي بيقسم العالم لمؤمن وكافر ،

الصندوق اللي مبيشوفش برا هذا الصندوق ،

الصندوق اللي شايف نفسه انه أفضل مكان وافضل أمة وخير أمة اخرجت للناس ،

في الحلقة اللي جاية هنكمل المقارنة بين الاسلام والمافيا

واتمنى ان اللي بيسمعني مياخدش الموضوع بحساسية شديدة ،

انا واحد من الناس كنت في يوم من الايام بقول الحمد لله على نعمة الاسلام

لحد ما في مرة وانا بعد ما قلت الكلمة دي سألت نفسي سؤال ،

انا بحمد ربنا على ايه بالظبط ،

ايه هي النعمة دي

مش قبل الانسان ما يحمد ربنا على نعمة يقول ايه هي النعمة دي ،

قبل الانسان ما يقول انا مسلم وافتخر مش المفروض هو يسأل نفسه يعني ايه مسلم ؟

وافتخر بايه بالظبط

او ان العملية كلها هي شئ نرجسي وخلاص ،

اي حاجة تسند الهوية وخلاص زي عكازين الواحد شايلهم وماشي بيهم

وعلشان مش لاقي غيرهم هيقولك هو ده اجمل حاجة في الدنيا

والغرب حاقد علينا علشان احنا مسلمين

الغرب هيحقد علينا ليه ؟

واللي بينتقد الاسلام مش بينتقده علشان خاطر ان هو غيران من انتاجاتك السياسية والاقتصادية وغيره ،

تابعونا الحلقة الجاية هنتكلم عن الاسلام والمافيا في الجزء التاني ،

اشوفكم على خير


Download text file

Box of islam 01

You may also like

ملخص تاريخ الاسلام بداية ونهاية
لم يستجب ياأخوة لمحمد في مكةخلال 13 سنة من الدعوة لم يستجب لدعوته لم [...]
6 views
ندوة للاستاذ حامد عبد الصمد في المغرب بعنوان التنوير فوبيا (الجزء الاول)
احمد عصيد: مساء الخير, يُسعدنا أن يكون معكم في هذا اللقاء الفكري الذي [...]
3 views
مين اللى سرق مصر،الحلقه التاسعة عشر: دور العبادة في مصر
مين اللي سرق مصر مين اللي سرق مصر مين اللي سرق مصر مين اللي سرق مصر [...]
0 views
مين اللى سرق مصر، الحلقة الثامنة عشر: إسلام التصدير وإسلام التكفير
مين اللي سرق مصر مين اللي سرق مصر مين اللي سرق مصر مين اللي سرق مصر [...]
0 views
مين اللى سرق مصر، الحلقة السابعة عشر: الأزهر عامل زي سُوستة
مين اللي سرق مصر مين اللي سرق مصر مين اللي سرق مصر مين اللي سرق مصر [...]
0 views
مين اللى سرق مصر، الحلقة السادسة عشر: مأساة التعليم في مصر
مين اللي سرق مصر مين اللي سرق مصر مين اللي سرق مصر مين اللي سرق مصر [...]
0 views
مين اللى سرق مصر، الحلقة الخامسة عشر: خليك فاكر مصر جميلة
مين اللي سرق مصر مين اللي سرق مصر مين اللي سرق مصر مين اللي سرق مصر [...]
0 views
مين اللى سرق مصر، الحلقة الرابعة عشر: الإعجاز العلمي في البناء المصري الحديث.
انهارده عايز اكلمكم عن موضوع الإعجاز العلمي في البناء المصري طبعًا [...]
0 views
مين اللي سرق مصر، الحلقه الثانية عشر، البرفان والشعب القرفان
مين اللي سرق مصر مين اللي سرق مصر مين اللي سرق مصر مين اللي سرق مصر [...]
2 views
مين اللي سرق مصر، االحلقة الحادية عشر ، أولاد حارتنا
مين اللي سرق مصر مين اللي سرق مصر مين اللي سرق مصر مين اللي سرق مصر [...]
0 views

Page 1 of 13

اترك تعليقاً

لن يتم نشر عنوان بريدك الإلكتروني.