مين اللى سرق مصر، الحلقة السابعة عشر: الأزهر عامل زي سُوستة

مين اللي سرق مصر

احنا بنحب نسمي الأزهر اية

صرح العلم و حصن الهوية المصرية و معقل الوسطية مش معتقل الوسطية لا معقل الوسطية

اللي منعرفوش عن تاريخ الازهر او اللي محدش بيحكيهولنا كتير يعني ان الازهر دا متلون جدًا

انه من ساعة ما انشىء و هو اداة

انت تعرف يا مصري إن الازهر أول ما انشىء كانت مؤسسة شيعية و كان بيتشم من على منبر الازهر صحابة رسول الله صلى الله عليه و سلم

يتشموا واحد واحد بالاسم كده ما عدا علي

يتشتم عمر و يتشتم ابو بكر و يتشتم عثمان و غيرهم و عائشة

يتشتموا كلهم على على . من على منير الازهر

انت تعرف ان فيه كلمة بيستخدموها المصريين خاصًا الستات

اللي بيقولك يا عمممممممر لما الواحدة تردح لواحدة تقولها يا عمممممر

يا عمر دي كان شيوخ الازهر و هما بيخطبوا ايام الشيعة وبيشتموا عمر بن الخطاب

لماذا ضربت فاطمة يا عمممر ؟

و كانوا يوبخوا عمر بن الخطاب من على المنبر

لماذا فعلت هذا يا عمممممر؟

ده انعكس و ظل في الشخصية المصرية لحد انهاردة ان لما حد يشتم حد يقوله يا عمممممر

طبعًا اكيد من وقت للتاني كان في الازهر شيوخ محترمين و الناس بتحبهم و تروح تسألهم لو وقع عليهم ظلم زي الشيخ الخراشي

من المقولات المصرية المشهورة اوي ان الناس تقولك يا خراشي ياخراشي

يا خراشي اللي هي مفاجئة كده

بس الحقيقة ان ياخراشي دي كان لما الناس يقع عليهم ظلم سواء بقي من التجار من الحاكم

كانوا يروحوا للشيخ الخراشي ده و يقولوا قدام الازهر و يندهوا و يقولوا يا خراشي ياخراشي

يعني اية انجدنا , انقذنا

فظلت هذه المقولة برضو

انا بحب الحاجات اللي هي من التراث المصري مهما كان الشكل

الازهر لما نابليون جه مصر

احنا عندنا طبعًا أسطورة ان الازهر عمل ثورة القاهرة الأولى و ثورة القاهرة التانية و مش عارف اية و بتاع

معظم شيوخ الازهر اشتراهم نابليون و كانوا بيدعوله من على المنابر عشان دفعلهم فلوس

محمد علي نفس الشىء معاهم اشترى بعضهم بالفلوس و اللي عصلج معاه

هو كان عايز يطبق الشريعة و مش عارف اية وبتاع نفاهم للصعيد

لما جه جمال عبد الناصر و حب يطبق ايام الملك كان هو مع الملك و كان هو بقي امير المؤمنين الملك ده و مفيش احسن منه و هو الحاكم و له الامر و الطاعة

مفيش اي مشاكل

مشي الملك و جه جمال عبد الناصر الازهر شالتله الاشتراكية خالص و جه طلعله فتاوى ان الإسلام هو دين الاشتراكية و العدالة الاجتماعية و كل تعاليم الاشتراكية الإسلام اصلاً هو اللي اخترعها

جه عمك السادات حب يعمل الانفتاح و الحرية بقي و التجارة و الكلام ده كله

برضو جه الازهر قالك الإسلام هو دين الحرية و مش عارف اية الملكية الفردية و دي من الحرية و الدولة المفروض متتحكمش مش عارف

يعني هو حسب الوضع كده

التلون

ايام مبارك كانوا مع مبارك ضد الثورة في 2011

و شيخ الازهر طلع و قال ممنوع التظاهر و يعني ينصح المتظاهرين بالعودة الى بيوتهم

بعد شوية سقط مبارك جات الثورة و الناس خلاص يبقي كده تمام

و الثورة مباركه مجيدة و مفيش اي مشكلة و تصالحوا مع الثورة

جه السلفيين و الوهابيين لما ابتدوا يخترقوا الازهر

هنبقي نتكلم في الموضوع ده في حلقة خاصة

بقي الازهر مع السلفيين و الوهابيين و مع الإخوان

والاعارات بقي بتوع الازهر و يرحوا السعودية و ياخدوا فلوس و بتاع