صندوق الإسلام 03 : هل كان هناك نبي إسمة محمد؟

اهلا بيكم في الحلقة الثالثة من سلسلة صندوق الاسلام

الحلقة دي هتبدا بسؤال غريب شوية السؤال ده بيقول:

هل كان هناك نبي اسمه محمد؟

اه .. مشكلة .. سؤال يبدو صادم لكثير من المسلمين او لكل المسلمين.

لما تقولهم في احتمال ان مكنش في حد اصلا اسمه محمد عاش

بالنسبة للمسلم المؤمن عنده يقين تام بقصة النبي من اولها لاخرها.

ان النبي اتولد سنة 570  او 571 حسب ابن اسحق.

انه تزوج خديجة في سنة 595 وهو عنده 25 سنة وهي عندها 40 سنة.

وانه تلقى الوحي في سنة 610 م وهو عنده 40 سنة.

وان هو هاجر من مكة للمدينة سنة 622.

واسس الدولة الاسلامية في المدينة.

ومات بالمدينة سنة 632 م.

وبعد منه بقا جاء الخلفاء الراشدين ابوبكر وعمر وعثمان وعلي.

دا الكلام اللي موجود في التاريخ الاسلامي ، التاريخ الاسلامي اللي اتكتب بعد سنين طويلة من وفاة النبي.

اول كتاب سيرة اتعمل عن محمد

كتبه ابن اسحق حوالي 130 سنة بعد وفاة النبي.

واحنا عا رفين طبعا في ثقافتنا العربية لما واحد بيكتب او بينقل حاجة في نفس الوقت.

واحد حاجة سمعها انهردة في القاهرة وسافر لعمان او سافر للرياض او سافر لبيروت.

بيجي يحكيها بيأولها وبيحكيها بطريقة تانية خالص.

فما بالك بعد 130 سنة! يبقى ايه كم الاساطير اللي اتعمل ؟

ده بالنسبة للمسلم اللي بيقرا السيرة

او بيعرف تاريخ النبي محمد عن طريق السير اللي اتكتب.

فاول حاجة كان ابن اسحق.

بس اللي كتبه ابن اسحق موصلناش.

السيرة اللي كتبها ابن اسحق في القرن الثامن، يعني بعد 130 سنة من وفاة محمد، موصلتلناش.

الاصل بتاعها اختفى، اختفى ليه؟ محدش عارف!

التلميذ بتاع ابن اسحق، وكان اسمه البكائي، صلَّح فيها حاجات.

وبعدين تلميذ البكائي ابن هشام اعاد كتابة السيرة وزي ما قال هو في المقدمة انه ابتدا ينقي هذه السيرة.

ويشيل منها الاشياء التي قد تشين النبي بشيء.

الاشياء التي قد تُفهم بطريقة تسيء الي النبي.

ايه هي الاشياء اللي شالها؟

نعرف بعض الحاجات ومنعرفش بعض الحاجات.

يعني قصة زي قصة الغرانيق مثلا قصة الغرانيق قصة القران بيشير ليها في سورة النجم.

لما بيتكلم عن: “أفرايتم اللاتِ والعُزى ومناة الثالثة الأخرى؟”.

في تفسير الطبري بيقول ان الاية دي اصلا كان الشيطان تدخل فيها.

الشيطان تدخل فيها بمعنى انه هو اوحى الى لنبي ان الوحي بيقوله افرايتم اللات والعُزى ومناة الثالة الأخرى؟

ان جه بعد كدا قاله “تلكم الغرانيق العُلا وان شفاعتهن لتترجى”.

ليه؟ لان النبي كان يتمنى ان قريش تؤمن برسالته.

وحاول معهم فترة طويلة لكن مآمنوش.

فكرة الوحدانية اللي هي البحتة ان مفيش غير ربنا واحد ولا اصنام ولا آالهة تانية لم تكن مستساغة لاهل مكة.

فبعد التعب ان هو احد اهدافه ان هم يؤمنوا برسالته.

فعايز اي عرفان منهم.

فتمنى لو كان في حل وسط.

فيقولهم “أفرايتم اللاتِ والعُزى” فذكر آلهتهم

هم كانوا يتمنوا اذكر آلهتنا بخير.

فذكرهم بخير “أفرايتم اللاتِ والعُزى ومناة الثالثة الأخرى؟ تلكم الغرانيق العُلا وان شفاعتهن لتترجى”. وقالها ، ففرحوا بتوع مكة.

فاكتشف فيما بعد المصيبة انه بكدا لغى فكرة الوحدانية.

اللي هو جاي من أساسها أساسا اللي جاي يعني يبشر بيها ويبلغ بيها.

فطبعا حذف الاية دي وقال ان الشيطان هو الذي وسوس له بهذه.

وان اي نبي بيأتي يعني ايه تمنى يتدخل الشيطان في أمنيته وحذف الآية دي وراح مدخل مكانها بقا آيات تانية

 “فلكم الذكر وله الانثى”. ان هي الا أسماء سميتموها انتم وآبائكم ما انزل الله بها من سلطان، الى آخر الأيات  وصلَّح الغلطة.

ليه بحكي القصة دي؟ لان ابن اسحق في السيرة الاصلية ذكر هذه القصة.

فجه ابن هشام وهو بيقرا فحس باحراج.

يعني ازاي يكون نبي وازاي يكون في وحي ويجي الوحي من الشيطان؟!

طب ما دا ممكن شيء يشكك في مصداقية النبوة

لان ممكن ايات تانية يكون الشيطان هو اللي تدخل فيها.

والشيطان اذا تدخل مرة ممكن يتدخل تانية وتالتة.

فابن هشام حذف دي وحذف حاجات كتيرة، حذف اشعار كانت تُسيء للنبي.

لو الأشعار دي لسة موجودة عندنا احنا كنا ممكن نعرف حاجات عن قصة حياة محمد.

كل الكلام اللي انا بقولهولكم دا من داخل المصادر الاسلامية فقط.

الباحث الغربي بقا لما يجي يتعامل مع قصة محمد محتاج مصادر اخرى، محتاج مصادر غير اسلامية.

مش المفروض النبي كان عايش 22 او كنبي يعني 23 سنة بينزل فيهم القرآن.

وكان قائد عسكري وكان بنى دولة اسلامية.

وكان بيبعت رسائل لهرقل وللمقوقس وملك الفُرس و و الى اخره.

الحاجات دي مش موجودة!

حتى انا كنت في اسطنبول من حوالي 10 سنين.

وشفت في متحف الباب العالي، شفت رسالة الرسول الى هرقل.

اللي هو بيقوله فيها “”أسلِم تَسلَم”.

وبعد ما حللوا الورق بتاع الرسالة والحبر.

اكتشفوا ان هي من قرون متأخرة! يعني بعد النبي بكام قرن. فمش هي

حتى قصة الرسائل دي غير منطقية! بصراحة غير منطقية

انه ازاي يعني واحد عنده جيش بسيط جدا و و يعني مجتمع بسيط لسه في الصحراء يبعت لملوك الفُرس والروم ومصر وبتاع يعني يهددهم! مش منطقية الحقيقة

فا يدوروا على اي رسالة من … يدورا على اي اقصقوصة للقرآن من الزمن اللي هو كان عايش فيه مفيش.

ودا بيحط البحث العلمي التاريخي في ازمة.

ان الحاجات اللي موجودة من الاسلام اتكتبت بعد 130 سنة.

فمفيش مصادر تقولنا ايه اللي حصل. ومفيش مصادر غير اسلامية تقول

حتى مفيش وثيقة اسلامية مكتوبة ذُكر فيها اسم محمد. فا لغز غير عادي!

يبدأ اللغز ان ستين سنة بالظبط بعد وفاة محمد لا ذكر لمحمد في اي وثيقة عربية او بيزنطية او فارسية أو أي لغة

حتى مفيش حاجة اسمها محمد، مفيش حاجة اسمها اسلام مفيش حاجة اسمها قرآن، مش لاقيين ولا وثيقة تُثبت هذا الشيء.

في مخطوطات للقرآن حديثا اكتُشفت زي مخطوطة صنعاء.

لسة مش متاكدين من عمرها  بالظبط.

مخطوطة صنعاء اكتُشفت في مسجد صنعاء الكبير سنة 1972م.

وتحليل الكربون 14 مش متاكد يعني بيديها حجم كدا يعني ممكن تكون اتعملت في عصر عبد الملك بن مروان يعني الامويين او قبل كدا بشوية

المهم يعني بعد وفاة النبي بحوالي 50  60 سنة.

طيب ازاي مفيش وثيقة من ايام عمر بن الخطاب ازاي مفيش وثيقة من ايام عثمان بن عفان من ايام علي  من ايام ابو بكر؟

ده كانوا مسيطرين على الفُرس والروم ودمشق والقاهرة؟!

ولا وثيقة، ولا وثيقة مكتوب فيها كلمة اسلام او محمد او قرآن.

كله بيقول العرب، حتى كلمة العرب مبيستخدموهاش.

كانوا بيسموهميعني الساراسيس او الهاجريون او الاسماعيليون.

او للآسف يعني الكلمة اللي هما كانوا دايما مشهورين بها، البربريون المتوحشون.

لان هو دا الاسلوب اللي كانوا بيغزوا به البلاد.

او على الاقل البلاد شافتهم كدا.

إذن كيف التعامل مع محمد تاريخيا ازاي 60 سنة مكانش في حاجة اسمها محمد؟!

فجاء البحث العلمي الغربي انشق:

في فريق مجبر ان هو ياخد المصادر الاسلامية زي ما هي.

ويقول خلاص مادام ابن اسحق قال ان هو اتولد 571 معندناش حل تاني غير ان احنا نقبل كدا

وعاش في مدينة اسمها مكة

ثم انتقل لمدينة اسمها المدينة او يثرب. وخلاص

بياخدوا هذه الاشياء ويتعاملوا على اساسها.

في باحثين تانيين بيقولوا لأ:

احنا لازم ناخد المخطوطات والعملات عشان نعرف في ايه؟

فيكتشف ايه في العملات اللي موجودة في العصر اللي المفروض بدايته ان هو عصر اسلامي.

يُكتشف ان الحاكم ماسك صليب في ايده!!

طب ازاي ، ازاي حاكم مسلم من عصر الأمويين، يعني بعد  الخلفاء الراشدين كمان ، وماسك صليبفي ايده ؟! طب جات ازاي دي

طب فين محمد؟ فيه رسايل ودواوين ودنيا شغالة

فين اسم الاسلام؟ فين اسم القرآن؟ ملقوش!

فطلعت نظرية يعني بدايتها كان كتاب اسمه الهاجريون.

دا كتاب يعني مهم، وان كنت اختلف معه.

ترجمه الدكتور نبيل فياض عن باترشيا كرون ومايكل كوت.

ان هما بيقولوا ان الاسلام منشأش في الجزيرة العربية، وانما في الشام.

ونشأ من تحالف اسلامي يهودي على اساس التحالف ضد البيزنطيين!

ان اليهود بتوع الشام تحالفوا مع عرب الشام علشان يهزموا البيزنطيين. دي نظرية

النظرية التانية قامت على كتاب كتبه عالم لغوي مهم جدا في المانيا

اسمه كريستوف لوكسينبرج، وهو طبعا من اصول لبنانية ويجيد السريانية والعربية.

وهو باحث مهم وكتب كتاب اسمه القراءة السورية الآرامية للقرآن.

واكتشف لوكسينبرج ان القران يحتوي على مئات الكلمات الماخوذة من اللغة السريانية.

 وفي بعض الاحيان أسيء فهمها في اللغة العربية.

في امثلة كتيرة جدا للي ممكن يقرا الكتاب بالانجليزي.

مثلا كلمة “فرقان”، احنا بناخد كلمة فرقان على اساس ان دي القران.

“سبحان الذي نزَّل الفرقان على عبده”.

كلمة فرقانو بالسريانية معناها الخلاص.

ولوكسينبرج بيقول ان دي ترنيمة مسيحية بتتكلم عن السيد المسيح:

“سبحان الذي نزَّل الخلاص على عبده”.

ملهاش علاقة بالقران.

مثال تاني بيقوله الباحث لوكسينبيرج.

وطبعا كلمة لوكسينبرج دا اسم مستعار،عشان طبعا هو عارف انه لو ظهر بوجهه او باسمه هيتقتل.

مثال تاني جاب سورة القدر “إنَّا انزلناه في ليلة القدر ليلة القدر خير من الف شهر وما ادراك ما ليلة القدر، ليلة القدر …. الى اخر السورة”..

وجد ان دي كانت ترنيمة سريانية قديمة ايضا بتتغنى في مولد المسيح.

فشيء غريب! ما هي بردو مصطلحات مكانتش معروفة للعرب خالص.

الروح والملائكة دا عالم مسيحي خالص.

ولو لاحظنا بداية الاسلام هتلاقي مصطلحاته كثيرة فيها المسيحة والتعليق على اللاهوت المسيحي والتعليق على السيد المسيح

وكلها كانت مناقشات في سوريا وفي الشام وفي فلسطين ايام ظهور الاسلام.

فالمفروض فعلا ان اللغة دي والمواضيع دي ملهاش علاقة بمكة خالص ولا بالمدينة.

مواضيع لا تهم هؤلاء الناس.

لكن دي كانت مناقشات في داخل الدولة البيزنطية في سوريا وفي مصر:

 طبيعة المسيح: ابن الله او ثالوث؟

مواضيع لا تهم العرب اطلاقا اللي هما مبيؤمنوش بالمسيحية. لكن تهم المسيحيين العرب، تهم المسيحيين العرب

فا لوكيسنبرج لما عمل هذا الكتاب الباحثين ابتدوا ينتبهوا

ان احنا منقدرش ان نعتمد فعلا على الكلام اللي قالوا ابن اسحاق وغيره في قصة النبي وقصة الاسلام وقصة القران.

فابتدوا يرجعوا للمخطوطات ويرجعوا للعملات.

فظهر فريق عمل نظرية ان تقريبا مكانش في حد اسمه محمد اصلا.

ودا تم اختراعه فيما بعد.

انا شخصيا لا اعقتد بهذه النظرية. علشان تبقوا عارفين يعني

لكن هما الادلة اللي بيستخدموها مقنعة الى حد ما.

قالك كلمة محمد في القرآن لم تُذكر الا 4 مرات فقط. منها ما كان محمد ابا احد من رجالكم ومنها محمد رسول الله والذين آمنوا معه أشداء على الكفار …. 4 مرات

طبعا عدد صغير جدا من المرات اللي ذكر فيها اسم محمد مقارنة بلو لقيت عيسى هتلاقيه 26 مرة،  لو لقيت موسى 136مرة ، وابراهيم  69 مرة نوح مش عارف كام و ستين.

 يعني عدد هائل من المرات ذُكِر فيه الانبياء كلهم في القران الا محمد! طب ليه ؟ ايه الغياب ده

وحاجة تانية اكتشفوها ان كل المرات التي ذُكِر فيها اسم محمد  هو كلها في السور المنية

يعني مكة مذكرتش حاجة اسمها محمد خالص. ليه ؟ برضو لغز غير عادي. لغز غير عادي ايه الغياب ده ؟!

المفاجاة بقا يكتشفوا ان كلمة محمد كلمة سريانية.

وكلمة كان يستخدمها المسيحيون العرب لتمجيد يعني صفة مش اسم  السيد المسيح.

ان هما يقولوا محمد ابن الله او محمد عبد الله. كلمة عبد الله ده برضو مصطلح مسيحي مش الاسلام اللي اخترعه ولا حاجة

محمد يعني اسم تمجيدي معناه المختار المصطفى الممدوح.

وطبعا اللغة العربية اشتُقت من اللغة الارامية واللغة السريانية.

في تطور كدا العبرية تطورت وطلع منها السريانية …. الأرامية ومن الأرامية طلع السريانية وفي خليط من السريانية الاراميةن واللغة العربية أخدت منهم

ف اللي عملوا النظرية دي ان محمد اختراع فيما بعد بيعتمدوا على هذه الاشياء.

قالك مكانش فيه شخص اسمه محمد ، اه احتمال ان يكون فيه واحد ظهر من العرب المسيحيين اللي هو ابتدأ يدعو يعني هرطقة مسيحية بيقولوا يعني اللي هو في المسيحية انقسمت الى شعب كتيرة جدا خاصة تحت وطأة الدولة البيزنطية اللي كانت معتمدة مبدأ واحد بس ان الله له طبيعتين الطبيعة البشرية .. المسيح له طبيعتين الطبيعة البشرية والطبيعة الإلوهية.

وفي طوايف مسيحية تانية قالت: لا، المسيح له طببيعة واحدة.

اللي كانوا بيسموهم المينوفيزيقيين.

وبعدين في طوايف كانت بتقول ان المسيمح مش ابن الله المسيح رسول فقط.في طوائف مسيحية كانت موجودة بهذا الشكل

ويبدو ان الاسلام دخل مع المجموعة دي.

وفضل فترة طويلة مبيسميش نفسه الاسلام.

يعني مكانش  فيه دين مستقل كدا في البداية اسمه الاسلام. فالأسئلة اللي الناس دي بيطرحوها لازم احنا نبتدي ندور ونبحث فيها، ومنعتمدش بقا على ايه ده ابن اسحق قال اتولد كذا ومات كذا يبقى هو كدا .

ليه ليه مفيش ولا ذكر لمحمد في مكة، ليه 4 مرات بس في المدينة، ليه مفيش ولا وثيقة عربية تذكر مين هو ابو بكر ولا عمر ولا عثمان من ايامهم؟

مش كانوا ملوك دول. والملك بيبقى ليه ختم ويبقى ليه رسايل. ولا الهوا

اختفت الحاجات دي راحت فين او هم بيحاولوا يخفوا حقيقة معينة في ظهور عن ظهور الاسلام؟!

هل فعلا هل فعلا الاسلام في بداياته كان هرطقة مسيحية وتطور وصار ليه دور فيما بعد او ديانة مستقلة؟!

هل الاسلام تم اختراعه فيما بعد؟! هل شخص النبي تم اختراعه فيما بعد؟

وهنحاول في الحلقة القادمة ان احنا نعطي بعض الاجابات عن هذا السؤال.

ونبتدي بقا نخش في السيرة النبوية والمسائل المسكوت عنها في السيرة النبوية بتاعت النبي محمد.

والسيرة دي اتكتبت ازاي واتكتبت ليه، واتكتبت من مين ، واتكتبت لمين؟

الاسئلة اللي احنا تجنبناها في القرون اللي فاتت.

والهدف ان احنا نعيد التفكير.

لما بنقول تنقية التراث يبقى نرجع للأصول الاساس اللي اتبنى عليه البيت.

كان ايه؟ مين اللي عمله؟ وعمله ازاي؟ اللي عايز ينقد يبدأ من هنا.

نشوفكم الحلقة القادمة


Download text file

Box of islam 03

You may also like

حامد عبد الصمد -  التمييز والعنصرية في الإسلام
 [00:00:04] حامد عبد الصمد: أهلا بكم أصدقائي الأعزاء في حلقة جديدة من [...]
0 views
ملخص تاريخ الاسلام بداية ونهاية
لم يستجب ياأخوة لمحمد في مكةخلال 13 سنة من الدعوة لم يستجب لدعوته لم [...]
20 views
ندوة للاستاذ حامد عبد الصمد في المغرب بعنوان التنوير فوبيا (الجزء الاول)
احمد عصيد: مساء الخير, يُسعدنا أن يكون معكم في هذا اللقاء الفكري الذي [...]
18 views
مين اللى سرق مصر،الحلقه التاسعة عشر: دور العبادة في مصر
مين اللي سرق مصر مين اللي سرق مصر مين اللي سرق مصر مين اللي سرق مصر [...]
7 views
مين اللى سرق مصر، الحلقة الثامنة عشر: إسلام التصدير وإسلام التكفير
مين اللي سرق مصر مين اللي سرق مصر مين اللي سرق مصر مين اللي سرق مصر [...]
2 views
مين اللى سرق مصر، الحلقة السابعة عشر: الأزهر عامل زي سُوستة
مين اللي سرق مصر مين اللي سرق مصر مين اللي سرق مصر مين اللي سرق مصر [...]
4 views
مين اللى سرق مصر، الحلقة السادسة عشر: مأساة التعليم في مصر
مين اللي سرق مصر مين اللي سرق مصر مين اللي سرق مصر مين اللي سرق مصر [...]
4 views
مين اللى سرق مصر، الحلقة الخامسة عشر: خليك فاكر مصر جميلة
مين اللي سرق مصر مين اللي سرق مصر مين اللي سرق مصر مين اللي سرق مصر [...]
7 views
مين اللى سرق مصر، الحلقة الرابعة عشر: الإعجاز العلمي في البناء المصري الحديث.
انهارده عايز اكلمكم عن موضوع الإعجاز العلمي في البناء المصري طبعًا [...]
6 views
مين اللي سرق مصر، الحلقه الثانية عشر، البرفان والشعب القرفان
مين اللي سرق مصر مين اللي سرق مصر مين اللي سرق مصر مين اللي سرق مصر [...]
3 views

Page 1 of 14

اترك تعليقاً