صندوق الاسلام الحلقة 87: ما فائدة صلاة الجمعة؟

أهلًا بيكوا في حلقة جديدة من حلقات صندوق الإسلام

هنواصل الحديث عن موضوع أو معضلة إصلاح الإسلام

تذكرة مرة تانية أنا بعمل كتاب في ألمانيا مع برفيسور فلسطيني نمساوي هو رئيس قسم في ألمانيا للدراسات الإسلامية

ونتحاول نتجادل حول إمكانية إصلاح الإسلام

أحد القضايا المطروحة عايزين نصلح إيه بالظبط؟ عايزين نصلح الإسلام نفسه يعني نصوصه؟

 نمسك ورقة وقلم أحمر كدة ونعلم على القرآن ونقول الكلام دة ماينفعش والكلام دة ولى زمنه؟

في السيرة نقول الكلام دة ماينفعش يدرس؟ مانقدرش نقول الكلام دة؟

أو إن إحنا بنصلح الخطاب الديني بنصلح البضاعة ولا طريقة تسويق البضاعة؟

أنا من وجة نظري إن طريقة تسويق البضاعة مش هيحل إذا كانت البضاعة نفسها هتفضل زي ماهي

وأصدق دليل على ذلك إن لما الرئيس السيسي لما من سنة وشوية في المولد النبوي

كلم شيوخ الأزهر يعني وبيقولهم عايزين نصلح الخطاب الديني علشان إحنا صورتنا بقت وحشة والإسلام الناس بقت بتخاف منه

وبقى مصدر عنف والكلام دة ماينفعش فيعني كأنه من باب العشم كدة يعني هطلب هتعبكوا معايا شوية

هطلب منكوا خدمة صغيرة بس ياريت تصلحولنا الخطاب الديني وبتاع

مش بالسهولة دي وأنا كنت ذكرت مقالة للأستاذ مؤمن المحمدي كان كاتبها لذيذة

كان بيوريك يعني فكاهيًا كدة يعني إيه إصلاح الخطاب الديني؟

فهو كان يقولك إصلاح الخطاب الديني دوس نجمة كأنها بالسهولة كدة هندوس على التليفون والنبي صلح الخطاب الديني

عمل إيه الأزهر بقى ردًا على طلب الرئيس لإصلاح الخطاب الديني إبتدا يعمل لجان

اللجنة الأولانية لمكافحة الإلحاد ولجنة لمكافحة التشيع

وتأسيس لجنة من العلماء يعلموهم لغات علشان يروحوا أوربا يشرحوا الإسلام الصحيح للناس في أوربا

وكأن مشكلة الإسلام الأساسية هي صورته في الغرب ودي مشكلة كبيرة  في فكرة الإصلاح

إن أنت عندك إسلام للتصدير وإسلام للإستهلاك المحلي

أهم حاجة عندنا إسلام التصدير تكون صورته حلوة يكون كدة زي الفاكهة الطازة

الإسلام الإستخدام المحلي ممكن يبقى مسرطن ممكن يبقى فاسد مسوس مش مشكلة

عادي الشعب جدته نحست ممكن يستخدم أي حاجة ممكن يعيش مع أي حاجة

ودة طبعًا فكر خاطىء تمامًا ولذلك لما السيسي طلب من الأزهر إصلاح الخطاب الديني

ماكنش يعني ماكنش مدرك إن الأزهر نفسه هو لب المشكلة يعني هو الbody gard بتاع الإسلام إللي مسببلنا البلاوي

الأزهر هو إللي يحول دون إن الفكر الإصلاحي ينتشر

الأزهر إللي كان السبب في قتل فرج فودة وكان سبب في محاولة اغتيال نجيب محفوظ

وكان سبب في قتل أو إعدام محمود محمد طة الناس إللي كانت بتفكر في الإصلاح بجد

الأزهر إللي كان برضو سبب في طرد نصر حامد أبو زيد ونفيه وتطليقه من مراته لما قدم أفكار أفكار إصلاحية بجد

أفكار لإصلاح الفكر هو علاقة الناس بالدين وبالنصوص المقدسة

هو دة إللي كان ممكن يُصلح لكن لما الأزهر يعملك لجنة لمكافحة التشيع ولا لمكافحة التنصير ولا لمكافحة الإلحاد

هما الشيعة والمسيحين والملحدين هما إللي بيفجروا الدنيا؟ هما إللي بيضهدوا المرأة؟ هما إللي بيسببوا العنف باسم الإسلام؟

حاجة غريبة جدًا وبعد كدة يقولك نعمل لجنة من العلماء نعلمهم لغات ويطلعوا بقى لأوربا ويقولهم الإسلام دة عسل

دة الإسلام دة مافيش زيه, ونفس الشيء شيخ الأزهر عمله بنفسه

شيخ الأزهر من سنة تقريبًا كدة بعد خطاب السيسي بشوية كان راح زار ألمانيا كان راح زار القسم إللي هو بتاع الدكتور مهند خورشد

قسم الدراسات الإسلامية إللي هو هيخرج الدعاة بقى والأئمة

الراجل إللي بيعمل معايا الكتاب فراح بعد ما زار الجامعة بتاعت مهند خورشد بيوم راح إتكلم في البندستاق في البرلمان الألماني

وشرحلهم بقى في البرلمان الألماني الإسلام الجميل  دة عبارة عن إيه يعني؟

الإسلام من علامات طبعًا هو دين التسامح الإسلام هو إللي إخترع الحرية أًصلًا

والمحبة ودين الناس حست بعد ما هو إتكلم كدة أمال فين المشاكل؟

لما الإسلام دة جميل كدة وبتاع الحرية بيحب المسيحين وبيحب اليهود وبيكرم المرآة

طبعًا لازم لازم تكريم المرأة لازم يجي علطول بيكرمها إزاي بقى؟

الدليل إنه الراجل ملزم يجيب لمراته الدوا وملزم يجبلها الزينة علشان تزين نفسها

يسلام كدة يبقى هو بيكرم المرأة؟

لما واحد لما راجل يجيب لمراته لمؤاخذة لانجيري ولا ملابس كدة سكسي شوية ولا بتاع علشان تبسطه

يبقى كدة تكريم للمرأة؟

حاجة عجيبة يعني,يعني واخد نفس الفكرة دة بيكلم ألمان دة الألمان إللي جابوا كلارا زيتكن وروزا لوكسم بيرج إللي خرجوا للشوارع من 100سنة و10

وإبتدوا يطالبوا بحرية المرأة وإن هي تكون هي يعني ماحدش يتحكم فيها وإنها تنتخب وإنها وإنها وإنها

أنت تجي تقولهم تعلمهم تقولهم الإسلام هو إللي كرم المرأة بدليل إن الراجل المفروض يجيب لمراته ملابس حلوة وزينة ومش عارف ميك أب

فبيوري لك الدنيا  الراجل مش واخد مش مستوعب الدنيا بتفكر إزاي يعني؟

شيخ الأزهر قبل ما يروح ألمانيا يلقي الخطاب دة كان مقدم بلاغ ضد إسلام البحيري

هو بيقولهم في ألمانيا الإسلام ضد الحرية وليس ضد حرية الفكر ولا حرية التعبير ويقبل النقد وكل الكلام دة كلة

وقبليها بشوية مقدم بلاغ ضد إسلام البحيري وإتحبس الراجل فشوف التناقض بقى

علشان تعرف إن الكلام عن الإصلاح في الغالب بيكون كلام مجرد بس للإستهلاك الخارجي لتحسين الصورة

ودي أزمة من الأزمات الكبيرة جدًا مهوسيين بتصليح صورة الإسلام عند الغرب

المفروض إحنا نبدأ بتصليح صورة الغرب عندنا أسهل وأكثر فاعلية

لأن مشكلة الإسلام لا في أوربا ولا هنا ولا في البلاد الإسلامية هي مشكلة صورة

ولكن أسلوب حياة مشكلة الإسلام مع الإصلاح هي مشكلة مع العنف

هي مشكلة مع حقوق المرأة هي مشكلة مع حقوق الأقليات المساوة بينهم

إزاي أنت تتكلم عن إصلاح الإٍسلام من غير ما تتكلم عن الملفات الشائكة

علاقتنا بالشيعة, قتل حسن شحاتة الراجل الشيعي إللي قتلوه في بيته علشان رأيه في الصحابة

الأقباط إللي كل شوية عمالين عمليات إرهابية يستقبلوها ويسكتوا وإحنا نسكت معاهم

وكل مرة يقولك لا يمثل الإسلام إللي عمل كدة لا يمثل الإسلام

إللي فجر القديسين لا يمثل الإسلام, إللي فجر كنيسة العباسية لا يمثل الإسلام

إللي هجر الناس من المنيا وإللي عرى الست الكبيرة القبطية في المنيا لا يمثل الإسلام

قتلوا الأقباط وهجروهم من العريش لا يمثلون الإسلام كل دة  عمالين إحنا قاعدين بس كدة  لا يمثل لا يمثل

عمالين نمثل على بعض أمال مين يمثل؟ مين إللي بيمثل؟

كل الدنيا البلاد الإسلامية مافيش بلد واحد مافيهوش المرض إللي هو بتاع الأرهاب

وأضطهاد الأقليات والعنف حتى تركيا إللي كنا عمالين نغني بيها ونقول دول رمز للإصلاح و و إل أخرة

لما الإسلام إتطبق فيها بجد أو إبتدا أردوغان يرجع الإسلام شوية إن هو يبقى ليه دور في الحكم شوفنا البلاوي دي كلها

إندونسيا, كنا عمالين نقول إندونسيا دة مثال رائع للإصلاح والتزواج والتعايش بين الإسلام والديموقراطية

لأ لما في مقاطعة من مقاطعات إندونسيا إللي هي باندا آتشيه طبقت الإسلام طبقت الشريعة بقت بتجلد النسوان

وبقوا يقطعوا الأيد يعني بقوا يطبقوا ماهو خلاص مادام أنت دخلت كلمة الإسلام في اللعبة أفسدت الطبخة

فلذلك إللي هما عمالين يدورا على الإصلاح يقولك إيه الإسلام والديموقراطية هما يعني مافيش مش ضد بعض

لأ ضد بعض مليون مرة والقصة مش قصة الغرب بيفكر إزاي؟ وبيتعامل معاه إزاي مع قضيتنا؟

إيه بقى عمل إيه الأزهر كمان علشان يصلح الخطاب الديني؟

إبتدا وزارة الأوقاف تعمل الخطبة الموحده لا دة مش الأزهر دة وزارة الأوقاف هي إللي عملت كدة

الأزهر رفض فوزارة الأوقاف إبتدت تعمل حاجة اسمها الخطبة الموحده ودة دليل أكبر دليل إن أنت عندك مرض عُضال

أنت خايف من الناس إللي الأزهر هو إللي مخرجهم إن هما يقولوا كلام من إللي إتعلموه في الأزهر

هي دي مختصر المشكلة لية؟

الدولة عملت الخطبة الموحده ودي مش أول مرة  دة بتتكرر يعني كانت إتعملت مرة أيام عبد الناصر وأيام السادات ومبارك

يعني مش إبداع يعني لأن هما كانوا عارفين لو سبت خطيب الجمعة يقول إللي في مزاجه هيبوظ الدنيا

ماهو إيه إللي خرب عقول الناس دي كلها؟ كل السنوات دي كلها؟

ماهو الخطاب المسموم دة إللي هو مش جايلنا متهرب من برة ما من داخل النصوص الإسلامية نفسها

ودي هي دي المشكلة إن ماحدش عايز يعترف بيها

إن المشكلة مش الفهم الصحيح للنصوص لأ المشكلة في النصوص ذاتها إللي بتحرض على الكراهية

إللي جاية من زمن تاني ماينفعش مع زمانا, مش عايزين نعترف

أصله تراثنا وإحنا مالناش هوية تانية غيره ماسمحناش طول السنين دي كلها إن يكون عندنا هوية غير الإسلام

علشان كدة متورطين, متورطين نعمل إيه؟ ماعندناش غيره هو دة إللي عندنا  النصوص إللي عندنا نعمل إيه؟

فيقولك أعمل جمعة موحده يطلع الراجل يخطب خطبة الجمعة كدة

بسم الله مش عارف إن الحمد لله نحمده ونستعينه ونستهديه ونستغفره

نصها ديباجات دايمًا كدة وأعوز بالله من شرور أنفسنا ومش عارف إيه؟

ويجبلك آيتين أما عباد الله فمش عارف إيه؟ الظلم حرام ومش عارف السرقة حرام

كأنهم أطفال في كتاب مش عارفين إن الظلم حرام والسرقة حرام ومش عارف إيه؟

وماشي يتكلم عن عذاب القبر مافيش مشكلة, يتكلم عن الموت وأرعب الناس أديهم كذا فيلم رعب كدة عن الثعبان الأقرع

وإللي هايجي يحصلهم ويوم القيامة ومش يوم القيامة بس ماتخشش بقى في إيه في الحاجات إللي هي بتسبب أرهاب

يعني ماتخشش في حوالي 80% من القرآن, يعني ماتخشش في حوالي 90% من الأحاديث تقريبًا كدة

هو دة إللي خلاه يقولك إيه؟ وحد الخطاب الديني طب وبعد ما وحدت الخطاب الديني؟

صلاة الجمعة أصلًا لازمتها إيه؟ ماحدش فكر في الموضوع دة؟

أنا يعني من زمن طويل جدًا من وأنا صغير من  وأنا مراهق كنت بسأل نفسي

إيه فايدة صلاة الجمعة غير إنها  pidgin time  بس كدة أضيع شوية وقت لحد أمي ماتخلص طبق المحشي أو حلة المحشي الطبيخ بتاع يوم الجمعة

غير كدة أنا ماكنتش,ماكنتش شايف الفكرة إن لا بخرج أكثر وَرعًا ولا بخرج من صلاة الجمعة عندي معرفة

Infrastructure البنية التحتية المهولة دي المساجد دي لو في حد بيعلم حاجة بجد يوم الجمعة دي

دي الأمة دي كانت تبقى من أكثر الأمم تنويرًا في العالم

مافيش حاجة مليانة في الدنيا أكتر من المساجد يوم الجمعة

ومبارة  كرة القدم لما بارشيلونة بيكون بيلعب أو الأهلي والزمالك

غير كدة مافيش الحجم دة من البشر بيتجمع في مكان واحد وبيسمع رسالة واحدة

فأنت لو كان عندك رسالة محبة بجد لو كان عندك رسالة سلام بجد لو كان عندك رسالة معرفة بجد

دة أنت يوم الجمعة دة كنت ممكن تستغله إن أنت تنور البشرية كلها كنت تخلي الشباب دول أحسن شباب في الدنيا لو عندك حاجة تديهالهم

 لكن للأسف الشديد إحنا كنا بنقعد في صلاة الجمعة تحس إن الراجل بتاع الأمام أو خطيب الجمعة هايرجع عليك من كتر الكراهية

هايرجع عليك كذا يانهار أسود يحسسك أولًا بعذاب الضمير إنك أصلاً مانتاش مسلم أصلًا

دة أنت ربنا هيطلع عينك والله أنا كان في خطيب جمعة بيقول دة أنتوا وجعتكوا مهببة بهذا النص دة أنتوا وجعتكوا مهببة

أدي الخطاب الديني فإيه المادة بقى لو أنت فعلًا  إسلامك دة دين السلام ودين الرحمة ودين المحبة ودين الإنسانية أو دين تكريم المرأة ودين تحرير المرأة ودين تحرير العبيد؟

المبادىء دي, المبادىء دي  كان المفروض صلاة الجمعة دي يعني تنشرها وتدعمها وتخلي شباب الأمة دة مافيش زيه

لكن بصوا أنتوا في الشوارع وشوفوا النتيجة دة نتاج الثقافة الدينية الغوغائية

إحنا كلنا مفكرين إن الشيخ عبدالله بدر وأبو إسلام والناس إللي كانوا عمالين يشتموا في الفضائيات دول كلهم إن دة كلة

نتاج بس كدة لما الأخوان جم وشموا نفسهم شوية لأ

لأ هو النصوص الدينية إللي عندك إللي أنت بتدرسها من 1400 سنة سواء آيات أو أحاديث

هي إللي بتطلع الروح دي في ناس علشان  زي الراجل الدكتور مهند خورشد إللي هو بيعمل معايا الكتاب

علشان هو طبيعتهم إن هما ناس محترمين ومؤدبين وعندهم إنسانية وعندهم مبادىء يعني  إتعلموها برضو من عاش في أوربا وهكذا

اه بيجي بيدور بينبش في الإسلام في القرآن ويدور يعني بأبره يدور والنبي عايزين آيه حلوة كدة تبل الريق

هيلاقي لك آيه كتب على نفسه الرحمة ( وَمَا أَرْسَلْنَاكَ إِلا رَحْمَةً لِلْعَالَمِينَ)

يدورله على أحاديث من بين ألاف الأحاديث إللي تكفر الدنيا والأخرة فيلاقي له حديث

(إنما بعثت لأتمم مكارم الأخلاق) ودة الحديث إللي كان بيستخدمه في الكتاب مهند خورشد أكتر من مرة

(إنما بعثت لأتمم مكارم الأخلاق) طب مكارم الأخلاق فيها سبي نساء في الحرب؟

دة إيه الأخلاق في كدة؟ إيه الأخلاق إنك تتشطر على واحدة ست لا بتحاربك

طب سيبها, طب أنت قتلت جوزها علشان جوزها محارب ماشي هي ذنبها إيه؟ سيبها وأمشي هي مش هتيجي تمسك سلاح وتحاربك يعني

تغتصبها لية؟ وتاخدها عبدة لية؟ وتبيعها لية في سوق العبيد لية؟

فين مكارم الأخلاق في كدة؟ فين مكارم الأخلاق لما تطلق واحده من جوزها ابنك بالتبني علشان عجبتك وتتجوزها إيه مكارم الأخلاق في كدة؟

بس هو أنت خد الكلام متسألنيش أطبق إزاي؟ ربنا أرسلك رحمة للعالمين يامحمد هو كدة متسألنيش عن التفاصيل

ماتدخلنيش في تفصايل يا مدحت, ماتدخلنيش في تفصايل هو ربنا قال إن هو رحمه للعالمين

أنت هتعرف أكتر من ربنا طيب رحمة للعالمين إديني أمثلة, إديني أمثلة

لو كان مات وكل قبائل اليهود موجودة في مكانها في المدينة والمسيحين زي ماهما وليهم كنايس في المدينة وفي مكة ومافيش أي مشكلة

وإن هو إللي عايز يعبد هوبل يعبده وإللي عايز يبقى مسلم يبقى مسلم وبتاع لكن دة دة بيقولك

أخرجوا المشركين من جزيرة العرب فين مكارم الأخلاق في كدة؟ فين الرحمة في كدة؟

فأنت بتاع الخطاب الديني إللي هايجي يجدد الخطاب الديني دة هايجيب منين؟

هايخلص الحديثين الحلوين في صلاتين جمعة ويمكن مايكملش صلاة جمعة واحده طب وبعد كدة؟ الأثنين وخمسين أسبوع في السنة

 الخمسين أسبوع الفاضلين في السنة هايجبلهم هايجبلهم أحاديث منين؟

ولا هايجي هو كل صلاة جمعة يقولهم بعثت لأتمم مكارم الأخلاق وما أرسلناك إلا رحمة للعالمين وكتب على نفسه الرحمة ويحبهم ويحبونه

طيب  خلصنا الخمس ست آيات الجمال في القرآن طب وبعدين؟ إيه المواد التانية إللي هتقدمه؟

طيب لما  يجي حد بقى يكلمه ياسيد ما رأي الدين في جنازة النصراني؟

هخش بقى هايقولك لا يجوز إنك تمشي في جنازته, واحد تاني إللي هو المتسامح أوي بقى من الناس الشيوخ

هايقولك صلي روح روح معاه الجنازة بتاعت النصراني بس إرجع أغتسل من الجنابة أنت كدة أرتكبت حاجة نجسة

أدي ياسيدي هادخله في التفاصيل لو سبت خطيب الجمعة لسانه يمشي معاك في الكلام وسألته بقى طب نعمل إيه مع المرأة؟

طب ما حكم المرأة إلا إذا تعطرت؟ طب ما حكم هتبص تلاقي نفسك دخلت في بتاع تاني

فهتلف وتدور القصة مش حكاية خطاب ديني القصة حكاية نظرة إلي الدين نظرة كلية شمولية إلى الدين

الدين دة يصلُح إن هو يقدملي إرشادات يومية في حياتي اليومية في القرن الحادي والعشرين في الدول الإسلامية أو في أوربا أو في  أمريكا أو في إستراليا؟

لأ ماعدش لإنه بيفكر بعقلية الصحراء بتاعت القرن السابع عقلية الغزو عقلية الحرب عقلية السبي

كان بيدور على سلام مجتمعي لمدينته هو في وسط الصحرا كام ألف واحد مجتمع صغير بدائي بسيط

 مايقدرش إنهاردة يجيلي أنا ويديني تعاليم وإرشادات يومية

فالقصة في حكاية الإسلام  من وجة نظري طبعًا إننا نبطل إننا نستخدم الإسلام القرآن كأنه دستور

والأحاديث كأنها مواد من القانون إننا نفصل الجانب الروحاني بتاع الدين عن الجانب التشريعي والجانب السياسي

نكتشف إنه في كل بلد في العالم يتم فيه تطبيق الشريعة الإسلامية تصبح بلد ديكتاتورية لا تفرق عن داعش

سواء السعودية سواء السودان سواء أفغانستان بند أتش  في إندونسيا بعض الأماكن في مالي

إللي هما بيطبقوا فيها الشريعة في الصومال يعني مش هتلاقي حتى فرق بين الحضارات المختلفة

كل مكان بتطبق فيه الشريعة بيبقى فيه كراهية وعنف وقتل وقطع أيدي وقطع رؤوس وجلد ورجم وكل حاجة الإنسانية بتكرها في الإسلام

فالقصة مش قصة سوء فهم للشريعة وإنما هي سوء فهم لعلاقة الإنسان بالدين

عايز تصلي صلي ماحدش هايحوشك حقك ولك الحرية في ذلك لكن ماتحملش الدين فوق طاقته

ماتستخدموش كامنول زي بتاع الجهاز كدة يعني ماتخفش من الحرية

ماتخافش من حرية إنتقاد الدين أو إنتقاد جوانب من الدين ودة هيكون موضوع حلقتنا إللي جاية

تابعونا على Hamed.TV  على اليوتيوب وعلى لBOXOFISLAM على الفيس بوك.


Download text file

Box of Islam 087

You may also like

ملخص تاريخ الاسلام بداية ونهاية
لم يستجب ياأخوة لمحمد في مكةخلال 13 سنة من الدعوة لم يستجب لدعوته لم [...]
6 views
ندوة للاستاذ حامد عبد الصمد في المغرب بعنوان التنوير فوبيا (الجزء الاول)
احمد عصيد: مساء الخير, يُسعدنا أن يكون معكم في هذا اللقاء الفكري الذي [...]
3 views
مين اللى سرق مصر،الحلقه التاسعة عشر: دور العبادة في مصر
مين اللي سرق مصر مين اللي سرق مصر مين اللي سرق مصر مين اللي سرق مصر [...]
0 views
مين اللى سرق مصر، الحلقة الثامنة عشر: إسلام التصدير وإسلام التكفير
مين اللي سرق مصر مين اللي سرق مصر مين اللي سرق مصر مين اللي سرق مصر [...]
0 views
مين اللى سرق مصر، الحلقة السابعة عشر: الأزهر عامل زي سُوستة
مين اللي سرق مصر مين اللي سرق مصر مين اللي سرق مصر مين اللي سرق مصر [...]
0 views
مين اللى سرق مصر، الحلقة السادسة عشر: مأساة التعليم في مصر
مين اللي سرق مصر مين اللي سرق مصر مين اللي سرق مصر مين اللي سرق مصر [...]
0 views
مين اللى سرق مصر، الحلقة الخامسة عشر: خليك فاكر مصر جميلة
مين اللي سرق مصر مين اللي سرق مصر مين اللي سرق مصر مين اللي سرق مصر [...]
0 views
مين اللى سرق مصر، الحلقة الرابعة عشر: الإعجاز العلمي في البناء المصري الحديث.
انهارده عايز اكلمكم عن موضوع الإعجاز العلمي في البناء المصري طبعًا [...]
0 views
مين اللي سرق مصر، الحلقه الثانية عشر، البرفان والشعب القرفان
مين اللي سرق مصر مين اللي سرق مصر مين اللي سرق مصر مين اللي سرق مصر [...]
2 views
مين اللي سرق مصر، االحلقة الحادية عشر ، أولاد حارتنا
مين اللي سرق مصر مين اللي سرق مصر مين اللي سرق مصر مين اللي سرق مصر [...]
0 views

Page 1 of 13

اترك تعليقاً

لن يتم نشر عنوان بريدك الإلكتروني.