سؤال جريء 484 الغرب والإسلام؟

رشيد: مشاهدينا الكرام ارحب بيكم في حلقة جديدة من حلقات سؤال جرء, حلقة اليلية بعنوان الغرب والإسلام

في الغرب توجد مساجد في كل بلد, توجد مراكز للدعوة ويخرج الدعاة للشوارع والأزقة وأمام الكنائس وفي الساحات العامة, بعض الدعاة لا يشتغل, حتى الشغل ويخصص وقته للدعوة وياخد اموالًا  من دافع الضرائب ليدعو إلى دينه, في نفس الوقت تجد شبابًا يعيش في الغرب, أقصد بعض الشباب المسلمين يعشون في الغرب ويسبون هذا الغرب ويلعنون ويتمنون  أن يأتي اليوم الذي يحكمونه ويسبون نسائه, بعضهم ينادون بتطبيق الشريعة, والنقاب والحجاب.. إلى آخرة

وبس خطاب الكراهية ضد من يسميهم الكفار,  في ظل كل هذا يتسأل المرء ماذا يحدث في الدول الغربية؟ هل حقًا يفهم الغرب الإسلام؟ هل يدرك مدى خطورته؟ الدعاة والإسلاميون يستغلون القوانين الغربية والديموقراطية والحرية لضرب الغرب من الداخل, لكن هذا الغرب تحسة وكأنة يعيش في سُبات

هل يفهمون و لكن لايستطيعون تحريك ساكن لأن هناك مصالح إقتصادية وسياسية؟ هل إنخدع الغرب في  صورة الإسلام ( الإسلام light) التي يروج لها البعض في الإسلام؟ هل هناك إسلام فوبيا في الغرب أم إنها وسيلة آخرى من وسأئل إسكات الأصوات المعارضة وقمعها؟

ما موقف اليسار من الإسلام؟ وما موقف اليمين في البلدان الغربية من الإسلام؟ هل الغرب يعيد الآن حساباته تجاة الإسلام والمسلمين؟

أسئلة كثيرة سانطرحها في هذة الحلقة على الباحث والكاتب الأستاذ حامد عبد الصمد, أهلًا ومرحبًا بيك مرة آخرى.

ح ع: أهلًا بيك

رشيد: أنا مش فاهم والكثير من المشاهدين مثلي مش فاهمين, حضرتك كاتب ومحلل وتعاملت مع البلدان الاوربية كلها وحتى أمريكا واماكن كتيرة وناقشت وكان عندك مناظرات هل الغرب يفهم الإسلام؟

ح ع: طبعًا في البداية مفيش كتلة موحدة اسمها الغرب علشان نعرف منها أن في واحد اسمه الغرب لأن دا تصور إسلامي شوية, أن الغرب دا راجل بيقوم من النوم الصبح يغسل وشه وبعدين يقول إيه تعالى نضايق المُسلمين شوية, أهلاُ ياغرب ممكن اكلم الغرب؟ اكلم مين  لما احب اكلم الغرب؟

الغرب مش كتلة واحدة, دول لها مصالح, دول لها تاريخ ليه علاقة مع الإسلام, إحنا دايما لما بنقرا تاريخنا مع الغرب بنقراه من وجة نظرنا  الإسلامية بس.

فا بنفتكر حروبنا الصلبية, وبنفتكر الاستعمار وبيوقف التاريخ عند كدة, الغرب ليه مأساة تاني مع الإسلام, يعني أول من هاجم هو الإسلام مش الغرب, إللي ما يسمى بالفتوحات الإسلامية.

الإسلام إحتل ثلثي العالم المسيحي القديم ونشر فيه الإسلام بالحرب, دي حاجة  يعني لما بتيجي تقرا التاريخ محدش بيدعم هذة وجة النظر أن الإسلام بدء بالعنف.

رشيد: يعني  كان هو المبادر؟

ح ع: هو إللي بدء بإحتلال سوريا و إحتلال مصر, وإحتلال شمال أفريقيا, وإحتلال حتى القسطنطينية نفسها إللي هي عاصمة الدولة المسيحية الشرقية, كل دا قبل ما يجي هجوم واحد على الدول الإسلامية أو المناطق الإسلامية.

جية بعد كدة موجة  إللي هي الحروب الصليبية  ما يسمى بالحروب الصليبية يعني, إحنا كنا بنسميها حروب الفرنجة بس في العصر الحديث إبتدينا نسميها الحروب الصليبية  علشان نحط النزعة الدينية عليها

لكن هي كانت ردة فعل على الحركات, التوسعات, على مهاجمة القسطنطينية ومنع الحجاج المسيحين أن هما يجوا يحجوا في القدس, فامن وجة نظرهم الإسلام هو إللي بدأ بالهجوم , من وجة نظرهم الحرب المقدسة الإسلام هو إللي بدأ بيها

رشيد: لكن من وجة نظر المسلمين, إحنا نهجم على دول ثانية دي فتوحات.

ح ع: فتح من الله ونصر مُبين.

رشيد: فتح من الله ماتتكلمش عنها لكن هما يقوموا برد الفعل لا دي حروب صليبية واستعمار ومش عارف إيه لما ينظروا للغرب الكافر, حلالً علينا وحرام عليهم بإختصار.

ح ع: شوف أنت أصلًا وصل فين الإسلام لحد الاندلس, لحد حدود فرنسا, احتل صقلية

رشيد: حتى فِييَنَّا

ح ع: اه دا دي بعديها, ما أنا بتكلم موجات, في موجة الفتوحات الأولى رد عليها حملات الفرنجة وبعد كدة جات الموجة بتاعة العثمانيين, العثمانيين هم إللي بدأوا الاستعمار هما إللي إبتدوا يستعمروا بلقان وهاجموا على القسطنطينية ووصلوا لحد فِييَنَّا, وبعدين ردًا على دة جية الاستعمار ما يسمى بالاستعمار إللي هو الاحتلال الدول الإسلامية وكدة

بس محدش من المستعمرين دول حول الناس لمسيحين, محدش اجبرهم يغيروا دينهم للإسلام, كانوا بيستغلوهم اقتصاديًا وسياسيًا مفيش شك في كدة, لكن في الوقت نفسة كان في هَجمات بتحصل برضو من شمال افريقيا والقراصنة.

دلوقتي الموجة الأخيرة بقى من صراعات الشرق والغرب إللي هي موجة إيه بقى؟ حرب العصابات, هتلاقيها على شكل ارهاب, هتلاقيها على شكل عصابات في اوروبا من المهاجرين إللي هما بيعملوا حركات يولوعوا في الشوارع و.. و إلى أخرة

وموجة احتلال بالديموغرافيا إللي هو بقى إيه؟ احتلال المواليد يعني روح اروروبا اروح الغرب أخلف, أخلف أكترمنهم كدة كدة أنت عايش بالمعونات الإجتماعية, خلف أكترمنهم.

بس طبعًا علشان  برضو الإنصاف لازم نقول أن في مسلمين كتير عايشين في الغرب ناس جادين, كادحين وبيشتغلوا وبيبذلوا مجهود علشان يوفروا لأبنائهم حياة كريمة, ولكن في مسلمين تانيين بينغصوا عليهم عيشتهم. مش الغرب بقى هو إللي بيكرهوم, لكن إللي بيعملوا المسلمين نفسهم في الغرب أو بعض المسلمين في الغرب هو إللي خلى الصورة مشوهة ومش مجرد صورة مشوهة هي حياة كاملة مشوهة ودة بيخلي طبعًا ردود الافعال من ناحية الغرب  زي ما أنت قولت في المقدمة لو بيكرهوا الإسلام أو حاقدين على الإسلام ويُرِيدُونَ لِيُطْفِئُوا نُورَ اللَّهِ بِأَفْوَاهِهِمْ, زي مادايمًا

رشيد: الاسطوانة

ح ع: كانت المانيا خدت مليون لاجىء في سنة واحدة, عارف تكلفتهم المليون لاجىء دول, مفيش ولا واحد عندة وظيفة دلوقتي قاعدين بقالهم سنة ونص بياكلوا وبيشربوا وتأمين صحي على حساب المانيا, يعني مبالغ ماتتخيلهاش يعني, فوق الخمسين مليار يورو علشان سنة واحدة

رشيد: ياااا

ح ع: فأنت تخيل بقى إمتى دول هايبقى ليهم وظايف وحاجات

رشيد: دا دخل دوله دة

ح ع: أكتر من دخل المغرب ومصر مجتمعين في سنة.  فا طبعًا إللي بيكرة المسلمين هايخليهم يبنوا مساجد لية؟

أقرب مثال عندنا في المانيا مدينة اسمها مون هايم, العمدة بتاعتها عرض على المسلمين من نفسه 850 الف يورو بس السنة دي علشان يبنوا مسجد هو إللي دفعهم المدينة علشان يبنوا مسجد

رشيد: دافعلهم مبلغ كام 850 الف يورو علشان يبنوا مسجد

ح ع: وهما مجموعة صغيرة من المسلمين في هذة المدينة هي مدينة صغيرة مون هايم مش مان هايم

فا فين إللي بيكرة وفين إللي بيعمل, أمشي في أي عاصمة اوروبية هتلاقي مساجد

رسيد: دا في الدول الإسلامية ما بيقولوش أعطونا نبني, دا خلونا نبني. أو احموا الكنائس المبنية في بعض الاماكن مثل مصر, خليهم يرميموا ياسيدي بفلوسهم هما

ح ع: فا فكرة أن الغرب بيكرة دي طبعًا حاجة هي نابعة من عداء أنت إللي جواك بتسقطه على الغرب, لأن أنت بتقرا التاريخ, الغرب بطل يقرا التاريخ بهذا الشكل, أن الإسلام وجم وكانوا واقفين عند فِييَنَّا وكانوا بيخطفوا البنات الاوروبيات وبيعملوهم عبيد, خلاص قالوا خلاص المسلمين بتوع إنهاردة مش زي المسلمين بتوع زمان ونفتح صفحة جديدة

رشيد: لكن إحنا لسة عايشين أثارهذا ذلك

ح ع: التاريخ دا مقدس إحنا المشكلة عندنا مش بس القرأن مقدس والحديث مقدس والعلماء لحومهم مسمومة ومقدسين التاريخ كمان مقدس بنقرا دا مفيش تغيير فيه, الغرب لازم يفضل بنفس الروح من أيام هرقل الروم لحد ترامب لازم يبقى نفس الشكل عندنا, طب مكنش في اوباما يعني in between  إللي هو كان يعني حبيب المسلمين والإسلامين حتى؟ مكنش في ماركيل إللي كانت بتقول أن الإسلام جزء من المانيا ودعت الاجئين ضد رغبة شعباها؟

رشيد: لكن خليني أقول سؤال, مش حاسس أن وكأن الغرب مخدوع,أنا مش فاهم ناس كتير بيقولولي دول مابيفهموش دول مش عارفين مثلًا مسيحي مطرود من سوريا أو مسيحي مُهجرمن مصر أو مسيحي أخدوا داره من الموصل, يجي يقول دول مش فاهمين مش عارفين دول بيعملوا في بلدهم إيه؟ اه المسلمين على راسي وعيني وخليهم يبنوا مساجد بس الحرية الُمطلقة ممكن تدمر الغرب مش فاهمين؟!

ح ع: ما هما أبتدوا يفهموا, يعني كان في شىء من السذاجة أو من الا مُبَالاة كان في لا مُبَالاة أن المهاجرين جايين يشتغلوا في اعمال بسيطة وبتاع وسيبهم وبيخدموا الإقتصاد شوية, لكن حصل أن العمالة الغير مؤهلة ماعدش حد محتاجاها دلوقتي في اوروبا لأن الإقتصادات أتغيرت من الصناعات الثقيلة إلى الصناعات الحرفية التقنية إللي محتاجة عامل يعرف يقعد على كومبيوتر يفهم اللغة يعرف يسوق ماعدش الإقتصاد بتاع مصانع الحديد دا خلص

فا دة طبعًا سبب أول حاجة إقتصاديًا بقى في بطالة كبيرة بين الجالية الإسلامية, النقطة إللي بعد كدة أن فهمُهم أن إحنا عندنا في اوروبا في تنوير وفي تسامح وفي حرية كلة زي بعضة زي ما بنسمح للمسيحين أنهم يبنوا كنايس ويدعو أو البوذيين نسمح للمسلمين, وهو مفكر أن كدة مساوة وحرية, هو إللي مقدرش يفهمة (طبعًا حرية العقيدة دة شىء مش هنتناقش علية حق أي مسلم أنه يصلي ويصوم  وكل شىء وحتى يبني مساجد)

رشيد: مفيش حد يعترض على دة

ح ع: مفيش حد يعترض على دة بس شوف مين إللي بيبني المساجد, وشوف مين إللي بيمول المساجد؟ ومين إللي بيشحن الشباب المسلمين بدل مايبقوا اوروبين ونستفيد من علومهم ونستفيد من فكرهم ومن حريتهم لأ يخليهم يجوا يحاربوا عندنا مع داعش, مين إللي عمل كدة بقى؟ هو الفهم الخطأ للتسامح أنك تتسامح مع غير المتسامح هذا غباء, حاجة استهبال

رشيد: دا self-defeat دا ممكن يعود بوابال على الدول نفسها

ح ع:وعاد, وعاد دلوقتي ماهو الدول دلوقتي بيسألوا نفسهم الالاف من المجاهدين الاوروبين  إللي اعتنقوا الإسلام و الشباب المسلم إللي اتولد في اوروبا إيه إللي خلاهم متطرفين بهذا الشكل؟ إيه إللي بيحبب ليهم ايدلوجية  بتاعة العنف؟ فا هو إبتدى يفيق شوية بس تربطة بقى المصالح الإقتصادية

يعني عندك دلوقتي دولة زي المانيا, السويد, فرنسا وغيرها تربطهم علاقات تجارية وثيقة بالسعودية وقطر,الامارات وإيران وتركيا

رشيد: فا يخافوا منهم يخافوا يفقدوا …

ح ع: يخافوا يفقدوا الزباين, الزباين إللي بيشتروا منهم المرسيدس, والدبابات المنتجات الغربية, دي نقطة

النقطة التانية أن الدول دي lobby  كبير دلوقتي موجود في اوروبا

رشيد: في كل المجالات

ح ع: بيشتغل في الصحافة في الجامعات تلاقيهم حتى في الأحزاب السياسية لاقي دايمًا مكونين حاجة اسمها إيه؟ مُسلمون في حزب الخُضر, مُسلمون في حزب الاشتراكي الاجتماعي, مُسلمون في حزب المسيحي المحافظ

هتلاقي مجموعة من المسلمين في الحزب المسيحي طب بتعمل إيه هناك؟

فا باسم التسامح سابوا بقى إيه؟ طبعًا مين إللي بيحرك دول؟ اردوغان, قطر مع الاخوان, الاخوان برضو فارشين رشيد: أنا جاي في سؤال خاص عن اردغان لان دا حديث ولسة عليه كلام كبير.

 ح ع: السعودية ليها lobby فا كل دة بيخلي الموضوع محكوم, الناحية التانية بقى إللي بيخلي الإسلام مفيهوش حرية طبعًا مشاعر المسلمين نفسهم ( أنا مسلم إذًا أنا زعلان) اسم فصل من كتاب من كتبي, أن أي حد ينتقض يبقى ينهار أسود يعني أتشنج

رشيد: يعني تحس أن في نوع بيذللوهم يعني عاملنلهم معاملة خاصة دا الطفل المدلل بتاع اوروبا والطفل المدلل بتاع أمريكا وبتاع كندا وبتاع استراليا

ح ع: هو مش طفل مُدلل (الطفل المزعج)

رشيد: أيوة ماهو الطفل المدلل يعتبر مُزعج يعني ماتزعلوش يعني ماحدش يقولة يعني

 ح ع: هايزقلك بالطوب لو أنت أنتقدته let dog sleep يعني  خليهم نايمين, خليهم نايمين. فا دة طبعًا مش عايزين أن هما يستثييروا غضبهم, حاجة تانية معظم الاحزاب إللي بتحكم في اوروبا يا أما احزاب وسط  يسار فا خايفين من اليمين من المتطرف ودة برضو فية فرق في يمين وفي يمين متطرف فا خايفين أن اليمين المتطرف لو نقد الإسلام اتسمح بية يكسب أرضية ويكسب شعبية وهكذا فا بيحاولوا أن هما مايسمحوش, ما تتكلمش أحسن

رشيد: بتحس أحيانًا أن المسيحية ممكن تتبهدل مفيش مشكلة أكتب زي ما أنت عايز, واليهودية انتقد , انتقد أي دين أي فكرة, الإسلام لأ. بتتقلب دي إسلام فوبيا, دي عنصرية دا يعني حرام مش لازم كدة بتجرح مشاعر مليار ونصف طب لية المعاملة الخاصة؟ طب مش هما عايزين يبقوا سواسية كدة؟

ح ع: ما هو حسب ردة الفعل ولو عملوا فيلم فية انتقاد للمسيحية, للمسيح, للبابا, للكنيسة لإي حد محدش بيرد خلاص الناس إتعودت دا وجة نظركم وكل واحد دينة في قلبة وخلاص. لكن عند المسلمين لا بتصير هوجة الناس بيطلعوا الشوارع, الآمن القومي بتاع البلد بيبتدي يتهدد بيخافوا أن يحصل عمليات إرهابية بسبب رسومات بسبب كذا كذا…

رشيد: يعني صار الغرب يخاف من الإسلام

ح ع: بالظبط كدة يقولك يعني تجنب شرهم بلاش ترسم محمد وخلاص يعني ماجتش على محمد وخلاص كدة, لما أنا اصدرت الكتاب, الكتاب بتاعي الفاشية الإسلامية. يعني هو لازم؟ طب ما في كتب كتير بتنتقد المسيحية وبعنف إشمعني دا ودا؟ إشمعني لما أجي أكتب عن الإسلام تعملوا منها قضية سياسية خليها حرية فكر للجميع وخلي المسلم يرد على كتابي بكتاب العصر الحديث كدة.

لأ هو بينظر للمسلمين إيه؟ أنا بسميها عنصرية التوقعات المنخفضة

رشيد: عنصرية التوقعات المنخفضة! معلش اشرحلي شوية

ح ع: يعني أنا دلوقتي كراجل اوروبي يقولك أنا مقدرش اتقع من المسلم إللي اتوقعة من نفسي, إللي اتوقعة من نفسي إيه؟ أني أكون محايد أني اقبل نقد ديني ونقد دولتي ونقد هاويتي واتعامل مع الموضوع بأريحية وأتناقش يعني لكن المسلم

رشيد: ما اتوقعش منه نفس الشىء

 ح ع: اه, طفل مُزعج خليه. يعني ياخونا ماتقربوش منهم يعني البُعد عنهم غنيمة, سيبوهم يعملوا إللي هما عايزينة. فا دة منطق غبي جدًا بالمنطق سيبوهم يعملوا إللي هما عايزينة دة إبتدي الإسلامين يبنوا البنية التحتية بتاعتهم, المساجد إللي متمولة من تركيا والسعودية وقطروغيرهم ويبتدي يبث فيها الفكر الوهابي والفكر الاخواني والفكر الجهادي ودة إللي سبب كل المصايب إللي بتحصل في اوروبا

إبتدوا بقى يفوقوا إمتى؟ لما العمليات الإرهابية إبتدت تظهر, أنت عندك دلوقتي بعد ما كنا 11 سبتمبر, كان يفوت يمكن 4 او 5 سنين وتيجي حادث تاني في لندن, يجي بعدها في مدريد يحصل كذا وبعدين تستنى كتير, كتير… دلوقتي كل شهر نسمع بعد شارل ابدو تلاقي في مدينة تلوز وتلاقي في مدينة باريس تاني تلاث مرات عمليات إرهابية

رشيد: الآن في باريس في آحداث

ح ع: دلوقتي في برلين حصل دهس الناس في سوق الكريسماس, كذا عملية إرهابية يمكن ماسمعناش عنها في الدول العربية  علشان صغيرة  4 ماتوا و3 ماتوا وحاجات صغيرة كدة بتحصل

موجة التحرش الكبيرة إللي حصلت في رأس السنة إللي فاتت أو قبل إللي فاتت من مهاجرين للأسف معظمها من عندكم من المغرب في مدينة كولونيا الالمانية

كل دة إبتدي يخلي الناس تقولك هو في إيه؟ الظواهر دي ماكناش بنشوفها, أنا شخصيًا لما جيت المانيا من 95 من 1995  أنا كنت بطير من مدينة لمدينة ما كنتش بشوف شرطة على الطريق تخش كأنك محطة أتوبيس مفيش تفتيش مفيش أي حاجة أنت داخل البلد, أنا مكنتش بشوف الشرطة

أنا في مصر متعود قدام كل المرافق في عسكري واقف كدة وسلاح وبتاع. الكلام دة مكنتش بشوفة في المانيا, دلوقتي إبتدوا يعملوا كدة , قدام المرافق تبص تلاقي الشرطة في الشارع

كنت في باريس في سبتمبر ماشي في الشوارع زعلت, زعلت من المنظر يعني, باريس دي إللي كانت مدينة مفتوحة كانت مدينة الحرية, الجيش ماشي كل خمس دقايق تلاقي مجموعة من الجيش داخل ماشين بالسلاح وعلشان الرعب والخوف, الناس إبتديت تسأل نفسها إحنا إيه إللي غصبنا على دة؟ إيه إللي اجبرنا على دة؟ دا جاي منين؟

من تسامحهم بقى ويقولك سيبهم يدعوا, فا دلوقتي بقى في اصوات جديدة, أنا طبعًا صوتي أتنبح بقالي 7 سنين عمال أقول ياخونا إللي بتعملوة هايجب وبال عليكم هاتدفعوا ثمنة فيما بعد, يتهموني بالعنصرية يتهموني بكراهية الإسلام, يتهموني بالإسلام فوبيا

رشيد: على ذكر الإسلام فوبيا هل الغرب في إسلام فوبيا؟ ولا دي صارت وسيلة يعني جملة كويسة لها مفعول السحر أن أي واحد عايز يتخلص منه يعني افقدة مصدقيتة اه فيك إسلام فوبيا.

ح ع: لا الخبث في الموضوع إيه بقى؟ المرض عندنا إحنا فا إحنا نسقطة على الأخرين أنت إللي مريض.

الفوبيا دي مرض, فا أنا إللي عندي الأمراض, عندي أمراض الإرهاب, عندي أمراض العنف, أنا إللي عندي أمراض حقوق الإنسان, أنا إللي  عندي أمراض التعصب, وعدم إحترام الأخر, كل الأمراض دي موجودة عندي أنا, أنا إللي عندي عنصرية مدفونة تجاة الغرب بس بدل ما أعترف بالأمراض دي وأشوف مصدرها فين وأتحرر منها وأحرر أولادي منها علشان أديهم مستقبل, حياة كريمة في الغرب لا

أنا اسقط عليك أنت أقولك تعالى ياغرب دا أنت إللي مريض أنت إللي عندك فوبيا, فوبيا دي معاناها يعني

رشيد: خوف غير مُبرر

ح ع: خوف غير مُبرر, رُعب كدة بدون سبب, إللي هو كدة خايف من عنكبوت, في ناس بتخاف من ضلها, في ناس بتخاف الاماكن العليا, غير مُبرر, لكن الغرب يعني في نوعيات كتيرة بتتعامل مع الإسلام من وجهات نظر معينة, طبعًا في ناس عندها خوف من الإرهاب دا طبيعي أو قلق

رشيد: شىء عادي  أنا لو كنت في البتكلان طب هايحصل إيه؟ أو أنا جاي مات أو ابني أو بنتي دا شىء طبيعي, في الخوف الطبيعي.

ح ع: أنا واحد في سوق الكريسماس في برلين أنا اعرفه وكان جمب بيتي فا أنا اعرفة كويس, اعرف المكان, قلق, قلق دا شىء طبيعي أن يثير جواك قلق تجاة هذة الظواهر يعني وخاصةً أنها بتتزايد كل ما عدد المسلمين إللي بيدخلوا بيحصل كدة أن موجة الاجئين إللي دخلت المانيا دي, رغم أن معظم اللاجئين ناس مسالمين والسوريين على راسنا من فوق بس تلاقي في داخلهم ناس دواعش, داخلهم ناس اخوان, سلفيين

رشيد: دا حتى وسط الاجئين أنا سمعت قصص بيكون واحد مثلًا مسيحي جاي أو واحد مثلي مثلك يعني ترك الإسلام لا يربطة بالإسلام أي شىء برضو مع الاجئين في نفس مخيمات الاجئين بيُضطهد, أنت بتعمل إيه؟ الإسلام وهانضرب وهانحرقكم وبيهربوا منهم

ح ع: وبيغصبوا اليزيدين على أن هما ياتسلموا يا أما ينضربوا

رشيد: حتى في مُخيمات الاجئين يعني, ويقع في بلدان غربية وهي دي المشكلة في ناس محروقة بيقولك بيحصل في إيه؟

ح ع:فا هي مش إسلام فوبيا, هي أنهم إبتدوا يشوفوا الخطورة التي تكمن هذا الدين لو سبته يتحرك براحته, لو مفصلتش الجانب الروحاني فية من الجانب السياسي ومن الجانب الكراهية إللي فية, لما يبتدي بقى ناس برضو حاجة من الحاجات الظواهر الغريبة أنك تلاقي ناس هربانة من بلاد دمرتها الشريعة, دمرتها تمامًا زي السودان, والصومال

رشيد: وجاي وعايز يطبق الشريعة

ح ع: وإللي جايين من مناطق داعش وجاي في الغرب يقولك الشريعة! ياعم أنت مابتفهمش التطورات جات إزاي؟ مابتفهمش بلدك إيه إللي دمرها؟ جاي عايز يقولك الشريعة ومش عارف إيه.

رشيد: في مقولة لعلي الوردي الكاتب العراقي قال لو خيرت العربي أو المسلم لو سألته لأراد تطبيق الشريعة ولكن لو خيرته إين يريد أن يعيش؟ هايختار بلد علماني, يعني هو يريد تطبيق الشريعة لكن عايز يعيش في بلد ملوش علاقة بيها

ح ع: هو مش فاهم أن البلد إللي هرب فيها دي بقيت كدة لية؟ بقى فيها رفاهية لية؟ بقى فيها مكان لواحد زية لية؟

 بسبب التسامح بسبب الرفاهية بسبب الحرية بسبب الديموقراطية دا جاي منين؟

رشيد: بسبب العلمانية, مفيش دين هايحكمك يعني

ح ع: مفيش حاجة اسمها ان الدين يتحكم فيك, وأن أي مكان تحكم فية دين وعلى فكرة أي دين  يعني لما كانت المسيحية في العصور الوسطى هي إللي كانت بتحكم بالسياسة مكنش في حرية وكان في إضطهاد وكان في محاكم تفتيش وو إلى أخرة…

فأنت الدين رحمتة ً بيه أنك تشيل السياسة من على كتفه وترجعه للصلاة والعبادات وخلاص

 رشيد: ماهو دة إللي قولت ان الغرب مش فاهم لية أنا سألت هل يفهم الغرب الإسلام؟ رغم أن في مكونات إحنا عارفيناها زي ماشرحت مش كتلة واحدة يعني, في البروفيسور وفي العامي وفي الصحفي وكل واحد من منظوره لكن بصفة عامة اجد وكأن لا يوجد فهم. هل اسقاطهم لمفهوم الدين على الإسلام مخلي المشكلة دي؟ يعني يجي يقسها بمقياس المسيحي بالاديان إللي يعرفها, اه يعني مفهوم الدولة دا مُقحم من الإسلامين, الحكم باسم الدين دا موجود في كل الاديان, لو مش عارف أنه مكون أساسي من مكونات الإسلام ممكن تشرح النقطة دي؟

ح ع: الأزمة أن في ناس كثيرين يعني مش عارفين أن الإسلام مش بس دين الإسلام دين وإيدلوجية سياسية ونظام حكم, يعني الإسلام نظام سياسي, إيدلوجية سياسية وصعب أنك تفصلها عن الدين.

رشيد: مش مسألة خاصة بينك وبين ربنا؟

ح ع: كدة يبقى العملية سهلة واتحلت, كدة يبقى إصلاح الإسلام زي ما تكلمنا في الحلقة إللي فاتت هايبقى سهل بقى زي ما حصل في الكنيسة في اوروبا, كانت حصلت بقى شوية إجراءات وتعديلات وفصل الدين عن السياسة وخلصت العملية لكن بيحاولوا باقلهم قرون ومش عارفين يصلحوا حاجة علشان الزواج إللي مش عازين يفكوة دة يعني الدين والساسة والتشريع.

العرب بيقولك اه الإسلام يعني محتاج بس كام سنة زيادة زي المسيحية كدة وهايطور نفسه وهايبقى مصلح وهايبقى كذا كذا بس اسمحولهم ادوهم حرية وادوهم إستقلال, أنا مع أننا ندي حرية للمسلمين على المستوى الفردي أن كل واحد مساوة أن كل واحد من المسلمين إللي عايشين في اوروبا نعامله بالقانون زية زي أي مواطن اوربي دا مفيهاش مشكلة, لكن اتقدرش تعامل المنظمات الإسلامية بهذة المساوة دي, ماتقدرش تعاملها بالتسامح دا وبالفكرالتنويري دة لانها مادخلتش في عملية التنوير إللي هي أنت بتتعامل على أساسها

أنت لما تيجي تلعب لعبة لازم التاني يكون فاهم قواعد اللعبة زيك وبيتعامل معك بنفس الخطة

مش أنت تبدأ تلعب معاه شطرنج ويرد عليك بكرة سلة يعني لازم يكون بيتعامل على نفس المستوي دا مش موجود.

فا في حالة من الحيرة دلوقتي في اوروبا, نعمل إيه بالظبط؟ لو تعاملنا بالحزم هايبقى في عنف وهايبقى في عنصرية كتيرة هايبقى في طرد بقى جماعي وفي حاجات ظواهرمش عايزين نشوفها بس لو تساهلنا هايبقى إيه بنخرب بيتنا بنفسينا يبقى إحنا فتحنا أبواب جهنم على نفسينا

فا هما بيدورا دلوقتي على الحل

رشيد: حل وسط

ح ع: حل وسط, أنا لما حد بيسألني نتعامل إزاي مع القضية دي؟ أنا بقولهم أنقذوا اولاد المسلمين عن طريق المدارس, مش أن أنتوا تساعدوهم يبنوا مساجد تاني, إحنا مش محتاجين مساجد أكتر, إحنا محتاجين تعليم, محتاجين تنوير تحرير الفكر

ماتخلوش الأولاد دول رهائن عند أبائهم وعند مساجدهم في المدرسة على الأقل ادوهم الفرصة أنهم يكونوا مواطنين ربنا, متخافوش أنكوا تتكلموا عن الإسلام السياسي بحرية لكن المدرسين والمدرسات خايفين

يعني هاقولك مثال في شارل ابدو احداث شارل ابدو الأخوين إللي هما قتلوا العاملين في شارل ابدو أخوين قواش, بعد كدة في مدرسة في مدينة ولوز الفرنسية المدرس حب أن هو يناقش القضية بس.

انتوا إيه رايكم في إللي حصل في باريس إللي حصل في شارل ابدو؟ الشباب المسلمين في المدرسة هاجوا ويستهلوا وهما إللي راسمو النبي ومش عارف إيه فا حصلت ضجة في المدرسة وزارة التعليم في فرنسا تحل المشكلة دي إزاي؟ اوقفت المدرس عن العمل دا الحل بالنسبالهم

ف أنت بقى عمال تقول إيه؟ لا لا ما تعملش لا يهب في وشك, ماتقربش منهم لايفرقع في وشك, دا مفكرين كدة أنهم بيحلوا الأزمة لكن هايجي الوقت بقى والإنفجار الحقيقي هايجي, الإنفجار الكبير أوي إللي مش هايخسر بسببه بس اوروبا, المسلمين إللي عايشين هناك الصالح مع الطالح هايتاخد في ناس كتير مسلمين طيبين وشغالين بمجهود وبتاع هايتخدوا في الرجلين بسبب الغباء دة

مش بس كدة أنا بسافر بلاد عربية كتيرة وبلاد إسلامية كتيرة وبشوف شباب زي الورد متفتح متعلم عندكم في المغرب عندنا  في مصر في لبنان في الاردن

رشيد: في كل مكان

ح ع: في تونس, شباب يستحق فرصة هجرة يستحق أن يجوا ويتعلم وياخد فرصة وبتاع شباب وشابات زي الورد هايتقفل عليهم البيبان بسبب التصرفات الغبية دي وبسبب التسامح إللي هو أصلًا في طية ش تسامح.

رشيد: أشكرك أستاذ حامد على المشاركة في الحلقتين, أتمنالك التوفيق في كتبك في مشروعك التنويري ونتمنى نستضيفك في حلقات أخرى في المستقبل

مشاهدينا أشكر كل شاركوا على الفيس بوك وعلى الهاتف .

إلى اللقاء.


Download text file

Daring Question 484

You may also like

سؤال جرئ 382 الإسلاموفوبيا : حقيقة ام خرافة ؟
[00:00:06] الأخ رشيد: مشاهدينا الكرام أرحب بكم في حلقة جديدة من حلقات [...]
0 views
سؤال جرئ 396 الأزهر ونشر التطرف
الاخ رشيد: [00:00:06] مشاهدينا الكرام مرحبا بكم في حلقة جديدة من حلقات [...]
0 views
سؤال جريء 540: من قتل محمد؟
  الاخ رشيد: [00:00:22] مشاهدينا الكرام أرحب بكم في حلقة جديدة من [...]
0 views
سؤال جريء 412 لماذا يصوم المسلمون؟
 الاخ رشيد: [00:00:25] مشاهدينا الكرام أرحب بكم في حلقة أخرى من حلقات [...]
0 views
سؤال جرئ 25 القرآنيون
الاخ رشيد: [00:00:17] نرحب بكم مشاهدينا الكرام في هذه الحلقة الجديدة [...]
0 views
بكل وضوح | الحلقة 158 | حقيقة الخلافة العباسية
  [00:00:32] مشاهدينا الكرام أرحب بكم في حلقة جديدة من حلقات بكل وضوح [...]
0 views
بكل وضوح | الحلقة 155 | الحقائق المخفية حول الخلافة الأموية
[00:00:30] مشاهدينا الكرام أرحب بكم في هذه الحلقة الجديدة من حلقات بكل [...]
0 views
بكل وضوح | الحلقة 68 | صراع فوق جثة محمد
الاخ رشيد:  (بدون المكالمات) مشاهدينا الكرام أرحب بكم في هذه الحلقة [...]
0 views
سؤال جريء 497: هل شيخ الأزهر معتدل أم متطرف؟
الاخ رشيد: [00:00:22] مشاهدينا الكرام أرحب بكم في حلقة جديدة من حلقات [...]
0 views
سؤال جرئ 405 نواصب وروافض: حقيقة الصراع بين السنة والشيعة
الاخ رشيد: مشاهدينا الكرام أرحب بكم في حلقة جديدة من حلقات سؤال جريء، [...]
0 views

Page 1 of 15

اترك تعليقاً