صندوق الاسلام 73 : متناقضات القرآن : المرأة في القرآن

أهلاً بيكم في حلقة جديدة من صندوق الإسلام

هانتكلم انهاردة عن المرأة في القرآن

وهنلاحظ إن نفس الخط

خط التناقض ماشي برضو في التعامل مع المرأة في القرآن

زي اليهود زي المسيحين زي الحرب والسلام

هاتلاقي برضو آيات جميلة جدًا عن المرأة وعن وضعها وعن احترامها

وهتلاقي آيات بتشتم وبتحقر من المرأة وبتعتبرها كأداة وتبيح العنف ضدها

وكأن القرآن متعاقد على ، ماضي كده إن لازم كل حاجة ، لازم الحاجة وعكسها

في كل شيء لازم الشيء وضده

في حوارات كتيرة بتدور اليومين دول سواء في المجتمعات الإسلامية أو في الغرب عن دور المرأة في الإسلام

وهل الإسلام  هو السبب واضطهاد المرأة ؟

ومش ممكن تكون الموضوع هو العادات والتقاليد والوضع الإجتماعي والتعليم و و و إلى آخره

طبعًا كل الحاجات دي بتلعب دور أكيد

لكن احنا لما بنتكلم عن عادات وتقاليد ووضع اجتماعي واقتصادي وسياسي

هو الدين مش بيلعب دور في الحاجات دي ؟

يعني الدين مابيلعبش دور في الحضارة والثقافة وفي العادات والتقاليد ؟

دا يعني الدين أكتر حاجة بتشكل وجدان شعوبنا

وبتأثر في كل حاجة فيها

وفي التربية بالذات يعني

وفي دور المرأة بالذات

الدين له عامل اساسي

تعالوا نشوف القرآن بيقول إيه عن المرأة

وتعالوا نفك رموز التناقض الموجود دا

أول حاجة الآية اللي ذكرناها قبل كده

يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَىٰ وَجَعَلْنَاكُمْ شُعُوبًا وَقَبَائِلَ لِتَعَارَفُوا ۚ إِنَّ أَكْرَمَكُمْ عِندَ اللَّهِ أَتْقَاكُمْ ۚ ( سورة الحجرات الآية 13 )

يقولك حاطط الذكر والانثى نفس المكانة مافيش تفرقة

يقولك في آية تانية

إن المسلمين

يعني بيخاطب المرأة والرجل بندية

مابيكلمش رجالة بس القرآن

دا بيكلم الرجالة والستات

إِنَّ الْمُسْلِمِينَ وَالْمُسْلِمَاتِ وَالْمُؤْمِنِينَ وَالْمُؤْمِنَاتِ وَالْقَانِتِينَ وَالْقَانِتَاتِ وَالصَّادِقِينَ وَالصَّادِقَاتِ وَالصَّابِرِينَ وَالصَّابِرَاتِ وَالْخَاشِعِينَ وَالْخَاشِعَاتِ وَالْمُتَصَدِّقِينَ وَالْمُتَصَدِّقَاتِ وَالصَّائِمِينَ وَالصَّائِمَاتِ وَالْحَافِظِينَ فُرُوجَهُمْ وَالْحَافِظَاتِ وَالذَّاكِرِينَ اللَّهَ كَثِيرًا وَالذَّاكِرَاتِ أَعَدَّ اللَّهُ لَهُم مَّغْفِرَةً وَأَجْرًا عَظِيمًا  ( سورة الأحزاب الآية 35 )

اعجاز بلاغي الآية دي

من الآيات اللي تحتاج تتنفس كده بتاع 3 4 مرات عشان تخلصها

بس اهو بيكلم الرجالة والستات

ربنا بيخاطبهم مباشرًا

مابيقولش للرجالة قولوا لستاتكوا كذا

لأ دا لازم يكون في تكريم كبير جدًا

وآية تانية ذكرناها تانية قبل كده في سياق المسيحين وتكريم مريم في القرآن والكلام دا كله

إن هو لما ربنا بيضرب في القرآن مثل للي كفروا وللآمنوا مابيخترش رجالة

دا بيختار 4 ستات عشان يديهم مثل 2 للي كفروا و2 للآمانوا

الاتنين اللي كفروا امرأة نوح وامرأة لوط

كانوا متجوزين انبياء ومع ذلك كفروا

ومع ذلك كان عندهم استقلالية في القرار إن هما مآمنوش وكفروا

وكان في اتنين امرأة فرعون اللي هي يعني في بيت الطاغية ومع ذلك كان عندها استقلالية قرار وإن هي قدرت إن هي تؤمن

والمثال الرابع مريم ابنتَ عمران إن هي بسبب إيمانها وإنها احصنت فرجها

فا ربنا كرمها بإنه نفخ فيه من روحه

يعني أكبر تقديس أهو ، في إيه

عايز إيه أكتر من كده

المرأة ربنا حاططها كمثال للمؤمنين وبيقول مش الراجل اللي بيأثر عليها

لو هي عندها حرية الاختيار ممكن تكفر وممكن تؤمن حتى لو جوزها كذا

لو انت فهمت السياق الآية جاية منين اصلًا

هاتعرف إن الموضوع مش تكريم ولا حاجة

كان فيه لما محمد ابتدى يتجوز كتير

ابتدى يحصل مؤامرات داخل بيته ضده

فا هو بيدي النساء بتوعه اللي ابتدوا يعملوا مؤامرات ضد نساء تانين و ضده

ابتدى يديهم اشارات خلوا بالك مش معني انتوا متجوزين نبي إن انتوا تخشوا الجنة

إن انتم تخشوا الجنة

فا افتكروا امرأة نوح وامرأة لوط اللي كانوا متجوزين انبياء ومأغنوش عنه من الله شيئًا وكفروا ودخلوا جهنم

فا بيهدد النسوان بتوعه هو بهذه القصص

مش التكريم اللي هو بهذه الصورة اللي بيشرحوه لينا بعض الجماعة ، الشيوخ المودرن

آه موجود في القرآن تحريم وأد البنات

عادة كانت موجودة عند بعض القبائل

في ناس بتبالغ وبتقول إن كل القبائل العربية لما كان يجيله بنت كان ياخدها ويدفنها

طبعًا كلام فارغ

لو دا حصل كان هايبقى المفروض الجيل بتاع محمد مافيهوش ولا واحدة ست

لكن ماشاء الله كل واحد كان بيتجوز بال4 وال5 ومحمد اتجوز 13 دا غير ملك اليمين والجواري والسبايا والعبيد

جم منين كل دول إذا كان أب بتتولد البنت بيروح يدفنها

كان في بعض القبائل والظاهرة مرصودة بس نادرة يعني

بس برضو شيء كويس إنه يقول طبعًا بطلوا الحاجات دي

بس ماتكبرش الظاهرة وتعملها كأنه هو جه بقى عمل كل حاجة

آه كان فيه شؤم من الانثى وناس مابيحبوش

ولحد انهاردة برضو الظاهرة دي موجودة رغم الإسلام برضو على فكرة يعني

يعني بقى بينتقد هذا الكلام

وَإِذَا بُشِّرَ أَحَدُهُم بِالْأُنثَىٰ ظَلَّ وَجْهُهُ مُسْوَدًّا وَهُوَ كَظِيمٌ ( سورة النحل الآية 58 )

يعني وشه بيسود عشان جاتله أنثى

وَيَجْعَلُونَ لِلَّهِ الْبَنَاتِ سُبْحَانَهُ ۙ وَلَهُم مَّا يَشْتَهُونَ وَإِذَا بُشِّرَ أَحَدُهُم بِالْأُنثَىٰ ظَلَّ وَجْهُهُ مُسْوَدًّا وَهُوَ كَظِيمٌ يَتَوَارَىٰ مِنَ الْقَوْمِ مِن سُوءِ مَا بُشِّرَ بِهِ ۚ أَيُمْسِكُهُ عَلَىٰ هُونٍ أَمْ يَدُسُّهُ فِي التُّرَابِ ۗ أَلَا سَاءَ مَا يَحْكُمُونَ    ( سورة النحل الآيات 57-58-59 )

لِّلَّهِ مُلْكُ السَّمَاوَاتِ وَالْأَرْضِ ۚ يَخْلُقُ مَا يَشَاءُ ۚ يَهَبُ لِمَن يَشَاءُ إِنَاثًا وَيَهَبُ لِمَن يَشَاءُ الذُّكُورَ  ( سورة الشورى الآية 49 )

برضو كلام ماشي كويس

في الميراث السردية الإسلامية بيقولك إن الستات ماكنوش بيورثوا والنبي هو أول واحد شرعلهم نص الميراث

لِّلرِّجَالِ نَصِيبٌ مِّمَّا تَرَكَ الْوَالِدَانِ وَالْأَقْرَبُونَ وَلِلنِّسَاءِ نَصِيبٌ مِّمَّا تَرَكَ الْوَالِدَانِ وَالْأَقْرَبُونَ مِمَّا قَلَّ مِنْهُ أَوْ كَثُرَ ۚ نَصِيبًا مَّفْرُوضًا  ( سورة النساء الآية 7 )

وبعد كده : يُوصِيكُمُ اللَّهُ فِي أَوْلَادِكُمْ ۖ لِلذَّكَرِ مِثْلُ حَظِّ الْأُنثَيَيْنِ ۚ ( سورة النساء الآية 11 )

اللي بيدافعوا عن الإسلام هايقولك دا نص الميراث بالنسبة للمرأة دا انجاز كبير جدًا لأن ماكانتش بتورث قبل الإسلام وماكنش ليها أي حق في الميراث

طب مش ياخوانا ماهو انتوا للي بتحكولنا في السيرة إن خديجة قبل الإسلام ورثت أد كده من جوزها الأولاني  يعني جوزها اللي مات

يعني كانت وارثة ، كان عندها فلوس

امال جابت منين الورث دا

لما كانت الموضوع بالسهولة دي

الفلوس دي كانت معاها منين

دي كانت مشغلة محمد عندها

كان بيشتغل عندها

كانت هي اللي بتنفق عليه

جابت دا منين إذا ماكنتش هي واثة

يبقى الكلام دا مش مظبوط يعني

هي تشريعة وخلاص

طب ماهو نفس القرآن اللي عمال يكرم وعمال يجيب أمثلة جميلة جدًا

والمرأة شبة مقدسة

مريم وامرأة فرعون

نفس القرآن هو اللي بيقول وهاتلاقيها في سورة النساء

الرِّجَالُ قَوَّامُونَ عَلَى النِّسَاءِ بِمَا فَضَّلَ اللَّهُ بَعْضَهُمْ عَلَىٰ بَعْضٍ وَبِمَا أَنفَقُوا مِنْ أَمْوَالِهِمْ ۚ ( سورة النساء الآية 34 )

يبقى القوامة للرجل ليه ؟

لأنه بينفق على بيته

إذًا كده خديجة كان المفروض هي اللي أقوى من محمد صح ؟

فكرت في الموضوع دا قبل كده ؟

يبقى خديجة كان ليها قوامة على الرسول بتاعك

مادام الموضوع مجرد المصاريف

هي اللي كانت بتصرف وهي اللي كان معاها الفلوس

يبقى تقدر انت تقول إن في وقت من الأوقات النبي بتاعك ماكنش عنده قوامة وكانت امرأة هي اللي عندنا القوامة عليه ؟

فكر فيها شوية دي

مزعجة فعلًا الفكرة

مجرد اللي معاه فلوس يبقى هو دا الأساس في القوامة يعني ؟

وفي نفس الآية بتاعة القوامة دي

اسمع عشان متزعلش في الكلام فكر فيه

عشان له القوامة يبقى من حقه إيه ؟

الرِّجَالُ قَوَّامُونَ عَلَى النِّسَاءِ بِمَا فَضَّلَ اللَّهُ بَعْضَهُمْ عَلَىٰ بَعْضٍ وَبِمَا أَنفَقُوا مِنْ أَمْوَالِهِمْ ۚ فَالصَّالِحَاتُ قَانِتَاتٌ حَافِظَاتٌ لِّلْغَيْبِ بِمَا حَفِظَ اللَّهُ ۚ وَاللَّاتِي تَخَافُونَ نُشُوزَهُنَّ فَعِظُوهُنَّ وَاهْجُرُوهُنَّ فِي الْمَضَاجِعِ وَاضْرِبُوهُنَّ ۖ فَإِنْ أَطَعْنَكُمْ فَلَا تَبْغُوا عَلَيْهِنَّ سَبِيلًا ۗ إِنَّ اللَّهَ كَانَ عَلِيًّا كَبِيرًا  ( سورة النساء الآية 34 )

إذًا القوامة معناها مراتك لو زعلت أو نشزت في شيء من حقك إن انت تقومها بمراحل التلاتة

الوعظ ، تتركها في الفراش ، أو تديها بالقلم أو يعني تضربها

تضربها وخلاص

هل دا معناه إن خديجة كان ليها الحق في إنها تضرب محمد ؟

ماهي كانت بتصرف عليه

فكرت في الموضوع دا قبل كده ؟

لمجرد إن حد يبقى بيصرف على بيته دا يديه الحق إنه يقوم بالضرب يبىق دا بيدي الحق إنك تضرب الأطفال

هل دا يبقى هو الشيء ؟ عشان معاك فلوس فا تضرب ؟

يبقى كده صاحب العمل هو يضرب مرؤوسيه بقى

ما هو اللي بيصرف عليهم  ، ما هو اللي مشغلهم

هو اللي فاتح بيوتهم ، مش هانخلص

يبقى أي حد ماديًا يعني تعتمد عليه يديك بالقلم ويديك بالشلوت خلاص بقى فتحت العملية

إذا مفهوم القوامة دا مفهوم فاشل جدًا

ماينفعش إن انت تعلم حاجة على أساس مين بيصرف ومين مابيصرفش

إيه قصة الآية بتاعة ضرب الزوجة دي

كان في ست ، والكلام من تفسير الطبري

راحت لمحمد وقالته زوجي ضربني وروتله اثار الضرب على وشها

سايب اثار ، ضربه قوية كانت

فا محمد أحيانًا كانت بتطلع منه حاجات تلقائية وبعدين يدرك مشاكلها بعدين

فا قالها من حقك تروحي تضربي

من حقك تروحي تضربي مالوش حق يعمل كده

فا الست وهي ماشية محمد افتكر إن دا هايفتح عليه بوابات جهنم في الناس بتوعه

يانهار اسود دانا لو سمحت للستات إنهم يضربوا أزواجهم عشان ضربوهم هاتبوظ الcommunity خالص مني والرجالة هايجوا يردحولي هنا

فا قالها لا لا تعالي تعالي الوحي نزل عليا

الوحي نزل عليه وغير الموضوع وراح نازلة الآية دي بقى

نازلة

تقول بقى لأ ، مادام قوامون على النساء ومن حقهم إن هما يضربوها بس مش المفروض أول حاجة تكون الضرب يعني

خليها في تالت مرحلة

وكدة يبقى القرآن كريم جدًا

أنا كنت في سنة 2009 في حوار تليفزيوني في ألمانيا مع راجل محترم

أنا شخصيًا شايف إنه راجل محترم

بروفيسور جميل جدًا من أصل أفغاني

متخصص دراسات إسلامية وفلسفة إسلامية وراجل عقلاني جدًا

احنا قاعدين في الأستوديو والمذيعة يعني هي يسارية

Feminist ألمانية بتسألنا عن الآية دي

أنا بمنتهي الوضوع يعني قولت حتى لو ربنا قال الكلام دا

غير ملزم بالنسبالي وغلط وخلصنا

الراجل دا عشان هو بقى إيه استاذ عقيدة وفلسفة ومش عارف إيه

عمال يلف ويدور ولأ وهو ربنا صعب الطريق على الراجل إن هو يضرب وقال في الأول اعمل كذا واعمل كذا عشان في الآخر والسواك ونخش في الحواديت دي كلها

يا عم دا أنت أستاذ في الجامعة

دا أنت بتعلم الألمان

إيه اللي يدخلك في الملقى دي وتخش في دماغ ربنا بقى دا كان إيه وبيصعبها عليه ومش قصدة ولأ ومايضربهاش اوي

ياعم قول الضرب غلط ويعتبر امتهان واحتقار للمرأة نقطة

بتلفوا على بعض ليه في النقطة دي بالذات

أنا أحيي سيد القمني لما قال أنا اكفر بتأديب المرأة

مش موافق على الآية دي

مش موافق على أي آية تمتهن المرأة وتسلب حقوقها

مش موافق على أي آية بتعتبر المرأة جارية بتشتريها بفلوسك

مش موافق على أي آية بتوافق على سبي المرأة في الحرب وتبقى مما أفاء الله وما ملكت أيمانك والكلام الفارغ دا

إيه المشكلة في كده

يا مسلم يا متدين يا متحضر ياللي اانت عايز تبقى جزء من البشرية

طب ما إيه المشكلة ؟

ما تقول أنا ارفض هذا تمامًا سواء بقى موجود في القرآن أو مش موجود في القرآن

بس هنا الأزمة بقى ، القرآن يعني كلام ربنا يعني ماينفعش يكون فيه حاجات غلط  ، ماينفعش يكون فيه مشينة

لأ في حاجات مشينة

أي حاجة ليها علاقة بالعنف وضرب الرقاب والسبي مشينة

ولابد أن ترفضها

هاتفضل تقول لأ وتبرر وتلف وتدور

الموضوع دا دايمًا

أنا ملاحظ تواطئ ما بين 3 فئات

الفئة الأولى الإسلاميين ، بياخدوا الآيات دي

يعني أول فئة هي الأزهر والمؤسسات الدينية والجوامع

ياخدوا ده يدرسوه زي ما هو بدون أي انتقاد

الضرب السبي العبودية

يجي داعش تاخد دا وتبطبقة ، تقتل تسبي تغتصب

ويجي المسلم الوسطي يبرر

انتوا التلاتة شركة

ماعرفش غير كده

انتوا التلاتة شركة

إيه مشكلتك إنك تقف عند آية وتقول واللهي أنا ارفض هذا الشيء

سواء بقى ربنا قال  ، ماقالشي ماعرفش

عشان نعيش

في شيء بيؤدي إلى شيء بيؤدي إلى شيء

يعني إنت أول ما تعتبر إن المرأة

نِسَاؤُكُمْ حَرْثٌ لَّكُمْ فَأْتُوا حَرْثَكُمْ أَنَّىٰ شِئْتُمْ ۖ ( سورة البقرة الآية 223 )

يعني إيه تحت تصرفكم ، الخطوة اللي بعد كده إنت المرأة بتشتريها بفلوسك تتجوزها

الشيء اللي بعد كده من حقك تحبسها في البيت وتأدبها وتحطها و الحجاب بقى والحواديت دي كلها

ومادام بقت هي تحت تصرفك من حقك بقى تعمل معاها أي حاجة

تضربها ، تشتريها ، تبيعها

بس هايقولك في الجواز آه شوف الآية الجميلة بتاعة الجواز اللي دايمًا على الدعوات بتاعة الأفراح كده  نادي الشرطة كده

لما تجيلك الدعوة كده فلان الفلاني على كريمته وهايتجوز مش عارف إيه كده

والآية اللي في النص كده

وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِّقَوْمٍ يَتَفَكَّرُونَ (سورة الروم الآية 21 )

فا دا تكريم طبعًا للمرأة

يقولك دا الإسلام كرم المرأة وسمى سورة كاملة على اسمها سورة النساء

ياسلام لما تيجي سورة على اسم حد تبقى بتكرمه ؟

على كده يبقى الإسلام كرم البقرة وكرم العنكبوت والنحل والنمل والمنافقون والكافرون كل دول اتكرموا في القرآن

والروم ، الروم متكرمين في القرآن

المطففين

كرم الحطمة ولا اسمها إيه الجاثية كل أسماء النار

كل دا تكريم ، والقارعة

مافيش تكريم على اسم سورة

دا سورة النساء دي أكتر سورة في امتهان

اللي هي فيها الآية بتاعة الضرب وبتاعة

في آية في سورة النساء الآية 24 من سورة النساء

لو فكرت فيها شوية وقريت التفاسير بقى ، ابن كثير وغيره  وغيره

اللي هو بيقولك انتوا اتحرم عليكوا إيه ، انتوا محرم عليكوا إيه

حُرِّمَتْ عَلَيْكُمْ أُمَّهَاتُكُمْ وَبَنَاتُكُمْ وَأَخَوَاتُكُمْ وَعَمَّاتُكُمْ وَخَالَاتُكُمْ  ( إلى آخر الآية  وبعدين يقولك يعني من ضمن اللي اتحر عليكم ) وَالْمُحْصَنَاتُ مِنَ النِّسَاءِ ( سورة النساء الآية 23 -24 )

يعني لو امرأة متزوجة انت ممنوع عليك إنك تتزوجها

اتحرمت عليك أو طبعًا إنك تنام معاها

إِلَّا مَا مَلَكَتْ أَيْمَانُكُمْ

مش محصنة ، محصنة هي ، يعني متجوزة واحد تاني وانت سابتها في الحرب ماتفرقش

من حقك

يعني في تشريع إلهي أهو عشان اللي بيقولك موضوع صفية ماحصلش وبتاع

الآية اللي بتشرعلها الآية 24 من سورة النساء واقرأ تفسير ابن كثير

المحصنات من النساء ممنوع إنك تتجوزهم أو إنك تنام معاهم إلا ما ملكت أيمانكم

لو إنت سبيتها في الحرب وهي متجوزة أو مش متجوزة في نفس الليلة مافيش أي مشكلة

زي محمد ماعمل مع صفية بالظبط

إذا لما تيجي تقرأ إنت قصة صفية بالظبط وتقول أصل دا مش موجود في القرآن لأ موجود أهو

ومش لمحمد بس

دا تشريع ، ربنا بيقولك إنت ممكن تاخد واحدة متجوزة مادام سابيتها في الحرب وتنام معاها

دا تكريم للمرأة ؟

هي دي مش مرأة ؟

مش امتهان دا ؟

ليه ماتقفش عند دي وتقول أرفض هذا الشيء

إنت بتقول لأ دا كتاب ربنا وصالح لكل زمان ومكان

إنت بتباصي الكورة لداعش هو الجول

على طول هاياخد دا وهايطبقه مع اليزيديات ومع المسيحيات وهايعمل البلاوي اللي بيعملها دي كلها عشان انت مصمم إن دا كلام ربنا وصالح لكل زمان ومكان

إنت تاخد الكورة من ملعبه بقى وتقول لأ أنا مش موافق على الكلام دا

لو عايز تقول داعش لا تمثل الإسلام قول على الأقل دا لا تمثلني أنا

أنا ارفض هذا الشيء

لكن تمثل الإسلام جدًا وبالنص أهو

القرآن ليه موقف من الجنس والزنا هانتطرق له في الحلقة اللي جاية

نتكلم شوية عن ليه القرآن مركز آيات عن موضوع الزنا وعن موضوع رمي المحصنات

وليه مفرغ آيات يتكلم فيها عن غض البصر وعن إن المرأة تكون محصنة و الحجاب

ووقرن في بيتكن ولا تبرجن تبرج الجاهلية الأولى

دا جاي منين ؟

هل هي فعلًا نظرة أخلاقية للنبي إنه هو حب إن هو يقوم مجتمعه أخلاقيًا

أم إن هو كان  ردة فعل على حاجات حصلت داخل community بتاعه من علاقات معينة

وردة فعل على نساءه هو اللي اتهموا كما يسمون يعني بالإفك

مرة عائشة  ومرة ماريا القبطية

وإن الصراعات دي يعني وعدم ثقته هي اللي أدت إلى كل التشريعات اللي ليها علاقة بالحجاب والزنا وما إلى ذلك

نراكم في الحلقة القادمة


Download text file

Box of Islam 073

You may also like

حامد عبد الصمد -  التمييز والعنصرية في الإسلام
 [00:00:04] حامد عبد الصمد: أهلا بكم أصدقائي الأعزاء في حلقة جديدة من [...]
0 views
ملخص تاريخ الاسلام بداية ونهاية
لم يستجب ياأخوة لمحمد في مكةخلال 13 سنة من الدعوة لم يستجب لدعوته لم [...]
20 views
ندوة للاستاذ حامد عبد الصمد في المغرب بعنوان التنوير فوبيا (الجزء الاول)
احمد عصيد: مساء الخير, يُسعدنا أن يكون معكم في هذا اللقاء الفكري الذي [...]
18 views
مين اللى سرق مصر،الحلقه التاسعة عشر: دور العبادة في مصر
مين اللي سرق مصر مين اللي سرق مصر مين اللي سرق مصر مين اللي سرق مصر [...]
7 views
مين اللى سرق مصر، الحلقة الثامنة عشر: إسلام التصدير وإسلام التكفير
مين اللي سرق مصر مين اللي سرق مصر مين اللي سرق مصر مين اللي سرق مصر [...]
2 views
مين اللى سرق مصر، الحلقة السابعة عشر: الأزهر عامل زي سُوستة
مين اللي سرق مصر مين اللي سرق مصر مين اللي سرق مصر مين اللي سرق مصر [...]
4 views
مين اللى سرق مصر، الحلقة السادسة عشر: مأساة التعليم في مصر
مين اللي سرق مصر مين اللي سرق مصر مين اللي سرق مصر مين اللي سرق مصر [...]
4 views
مين اللى سرق مصر، الحلقة الخامسة عشر: خليك فاكر مصر جميلة
مين اللي سرق مصر مين اللي سرق مصر مين اللي سرق مصر مين اللي سرق مصر [...]
7 views
مين اللى سرق مصر، الحلقة الرابعة عشر: الإعجاز العلمي في البناء المصري الحديث.
انهارده عايز اكلمكم عن موضوع الإعجاز العلمي في البناء المصري طبعًا [...]
6 views
مين اللي سرق مصر، الحلقه الثانية عشر، البرفان والشعب القرفان
مين اللي سرق مصر مين اللي سرق مصر مين اللي سرق مصر مين اللي سرق مصر [...]
3 views

Page 1 of 14

اترك تعليقاً