أهلًا بيكم في حلقة جديدة من صندوق الإسلام
ولسة عمالين نعيد ونزيد ونلت ونعجن في الموضوع إصلاح الإسلام
أنتو شايفين الموضوع طويل وعميق,الاجابة عليه ب لأ وأيوة مش هتكفينا
إحنا عايزين نشوف المشكلة أصلها فين؟ ولو في امكانية إصلاح نصلح إيه بالظبط؟
إنهاردة السؤال إللي بطرحه هو لما يرفض الإسلام العلمانية؟
وهل ممكن يكون في إصلاح بدون علمانية؟
في تصور مش بس إن القرآن مقدس, وإن الرسول مقدس
وإن كل شيء موجود قاله الرسول موجود في القرآن يبقى لازم يطبق زي ماهو
المشكلة إن إحنا كمان عندنا التاريخ مقدس والتاريخ دي بيتقري كأنه خط مستقيم مافيهوش متعرجات
وجزء من أو الفكرة السائدة في التاريخ المقدس هو يبدأ بمقوله لعمر ابن الخطاب بتقول
(نحن قوم أعزنا الله بالإسلام ومهما ابتغينا العزة في غيره أذلنا الله)
يعني الشيء الوحيد إللي بيميزنا كمسلمين عن الدنيا كلها, الشيء إللي جابلنا النصر
الدعامة الأساسية من دعامات هويتنا هي الإسلام
لو دورنا عن خلاص أو نجاة أو عن تقدم في مكان تاني بعيدًا عن الإسلام ربنا هيذلنا
ودة التفسير إللي بيعمله كثير من العلماء إنهاردة مش بس الإسلامين على فكرة يعني
ودة آحد الأسباب لرفض فكرة العلمانية
لأن تيجي العلمانية تقول إيه؟ فصل الدين عن الدولة
يعني تعيش حياة تانية غير إللي الرسول كان بيعيشها
الرسول مافصلش الدين عن الدولة فمجرد بس إنك تدخل في السكة دي يبقى أنت كدة
عميل بتحاول تذل المسلمين إذا كان ربنا أو الخليفة عمر قال إن ربنا أعزنا بالإسلام بس
ماقالش أعزنا بالإسلام, والعلم, وبالتقدم, وبالتكنولوجيا
لأ أعزنا بالإسلام. كان يقصد إيه عمر ابن الخطاب لما قال أعزنا بالإسلام؟
أكيد مايقصدش الروحانيات والتهجج وقيام الليل
أعزنا بالإسلام يعني أعزنا بفكرة الجهاد, أعزنا يعني واهبنا النصر
والنصر دة بيجي بالسلاح والسلاح دة بيجي من فكرة الجهاد والموت في سبيل الله
والجيوش الإسلامية الفكرة دي هي الفكرة الأساسية
إللي خلت الجيوش الإسلامية تقدر تكسب قوات عظمه ساعتها زي بيزنطة, وزي الفرس
وهو بيني وبينك الموضوع برضو مغري أنت بتقول في تاريخك إن أنت
شوية عرب ماكنش ليكوا لازمة كانوا رعاه غنم, كانوا في فقر مدقع, كانوا متصارعين وبيغيروا على بعض
وكان جزء مع العرب بيحارب مع الفرس وجزء منهم بيحارب مع الروم وبيقتلوا بعض
ويعني لا ليهم لا في الطور ولا في الطحين يعني في هذة الحرب
فجية الإسلام, جة الرسول وحدهم بكتاب واحد, بدين واحد,بلغة واحدة, بهدف واحد,وابتدا بدأ مشروع التوسع
إنتهى كملوا الخلفاء بعده إن هما اسقطوا القوتين العظمتين إللي هي الفرس والروم
والقوة الثالثة كمان إللي هي الحبشة مملكة أكسوم وصار هما إللي مسيطرين على البحر المتوسط شمالًا وجنوبًا
يعني في أسبانيا والمغرب في غضون في أقل من 100 سنة كان الإسلام باسط زراعه على نص العالم
فالمنطق بتاع أعزنا الله بالإسلام واضح عند الراجل الإسلامي وعند المؤمن العادي
إللي يقولك هو إحنا كان ممكن نوصل لدة من غير فكرة الجهاد وفكر الإيمان؟
ما هو دة الأكيد النقلة الكبيرة بس طبعًا المشكلة أنت عايش إنهاردة والحقائق إنهاردة شكلها مختلف
إنهاردة إللي عايشين بفكرة الجهاد هتلاقيهم أفقر الدول الإسلامية يعني طبعًا أكيد الفكرة
منتشرة برضو في الخليج بس إللي بيطبقوها على أرض الواقع بقى
إللي بيجاهدوا في أفغانستان, إللي بيجاهدوا سوريا, إللي بيجاهدوا في العراق,في الصومال, في السودان
دول إللي هما إيه ومالي إللي هي هتلاقيها أفقر الدول الإسلامية وبالتالي أفقر الدول في العالم
يعني هتلاقي دايمًا في أفقر دول في العالم هتلاقي الصومال, السودان,الصومال, اليمن, السودان
هتلاقيهم دايمًا الثلاث دول دول ورا بعض يعني سباقين
فطبعًا الفكرة إزاي تشيل من دماغ الراجل إللي هو مؤمن بيها نحن قوم أعزنا الله بالإسلام ومهما ابتغينا العزة في غيره أذلنا الله
يبقى إحنا دلوقتي دورنا عن سبل النجاح في العلم الحديث وعايزين نتعلم من الغرب
دي أزمة كبيرة هنتكلم فيها طبعًا في حلقة خاصة عن علاقة الإسلام بالغرب
وهل ممكن الإصلاح يجي من المسلمين إللي عايشين في الغرب؟
هنتطرق لها أكيد بإستفاضة بس نظرتك للغرب لو قرينا بقى التاريخ المقدس
هيقولك إن أنت ربنا أنت كنتوا شوية عرب بدو مالكمش لازمة
جة الإسلام وخلاكوا بني أدمين عمل منكوا حضارة وثقافة
أفتتحتوا أنتو الأمم والشعوب وعلمتوا البشرية بقى الفيزيا والكيميا والحساب والرياضيات والفلسفة وكل حاجة
دة دة الرؤية الإسلامية طبعًا وبعدين جم الصليبين غاروا عليكوا
أنتو أنتو روحتوا بقى القسطنطنية وحطمتوا واحتلتوا عاصمة الدولة البيزنطية
دي مش احتلال طبعًا وغور عليهم دة حقك ربنا مديهولك
أنت تروح أسبانيا وتقتل ناس وتاخد سبايا حقك
تروح بلقان وتنشر الإسلام بالسيف هناك حقك
تاخد مصر من الرومان, تاخد سوريا منهم, تروح أرض فارس وتحطم المملكة بتاعتهم وتاخدها
دة بقى أنت حق إلاهي لكن هو لما يجي عندك بجيوشه يبقى حملات صليبية
ويبقى هو السبب يعيني بقى عطل مشروعك الإلهي
طب ما أنت بتحاربه وهو بيحاربك إيه الفرق يعني؟
إللي معاه القوة أكتر بيجي وبيحاول إن هو يسيطر على التاني
يعني أنت إللي هاجمت أرضه الأول أنت دي مابتقرهاش في التاريخ
لأن أنت طبعاً في ال map بتاعتك أو في الخريطة العقلية أو الخريطة الذهنية بتاعتك
أنت ماعندكش فكرة إن أنت لما تروح تجور عليه في أرضه يبقى أنت كدة بتحتله أو بتهاجمه
لأ, دة أنت في تكبر حضاري عندك تكبر حضاري, غرور حضاري
أنت من حقك تقتله بس هو لما يجي بقى علشان يحتلك يبقى أنت المظلوم وتشتغل في المظلومية
طب إيه إللي وداك الأندلس؟ إيه إللي وداك القسطنطينية؟ إيه إللي وداك الشام؟
ما كان كلها مملكتهم كلها كانت بلاد مسيحية إيه إللي وداك مصر؟
لأ أنا رايح أفتتح في سبيل الله أقتل وأسبي وأخد سبايا عادي حقي
لكن لما التاني يجي ويعمل نص في المية من إللي أنا بعمله دة يبقى إحتلال وحملات صليبية
ويبقى هو السبب في تعطيل المشروع الحضاري
طب لية ماحدش قال إن إحتلال الأندلس كان سبب في تعطيل مشروع أوربا الحضاري ماحدش لام عليهم
أنت بتقول دة اتعلموا من ابن رشد ومش عارف إيه وبتاع
رغم إن هما محتلين إبتدوا يتعلموا من ابن رشد موافقك ماشي
طب أنت هما محتلينك أنت ماتعلمتش لية بقى من كانط وأسبينوزا وجون لوك وديفيد هيوم لما الاستعمار جالك
ماتعلمتش من الناس الجميلة دي, ماتعلمتش من العلماء إللي نابليون جابهوملك لية؟
لية لما أنت احتلتهم يبقى هما استفادوا منك واتعلموا منك لكن هما لما احتلوك وجايبين معاهم مدارس
وجايبين معاهم ماكنات طباعة وجايبين معاهم كتب وبيعلموك يعني إيه طب؟ ويعني إيه طب حديث؟
والكلام دة كلة طب ماستفدتش لية؟ ماتعلمتش منهم دة لية؟
لأن أنت رافض تتعلم منهم, لأن أنت مصمم على مقوله عمر ابن الخطاب نحن قوم أعزنا الله بالإسلام
مافيش غيره فمافيش تعاون, فأنت علشان تبتدي تصلح لازم مفهوم الهاوية الجامد دة
إللي بيقرى التاريخ بالتسلسل الغبي دة وبيقدس التاريخ كأن هي دي النظرة الحقيقية
الإسلام جية وبعدين نشر العلوم في العالم
طب هو الإسلام هو إللي عمل العلوم؟ هو الإسلام إللي عمل الفلسفة؟
طب لو هو كان الإسلام ما كان عملها في مكة والمدينة
أنت سمعت عمرك عن مدرسة فلسفية طلعت من مكة أو المدينة؟
عمرك سمعت عن عالم كيميا أو أحياء أو طب أو بصريات أو رياضيات وجبر جية من مكة والمدينة؟
أو الإسلام هو إللي ولد هذة العلوم؟ والطاقة دي جاية من روح الإسلام فعلًا؟
كان أولى من مكة والمدينة إللي ظهر فيهم الإسلام هما إللي يطلعولنا أو يبرزولنا العلوم دي
حاول تفهم المعلومة دي إن العلم والتقدم مابيجيش من دين
دة بيجي من تلاقح الشعوب لما بيتعلموا من بعض
أيوة كان في عندك خليفة هارون الرشيد وكان عندك المأمون إللي كان عندهم فضول إللي كان عندهم فضول
والمأمون كان بيراسل قيصر بيزنطة الأمبراطور البيزنطي وبيقوله أبعتلي كتب
يعني مش فكرة العداء إللي في دماغك دي دايمًا حروب وهما يغيروا علينا وإحنا
لأ كان في فترات خاصتًا في العصر العباسي بيتعاونوا مع البيزنطينين
يعني كانوا بيساعدوهم يعني ابعتلي حاجة من إللي عندك مافيش إللي هو إيه
عايز يترجم كتب ماكنش فيه الرفض دة لية الحضارة إللي إحنا بنسميها الحضارة الإسلامية دي
بقت متقدمة في الطب والعلوم والحاجات دي في بغداد وقرطبة وأجزاء بقى دمشق والقاهرة؟
بس هي بغداد وقرطبة هي المركزين لية في الاماكن دي بالذات؟
علشن كان في ثقافات قبل كدة عايشه كان في فرس كان في بيزنطنين كان في يهود سريان
ناس عندها لغات وبيترجموا وبيعرفوا يوناني وبيعرفوا أغريقي
هما دول الناس إللي كانوا بيترجموا أنت تعرف واحد مترجم واحد عربي؟ ماكنش عربي
تعرف عالم من العلماء من إللي أنت عمال تفتخر بيهم كان فعلًا هاويته عربية؟
هتقولي ابن سينا
هاقولك فارسي
هاتقولي الغزالي حتى نفسه
كان فارسي
هتقولي الفاربي
فارسي
الخوارزمي
فارسي
ومعظم دول كلهم ماعدا الغزالي هتلاقي ابن رشد أمازيغي
كل دول في النهاية هتدور في تاريخهم أقرا بقى التاريخ
مين إللي طلعوا منهم قالوا عليهم كفار؟
وإللي هما من نفسهم قالوا إنهم مش مؤمنين أو ورولك إن هما مش مؤمنين
يبقى مش الإسلام بقى إللي خلى ابن سينا ابن سينا
لأ التفكير واتباعه لمنطق أرسطو وترجمته ودراسته للطب ودراسته للفلسفة
والفاربي لدراستة للطب ودراسته للموسيقى والفلسفة يعني مش كتب التشريعات
مش تفسير الطبري هو إللي خلاه يعني يبقى الفاربي, مش نظرية الاعجاز العلمي في البطيخ
دة كلة جاي من العلم ليه أساسيات. أساسيات العلم إنك تتعلم من إللي سابقوك
ماتقولش دة ربنا بينورني كدة من السما مباشر لأ
أنت ترجمت كتب الأغريق في كل حاجة أنت ابتديت تقلد هما عملوا إيه دة حتى في سيرة النبي بتاعك لما جيت تكتبها
حاولت تقلد الشهدابة بتاعت الفرس وادب الحروب فلذلك أول حاجات اتكتبت عن قصة حياة محمد كان بيسموها كتاب المغازي
إن هو يعني المغازي يعني أول حاجات ابتدت تتعمل في السيرة عن المغازي
إنها بتحكي قصة حروب النبي ويوصفوا زي ما نفس الفرس بيوصفوا ملوكهم في الشهدامة
حتى في دي أنت ماشي على نمط الحضارات إللي قبلك
المعمار, المعمار إللي أنت بتسمية إنهاردة المعمار الإسلامي دة كلة
روح زور إيران, روح زور أصفهان, روح زور سمرقند, روح زور الحاجات دي
وشوف الحاجات القديمة إللي كانت موجودة فيها قبل الإسلام
وروح زور الشام وشوف الكنائس البيزنطية إللي فيها وشوف الحاجات القديمة البيزنطية
هتلاقي إن ما يسمى بالمعمار الإسلامي ليس إلا خليط بين المعمار الفارسي والمعمار البيزنطي يعني copy- baste
وهما المهندسين إللي ابتدوا يعملوا الحاجات دي كلها ولا واحد فيهم كان عربي
يعني كونك أنت تحت الحكم العربي دة مش معناها إن العرب هما إللي بنوا الحاجات دي
مش العرب هما إللي هندسوا الحاجات دي
في الأندلس كانوا بياخدوا بقى الطراز البيزنطي والطراز الفارسي ويحطوه في الأندلس
ناقلينه من بغداد ما هما كانوا بيروحوا يجيبواالموسيقين
زرياب دة من أعظم الموسيقين في الأندلس جابوهم منين؟
جابوهم من بغداد
هو كان ثقافته منين؟
من الثقافة الفارسية
هما العرب بتوع مكة والمدينة أنت سمعت حد من مكة والمدينة عمل مقطوعة موسيقية؟ ماتعرفش
الفكرة إن مسألة الإسلام وربط الدين بالدولة بالجهاد بالإقتصاد الإسلامي هو عصب الهاوية الإسلامية, عصب الهاوية الإسلامية
فإزاي أنت عايز تعمل إصلاح عندنا ناس تقولك ماقدرش أطلب العزة غير في الإسلام
إللي تقدموا في الإسلام وتحت راية الإسلام طلبوا العزة في غير الإسلام
ترجموا كتب الأغريق يبقى كدة ابتغى العزة في الإسلام ولا لأ؟
يبقى هو دة السبب إنه ماتمسكش بهذا المبدأ, إنه ماتمسكش بهذا المبدأ
لو كان تمسك بهذا المبدأ في بغداد كانت هتفضل بغداد زي مكة والمدينة مدن صحراوية
لا يعول عليها لا تنتج إلا احاديث وتفاسير وحاجات في هذا النوع
حتى أفضل مدارس الفقه اتعملت في العراق وفي مصر
يعني حتى الفقه مدارس الفقه إللي اتطورت بعد كدة مش من مكة والمدينة
جاية من العراق ومن مصر من الاحتكام بالمسيحين واليهود إللي كانوا عايشين علم الكلام
يعني الفقه في أساسه كان بادىء علم الكلام,علم الكلام إللي هو إيه بقى؟
إن أنا احاجج اليهود واحاجج المسيحين فحاججهم
فهو أنت جاي من خلال كدة فأنت تجيب واحد من الموالي المسيحين إللي عندك
تقوله ترجملي كتب كذا كذا علشان أنا عايز أعرف أجادله كويس
الفكرة من البداية ماكنتش حكاية إن أنت مهتم أوي بالعلم والفلسفة أنت شايف ناس متعلمين يهود
ومسيحين وسريان وعندهم ثقافة ويعرفوا تاريخ كويس ويعرفوا يحكوا عندهم لاهوت
فأنت عايز تسايرهم فعملت إيه؟
بعت الناس قولت هاتلي بقى ترجملي أنا عايز أعرف الناس دي بتعمل إزاي؟ وبتفكر إزاي؟
كانوا ناس سريان كتير ويهود قاريين الفلسفة اليونانية فبدأ يتكلم
فيعرف يبهر إللي قدامه بالحجة بتاعته يسكته,يخرسه
فطبعًا العلماء المسلمين إللي هما يعني الشيوخ مش قادرين يجاروهم
فأدي بقى فكر حكاية إيه الفلسفة لخدمة الدين مش للمعرفة
فلذلك امتى رفضوا الفلسفة لما الفلسفة ابتدت توديهم سكة تانية غير سكة الدين
فكفروا ابن سينا وابن رشد والغزالي إللي هما بيسموه إنهاردة فيلسوف
هو من أكتر الناس إللي هاجموا الفلاسفة وعملوا كتاب تهافت الفلاسفة
إللي لحد إنهاردة حجة إن الفلسفة دي كلام فاضي وبتاخد بعيد عن مسألة الإيمان
ودة لب مشكلة الإصلاح بقى إن أنت هاويتك مرتكزة على ركيزة واحدة
ودة شيء خطير جدًا في الهاويات الحديثة لازم أنت يكون عندك أكتر من ركيزة تحمي هاويتك
لما تكون مراهن على حصان واحد بس والحصان دة يتعب ولا يموت أنت بتضيع وحياتك بتدمر
فالهاوية الحديثة لازم تكون منفتحه, الهاوية الحديثة لازم تكون متقبله لعلوم الأخرين
لازم تترجم لازم تعرف المعلومة دي إن أنت لما ترجمت شغل التانين
الأغريق وترجمت شغل الفرس واطلعت عليه طورته أنت تقدمت مش علشان الإسلام قالك
ومش علشان مها ابتغيت العزة لو كنت ابتغيت العزة في الإسلام بس ماكنتش هتوصل لدة إذًا ابتغيت العزة في حاجات تانية
وبغداد إللي أنت عمال تفتخر بيها إنها رمز مش عارف الانتصار الإسلامي كان الخمرة فيها للركب وكله بيشرب خمور
رقص ومجون وشعر ايروتيكي وشعر للمثلين وشعر حتى شتم الأديان
فماتقوليش دة بقى بغداد انتصرت علشان الإسلام
لأن بغداد كانت أبعد مايكون عن الشريعة الإسلامية في تركيبها حتى قرطبة نفس الشيء
الاماكن إللي صممت على الشريعة فضلت متأخرة أو بعد ما تقدمت رجعت تاني
يعني أنت قارن بغداد في القرن التاسع الميلادي وقارن بغداد إنهاردة مثلًا
أو بغداد من 500 سنة ولا ليها أي دور في التاريخ خلاص بس كان الشريعة
والشيعة يطبقوا شريعتهم السنة يطبق شريعتهم وكل حاجة ماشي زي الفل
بس أمتى تقدمت بغداد؟ لما كان في افتتاح لما ماكنش فيه خوف من النقد
لما كان فيه حرية إلى حد ما في التعايش لما كان اليهود والمسيحين والمسلمين عايشين مع بعض
لكن ماكنش حد يقول ماتبنيش لأ مش عارف ماتعملش أيه لا
دة لما جم بقى ابن تيمية وابن القيم ابتدوا يطبقولك البتاع دة اتقفل علينا الباب
لما جة ابن تيمية وقال ابتغينا العزة في غير أذلنا الله هة أتذلنا بجد
لأن الآيات اتقلبت بقى إنهاردة لازم نبتغي العزة في حاجات كتير أوي في العلم في التكنولوجيا في التعليم الحديث
في ثقافة احترام الأخر ماقدرش أنا أنجح في هذا العالم الحديث إللي كله بيعتمد على بعضه وأنا بعتبر الناس كفار
وأنا بعتبرهم نجس, وأنا بعتبرهم كالحمار يحمل اسفارًا وأنا بعتبرهم قردة وخنازير
يبقى مش يبقى هعزل نفسي فهي المعادلة مش إن ابتغينا العزة في الإسلام أو من غير الإسلام
المعادلة مش لو فصلنا الدين عن الدولة ولا مافصلناش الدين عن الدولة
المعادلة هي هل أنا بتعامل مع الإنسانية والبشرية باسلوب صحي؟
أم إن أنا بأنظر للبشر على إن هما أعدائي وإن هما معطلني عن إني أنفذ وعد الله
وإن التاريخ المقدس بيقولي إن أنا كنت منتصر لما كنت بمارس الجهاد
وهرجع انتصر تاني لما امارس الجهاد يبقى أنت إزاي دلوقتي تعرف تتعاون مع الغرب وأنت لازم تنسفه أصلًا علشان تحقق وعد ربنا
وعلشان تورث الأرض إللي ربنا ادهالك فكر في الأسئلة دي
وفكر التخلف دة مش وليد لحظة, مافيش أمة في الدنيا بتتخلف علشان حد احتلها لأن كل الأمم احتلت
أوربا مافيش دولة فيها ماحتلتش والقوي دايمًا كان يغور
لكن في النهاية الأمم تتقدم أو تتخلف بسبب فكرها
بسبب هل هي انعزلت وكرهت البشر وحجبت نفسها عنهم أو إن هي ابتدت تتعاون مع البشرية, تتعلم من كتبهم
تطور هذة العلوم, تقابلهم بإحترام فيصير في تعاون إقتصادي وتجاري وفني وفكري على كل المستويات
هو دة إللي البشرية توصلتله في النهاية فأنت هترجع تاني بقى تقسم العالم لمؤمن وكافر وتقول أعزنا الله بالإسلام
ولازم نجاهد علشان نرفع راية الإسلام روح بقى شوف راية الإسلام حصلها إيه في داعش دلوقتي وهما عمالين يصرخوا
تحت القنابل إللي بتنزل عليهم ومعادش ليهم لازمة في البشرية خالص
شوف إللي عايزين يعزوا الإسلام في أفغانستان وصلوا لحد فين؟
شوف إللي عايزين يعزوا الإسلام في بوكو حرام يعني وصلوا روما ولا لسة؟
مافيش دي كلها فقاعات نهاية الهاوية
هاويتك المنفوخة على أساس إنها من عند ربنا بتثبت فشلها يوم بعد يوم وبتطلع قبحها للبشرية يوم بعد يوم
فنحن قوم أعزتنا الطبيعة بالعقل ومهما ابتغينا العزة في غيره تخلفنا.
نراكم في الحلقة القادمة.
Download text file
You may also like
