صندوق الاسلام الحلقة 80 تاريخ العنف ضد المسيحيين في مصر

أهلا بيكم في حلقة جديدة حلقة خاصة من صندوق الإسلام

مصر في الاسبوع اللي فات دي فيها حصل خلطبيطة وخليط جدًا من الأحداث

تقريبا صعب إن يحصل في بلد تاني في العالم غير في مصر يعني

في نفس الاسبوع اللي مصر جايبة نجم الكرة العالمي ليونيل ميسي

عشان يوري العالم إن مصر بقت آمنة وإن مصر جميلة

وصوروه عند الأهرمات عشان يشجعوا السياحة

ويشجعوا الاستثمار وبتاع

وصرفوا ملايين على هذه الزيارة

في نفس الاسبوع يموت منظر الإرهاب الشيخ عمر عبدالرحمن في أمريكا

فا الدولة تتكفل بنقله في مصر

ويتعمله في مسقط رأسه في الدقهلية جنازة حاشدة

ولا جنازة جمال عبدالناصر تظاهرًا للإرهاب ولأنصار الإرهاب

ورتنا إن لسة عايشين وسطينا جيوش من الناس اللي بتدعم هذا الفكر المتأخر

من عمر عبدالرحمن وطبعًا هو كان متهم في تفجيرات في أمريكا  واتحبس بهذا السبب

بس قبل كدا في مصر هو كان صاحب فتوي اللي هي ظهرت في أول التمنينات

لما الجماعات الإسلامية حبت إن هي تقاتل بقى الشرطة وتعمل عمليات إرهابية ماكنش معاهم فلوس

فا يحللهم الأزمة دي إزاي الشيخ عمر عبدالرحمن

عمل فتوى اللي هي يجوز سرقة محلات المسيحيين

محلات الذهب والصيدليات ومحلات التجارية

عشان المجاهدين في سبيل الله يمولوا نفسهم للحرب

وبرر الفتوي دي إزاي بقى ؟

إن المسيحيين عندنا دلوقتي ماعادوش بيدفعوا الجزية

فاكنت الجزية هي اللي بتحميهم إن احنا مانسطوش على

فا كدا رجعوا كفار تاني مش تحت حمايتنا

لأنهم مابيدفعوش الجزية فا من حقنا إن احنا نسرق محلاتهم وبيوتهم

وبالفلوس دي بقى ندعم جيوش المسلمين وندعم بيت المال بتاع المسلمين

دي الخلفية ودا اللي بيجبنا للحدث ال3 اللي حصل في العريش في نفس الاسبوع

اللي هو عندنا عائلات مسيحية برمتها بيتهجم عليهم الإسلاميين في العريش

بيقتلوهم ، في ناس اتحرقت

فاكرين لما كنا عمالين نتفرج احنا على التليفزيون من 3 سنين

على اللي بيحصل من داعش في العراق وسوريا

وعمالين نقول مش أحسن ما نبقى زي العراق وسوريا

فضلنا احنا ساكتين على اللي بيحصل في مصر لحد ما قربنا نبقى زي العراق وسوريا

هو دا المنطق الطبيعي

إن ناس ماعملوش أي حاجة مجرد إن هما دينهم مختلف

دا يدي الإرهابيين الحق إنهم يروحوا يقتلوهم ويشردوهم

منظر الأطفال وهما ماشيين على رجليهم وبيهربوا

واللي شايل مرتبة واللي شايل بطانية

ورايحين بقى سابوا بلدهم ، متربيين هناك ، مترعرعين هناك

يسيبوا هناك ويروحوا تاني

فا يجي بقى الجماعة الجمال بقى لأ بلاش نتكلم في الموضوع دا كتير يا جماعة عشان الفتنة الطائفية

الفتنة نائمة لعن الله من أيقظها

فتنة إيه اللي نائمة ؟

الفتنة دي موجودة بقالها 1400 مانامتش ولا يوم

الفتنة قائمة طول ما الظلم قائم

طول ما عدم المساواة مش موجود

الفتنة قائمة طول ما إنت بتحاول تحل المشاكل دي طول ما بتقول للأقباط اخرسوا

ماتتكلموش عشان ماتعملوش مشاكل

مابتروحش للي بيكرهوا واللي بيقتلوا واللي بيضربوا

واللي بيعلموا الكراهية في المساجد واللي بيعلموا الكراهية في الأزهر

مابتروحلوهمش تقولهم اخرسوا مابتقولهمش اسكتوا

مابتقولهمش بطلوا كراهية ، يبقى هاتموت الفتنة إزاي ؟

كنس القذورات تحت السجادة مابينضفش البيت

بالعكس دا بيخليه نتن أكتير

وفي نفس الاسبوع يا مؤمن اللي عايزين يجددوا الخطاب الديني

رئيس الجمهورية بيستدعي شيخ الأزهر

تعالي يا مولانا كدا والنبي عايزك  في خدمة صغيرة

والنبي صلحلنا الخطاب الديني كدا يا راجل

الكلام دا قاله من سنة وقاله من سنتين وعايزن نصلح الخطاب الديني

هو فين الزرار يا شيخ الأزهر

اضغط على الزرار اللي بيصلح الخطاب الديني دا عشان نصلحه

أو زي الكاتب الرائع مؤمن المحمدي لما كتب مقال وقال فيه

لتجديد الخطاب الديني دوس نجمة

بمنتهى السهولة كدا

جايب شيخ الأزهر وبيقوله شوف الحاجات اللي بتعمل الكراهية

في نفس اليوم اللي جايب فيه رئيس الجمهورية شيخ الأزهر بيقوله جددلي فيه الخطاب الديني

يتحكم على الشيخ ميزو ب 5 سنين سجن علشان أنكر حد قطع يد السارق

يعني  أنكر حاجة من اللي داعش بتعملها

يبقى تجديد الخطاب الديني إيه اللي انت عايز تعملوا يعني

تجدد البلد كلها أحسن

جدد البلد كلها أحسن

أنا طبعًا مش من نوعية بقى الإعلاميين زي عمرو أديب والإبراشي وبتاع

اللي يجيب موضوع زي دا ويجيب ناس يعيطوا ويجيب ناس مش عارف إيه

ويا اخوانا مايصحش كدا وبتاع

ولازم نبقى إيد واحدة والحواديت الإعلامية السياسية دي

لأ أنا راجل بفكر ولما بيحصل حدث

أنا مش من النوع اللي بيطلع يقول تعليق على حدث كذا وكذا

لأن أنا عندي مشروع فكري معين

بتكلم عن مشاكل الفكر الإسلامي

فا أنا إنهاردة مش عايز اتكلم كتير عن موضوع العريش في حد ذاته

أنا عايز اتكلم عن تاريخ العنف ضد المسيحين في مصر

عشان تعرف إن القصة مش قصة إن الدواعش بتوع اليومين دول

وإن القصة مش قصة الإخوان والعسكر وإن فيه خلافات بينهم

وعايزين يضربوهم وعايزين

لأ أنا هاوريلك بالأمثلة التاريخية الموثقة

ليه إن تاريخ العنف ضد المسيحيين دا مستمر لحد إنهاردة

نفس اللي بيحصل إنهاردة حصل من فترة لما حصل في المنيا تقريبًا نفس الشيء

بس بصورة مختلفة شوية

طلعوا إشاعة إن واحدة مسلمة بتحب واحد مسيحي

بتحبه ، إيه اللي حصل بقى ؟

المسلمين الغيرانين ، مش السلفيين

بقولك المسلمين العاديين اللي في الحي ، اللي في القرية

راحوا على بيت الراجل اللي هما قالوا إنه بيحب المسلمة دي

وحرقوه وأخدوا أمه ست مسيحية عجوزة مسكينه عروها وجرجروها في شوارع القرية

في المنيا ، في الصعيد

شوف الشخصية المصرية لما تتهزأ

الشخصية المصرية اللي المفروض معروفه بالشهامة

الشخصية الصعيدية اللي يقولك اللي يمد إيده على حرمة ماينفعش

كل دا اتعطل بسبب إيه ؟ بسبب الغيرة الدينية

إن ست اتجرجرت وبيتها اتحرق

وكل المسيحيين اللي في القرية قالولهم يعني ، هجروهم تهجير قصري

علشان المسلمين الغضبانين مايفشوش غلهم فيهم

هو بقى اللي بيسبب الفتنة

اللي بيسبب الفتنة إن انت تيجي على اللي اتظلم وتقوله اسكت ولم الدور

تجبرهم على صلح بدل ما المئات اللي عملوا الحركة دي تاخدهم وتحبسهم وتخليهم عبرة

لأ إنت بتتبع منطق إيه بقى

غور من وشه الساعة دي بقى يا جرجس الراجل متنرفز

وكأن له الحق إن يبقى متنرفز

وكأن له الحق إنه يحرق بيوت

 وإنه له الحق إن يجرجر ستات في الشوارع

اتعطل المنطق والشهامة المصرية والمفهوم الاحترام اللي الشعب دا طول عمره بيتكلم عنه

بسبب منطق ديني أهبل

اللي يقولك حبت واحد مسيحي

أولاً كانت إشاعة

ثانيًا حتى لو مش إشاعة واحدة مسلمة حبت واحد مسيحي

المشكلة فين بقى ؟ المشكلة طبعًا في القرآن وفي الإسلام

اللي بيسمح للمسلم إنه يتجوز مسيحية

لكن مايسمحش مسيحي إنه يتجوز مسلمة

ليه بقى  ؟ إن المسلم لما يتجوز مسيحية فيه الفرصة إنه يخليها على دينه

لكن العكس صعب شوية  ، لأن الراجل هو

لما الست دي اتعرت وحصل الموقف دا

اتعمل هاشتاج أهبل اسمه مصر اتعرت

ودا في الهاشتاج نفسه أنا شوفت المشكلة يعني

إنه خلى مصر برضو واحدة ست غلبانة

وفتاة واتعرت فا محتاجة الراجل اللي يجي بشهامته ويروح محافظ عليها ومغطيها

السيسي حبيبنا ولا عمرو بن العاص ولا عمر بن الخطاب

المنطق الذكوري ، مصر اتعرت مصر محتاجة دكر

هي جاية من نفس الفكرة

جالك الدكر يا مصر ؟ غطاكي يا مصر

إيه المنطق دا  ؟

مافيش حاجة اسمها مصر اتعرت

اللي حصل إن فيه اقليه بتهان

إن مافيش مساواة والموضوع دا عمال بيتكرر ويتكرر ويتكرر

دي مش أول مرة

أن كتبت في سنة 2013 مقال في جريدة الشروق

عن مدرس مسيحي اسمه بيشوي كميل كامل  ، قصته مأساة

واحد عمل صفحة على الفيسبوك بإسمه وشتم الإسلام كأنه هو

وبرغم إن أهله أثبتوا إن الصفحة دي مش بتاعته

الراجل دا اتحبس 6 سنين

ليه اتحبس 6 سنين ؟ عشان نفس اللي بيحصل انهاردة في العريش واللي حصل في المنيا

إنه المسلمين الغيرانين على دينهم اتملوا حوالين بيته حرقوا بيته

وعايزين يقتلوا المسيحيين جيرانه

فا يجي الأمن يعمل كردون ويطلب من المسيحيين معلش

يعني تجنبوا غضبهم شوية ، سيبوا مكانكم شوية

ودا اللي حصل ويروحوا  واخدين الواد عملينله محاكمة سريعة 6سنين سجن وبس كدا

بعد ما عملت أنا المقال في الشروق جابوا بقى أدلة تانية وعملوا اثبتوا حاجات

وبعد 3 سنين في السجن ثبتوا إنه براءة طلع

نفس القصة اتكررت مع ولد مسيحي تاني

اسمه جمال مسعود ماعملش أي حاجة

واحد صاحبه عمله تاج على صورة بيشتم فيها النبي أو بيشتم فيها الإسلام

تاج يعني أي حاجة تظهر اوتوماتيك على الصفحة

خدوه وحبسوه 3 سنين

سنة 2012 الكلام دا كله

فا الحاجات دي خمس أطفال بيعملوا مسرحية ضاحكة عن داعش وطريقتهم وهما بيصلوا وبتاع

راحوا واخدينهم وحاكمين عليهم بالسجن مش عارف كام سنة

ولما الأطفال هربانين من الحكم الجائر الظالم ورايحيين سويسرا

وبيحكوا اللي حصل بيقولك دول بيشوهوا سمعة مصر

يا سلام

مصر لحد دلوقتي القتل والسبي والدبح والحرق والتعرية ماشوهتش صورتها

بس يا عيني الأطفال لما يروحوا سويسرا ويقولوا ظلمونا وحكموا علينا يبقى كدا بيشوهوا سمعة مصر

الموضوع عمال يتكرر يتكرر

لما حدث تفجير كنيسة القديسين ليلة رأس السنة 2010 2011

اتقسم المصريين جزئين

جزء قالك دا حبيب العدلي ووزارة الداخلية هما اللي مدبرين العملية دي عشان يسيطروا على البلد أكتر

استهبال

الجزء التاني لأ دول سلفين ومسلمين لا يمثلون الإسلام

لما جت الكنيسة التانية البطرسية في العباسية من كام شهر اتفجرت تاني برضو أعياد الميلاد

بروضو قالك لا يمثلون الإسلام والدواعش بيحاولوا يزعزعوا والإخوان و و و إلى آخره

طب ما ابص للتاريخ قبل الدواعش قبل الإخوان وقبل العالم دي مايكون لها دور في المجتمع

الأحداث دي كانت بتحصل قبل كدا ولا ماكنتش بتحصل

إيه اللي حصل في الزاوية الحمراء سنة 1981 ؟

حادثة في تعتيم كامل عليها

وتشويه للي حصل فيها

الرواية الرسمية السادات نفسه لما الأحداث اتضخمت

رئيس الجمهورية نفسه تطرق ليها

قال إيه بقى السادات ؟

قال إن كان فيه عيلة مسيحية غاسلة غسيل

وكان بينقط مايه وسخة على المسلمين فا اتخانقوا فا حصل مشاكل

ماحصلش طبعًا

جه بعد كدا وزير الداخلية أبو باشا سرد الأحداث

الأحداث القديمة قالت إن 9 أقباط ماتوا في خناقات يعني وبتاع

لكنن اللي حصل بجد إن فيه إشاعة تاني في منطقة الوايلي والزاية الحمراء

إن المسيحيين مشتريين قطعة أرض كبيرة وهايعملوا كنيسة

يا نهار اسود على المصيبة

هايبنوا كنيسة وهايصلوا لربنا شوف الفجر

في منطقة متروسة جوامع

فا إزاي الكلام دا يحصل

فا طبعًا الشباب الغيور ، لا السلفي بقى ولا الإخواني

بقولك الشباب العادي بتاع الأحياء

من نفسه بقى طلع حيو على الجهاد

لا إله إلا الله

وفضلوا ماشيين 3 أيام في حي الوايلي ومنشية الصدر

وأنا عارف الأحياء دي كويس

عارفها يعني

الوايلي ومنشية الصدر والزاوية الحمراء

ماشيين كدا يعلموا على بيوت المسيحيين زي الدواعش

يعني قبل  الدواعش ب 40 سنة أو ب 30 سنة

بيروحوا وبيعملوا على بيوت المسيحيين عشان يطالبوا بحرقها

وقد كان ، اتحرق 18 بيت وصيدلية ومحل تجاري ، محل ذهب

واتقتل مش 9 ، 81 قبطي

إيه اللي حصل بقى ساعتها ؟

تيجي الدولة يلا يا كنيسة هدي المسيحيين شوية مش عارف إيه

طب فين الناس اللي عملت الأحداث دي ؟

فين المئات اللي كانت بتطالب بقتلهم ؟

ولا حصلهم أي حاجة

روح للضعيف ، أصل الأقباط مابيشتكوش

إنت بس روح للبابا والأنبا والقمص والجماعة بتوع الكنيسة دول

وقولهم الوحدة الوطنية وعاش الهلال مع الصليب يا حبيبي

إنت تروح تتاتي السلفيين

تتاتي العنيفين ، لكن الطيب اللي مابيعملش حاجة

اللي بيقولك أنا بصلي لأعدائي

طب معلش مع احترامي لعقيدتكم يعني انتوا بتصلوا لأعدائكم

أمال احنا بنشد في شعرنا ليه ؟

طب بنحل الأزمة ليه ؟

طب ما تروحوا انتوا تصلوا واحنا نصلي معاكم لأعدائكوا

طب وهانحل المشكلة دي إزاي ؟

انا مابقولش نحلها بالكراهية ، مابقولش نحلها بالسلاح طبعًا لأ

ولا بالعنف طبعًا لأ

بس لازم نتكلم عن المواضيع ، لازم نفتح الملفات دي

لازم يكون فيه شجاعة من الطرفين

مش كل مرة الكنيسة تيجي وتقولك أصل مش عارف إيه

وفدا مصر واللي اتقتلوا فدا مصر

ماينفعش ، ماينفعش المنطق دا

لأن إنت لازم توقف اللي عمل كدا عند حده

لازم توقف الفكر اللي بيعمل كدا عند حده

الفكر دا جاي منين بقى ؟

عشان اوريك إن دا مش اول مرة يحصل

1952 قبل ثورة 52 حصل نفس اللي حصل في العريش دا في السويس

اتقتلوا ناس واتحرقوا ناس والمسيحيين

وخدوا جثثهم المحروقة وحطوها في الكنيسة وحرقوا بيهم الكنيسة

وجاء بعد كدا بعد ما الكنيسة اتحرقت وزير الداخلية في الوقت دا

جه راح للبابا كيرلس بيدله شيك ب 5000 جنية عشان ترميم الكنيسة

وبابا الكنيسة قاله ساعتها مش عايزين

دا برضو نفس المنطق بقى وفدا مصر ونطرمخ على الموضوع

ومافيش داعي والحاجات دي كلها

الظاهرة دي حديثة حصلت في القرن دا بس ؟

لأ مش حديثة ولا حاجة

خد عندك بقى وأنا جاي معاك لورا

سنة 1476 كان فيه شيخ للأزهر اسمه الشيخ الدمنهوري

شيخ الأزهر مش هاقولك بقى واحد شيخ أي كلام الشيخ الدمنهوري

كاتب كتاب مخطوطة اسمه الحجة الباهرة في هدم كنائس مصر والقاهرة

الكتاب دا جامع الأدلة ليه المسلم من حقه يهدم أي كنيسة مبنية على أرض الإسلام

وجايب بقى أحاديث صحيحة

شيخ أزهر لا تبنى كنيسة في الإسلام

حديث لا يترك دينان في جزيرة العرب

أو لأخرجن اليهود والنصارى من جزيرة العرب

وكل قوانين أهل الذمة بقى اللي انت عارفها

إن المسيحي لازم يتحجم ويوقف عند حجمه

ولا يوقر في مجالس المسلمين

ومايفرقش شعره من النص

ولازم يربط زنانير على وسطه كدا عشان المسلم يعرفه

ولو راكب حمار ومسلم معدي ينزل من الحمار

كل الإذلالت دي كلها متاخدة من آية حتى يعطوا الجزية عن يد وهم صاغرون

فا انت عندك أحاديث صحيحة وعندك قرآن بيقول الناس دول لازم تذلهم

لازم يعطيك الجزية وهو صاغر عشان عينيه ماتعلاش عليك

فا يحصل إيه بقى إن شيخ الأزهر يكتب إن هدم الكنايس جايز

زعلان إنت ليه من السلفيين اللي يجي بعد كدا ويطبق الكلام دا

هاتقول الكلام دا من زمان أوي واستاذ حامد

وخلاص ماعدش حد بيقول هدم كنائس

والاستاذ الدكتور أحمد النقيب استاذ التربية في كلية التربية في جامعة المنصورة

في سنة 2012 عمل إعادة طبع للكتاب دا

وعمله مقدمة بيحبب فيها الكلام المكتوب فيه

الأزهر بقى جه عمل إيه في الراجل دا

الأزهر يحبس إسلام البحيري ماشي

الأزهر يحبس ميزو ماشي

الأزهر منع بحكم الضبطية القضائية اللي واخدها سنة  2004

الأزهر منع كتاب الدكتور نصر حامد أبو زيد عن إصلاح الخطاب الديني

كتاب عن إصلاح الخطاب الديني كاتبه الدكتور نصر حامد أبوزيد اتمنع سنة 2013 في عصر السيسي

يعني بعد ما الإخوان ما مشيوا اتمنع الكتاب دا بتاع نصر حامد أبوزيد

لكن كتاب الحجة الباهرة في هدم كنائس مصر والقاهرة يعاد طبعه

ويتنشر عن دار الفاروق والناس تناقشه عادي

والناس تتعامل معاه بمنتهى الإرياحية عادي خالص

ويتدرس في كتب الأزهر نفسه

الإقناع في حل ألفاظ أبي شجاع لبتوع الثانوية العامة

بيتدرسلهم الكلام دا

لا تبنى كنيسة في الإسلام وتهدم ولو بنيت تهدم

بيتكتب بهذا النص يعني

وكيف تتعامل مع المسيحي وإزاي تزنق عليه في الشارع

وتضيق عليه وتقرفه في عيشته كل دا موجود في كتب الأزهر

فا إنت جاي دلوقتي يا رئيس الجمهورية تقوله والنبي تصلحلنا الخطاب الديني

فا القصة مستمرة

طبعًا للأمانة شيخ الأزهر عمل في 2004 فتوى نص فتوي يعني

قالك إنه يجوز بناء الكنائس في الإسلام إذا لم تكن تضر بالأمن القومي

أنا مش عارف يعني الكنايس هاتضر بالأمن القومي إزاي

شيخ الأزهر مش واخد باله إن الجوامع هي اللي بتضر بالأمن القومي

إن الجوامع هي اللي بتعلم الكراهية

إن الجوامع هي اللي بتدعي

هما المسيحيين في كنايسهم هما اللي بيقولوا اللهم يتم أطفال المسلمين ؟

هما المسيحيين في كنايسهم هما اللي بيقولوا لا تتخذوا المسلمين أولياء من دون الله ؟

هما اللي بيقولوا أقتلوهم حيث ثقفتموهم ؟.

هما اللي بيقولوا قاتلوا اللذين كفروا من أهل الكتاب حتى يعطوا الجزية عن يد وهم صاغرون ظ

هما اللي بيقولوا كدا ؟

لأ الجوامع اللي بيقولوا كدا

الجوامع هي اللي فيها خطورة على الأمن القومي ؟

لذلك انت عامل دلوقتي في وزارة الأوقاف الخطبة الموحدة

عشان إنت خايف إن لو الناس اتكلمت عن الإسلام اللي بجد هايحصل إرهاب

دا بالمنطق يعني  فا حكاية إن انت دا بيضر بالأمن القومي

إيه اللي بيضر بالأمن القومي

قصة اضطهاد المسيحيين في مصر قصة طويلة جدًا

يعني إحنا عندنا تاريخ رسمي غبي

بيقولك واللهي الأقباط دول كانوا مضطهدين من الرومان

وبعدين سيدنا عمرو بن العاص جه مصر حررهم من البتاع دا

وعاشوا في رفاهية بقى واداهم حرية

لأ مش حقيقي

خد اقرأ بقى المخطوطات القبطية نفسها القديمة

اقرأ المخطوطات البيزنطية القديمة

اقرأ الحاجات التانية غير التاريخ الإسلامي الرسمي

هايقولك إن فيه ثورات قبطية كانوا بيعملوها

اللي من ساعة وصول عمرو بن العاص ل الاسكندرية والفسطاط

إن الأقباط مش قابلين هذا الحكم

إن حصل في عهد المأمون 831 في عهد العباسيين ثورة اسمها ثورة الأقباط البشموريين

إن طهقوا من الضرايب المضاعفة

جزية وخراج وأكتر من المسلمين بيدفعوا فا تعبوا

فا جمعوا نفسيهم وسلحوا نفسهم وحبوا إن يستقلوا بالدلتا

وكان لسة غالبية الدلتا كان معظمها مسيحيين

جه جيش بعته الأول المأمون ماعرفش يخمد الثورة

جه جيش تاني ماعرفش لحد ما الخلفية المأمون بنفسه وعرف يخمد الثورة دي

إزاي بقى ؟

راح جايب البابا بتاع الكنيسة بتاعة الأقباط

تعالى بقى يا عم الحج مش عارف إيه

عاش الهلال مع الصليب وسكت الجماعة بقى ومش عارف إيه وبتاع

فا حصل الحل اللي بيحصل انهاردة

يا كنيسة سكتي شعبك وابتدي هجر المسيحيين من الدلتا

الدلتا انهاردة هي أثقل الأماكن اللي فيها مسيحيين

انهاردة المسيحين هاتلاقيهم في الصعيد ليه ؟

من التاريخ بتاع الثورة بتاعة البشموريين

شتتهم عن بعض

هجرهم تهجير قصري عشان مانسمعش ، عشان مايتكتلوش

عشان ماثوروش ضد الظلم اللي حاصل ضدهم

هو دا اللي حاصل لحد انهاردة

فا إنت تيجي تقولي ظاهرة جديدة والإخوان هما اللي بيثيروا الفتن

لأ دا تاريخ من ساعة محمد ما قال يعطوا الجزية عن يد وهم صاغرون

ماتغيرش فيه حاجة

عمر عبدالرحمن لما قال يجوز الغور عليهم وبتاع

كان بيتبنى ثقافة الغزو والقنص اللي الإسلام دخلها  بلادنا العربية

هو الإسلام كان بيجي يزرع ويعمل ويصنع ؟

لأ ما هو كان بيجي ياخد الخراج

مصر كان الخراج اللي عايشه عليه الدول التانية

لذلك مش بناء الكنايس اللي بيثير الفتن الطائفية

ومش الكلام عن العنف اللي احنا بنعمله دلوقتي هو اللي بيثير الفتن الطائفية

لأ الفتنة بتثار لما إنت بتصمم إنك ماتتكملش عن الاسباب الحقيقية للأزمة والمشكلة

ماتشاورش على النصوص اللي بتحرض على العنف وإنك تسميها بإسمها

ميزو اتحبس عشان قال إن مافيش حاجة اسمها حد السرقة

هو بيحاول يلمع صورة الإسلام برضو يعني

بس حتى دي صعب ليه ؟

لأن فيه نص في القرآن

طب نعمل إيه ما النصوص دي بتدعو للكراهية

فا الفتنة زي ما أنا قولت مش نائمة ولعن الله من أيقظها

لأ الظلم قائم ولعن الله من سكت عليه

هو دا المفروض يكون المكسيمة الجديدة اللي احنا المفروض نتعامل فيها مع الموضوع

وحكاية مش مصر اتعرت والفكر الذكوري بقى وعايزة دكر ويجي ويحللها

لأ مصر عايزة مساواة ، مصر عايزة مكاشفة

إن نواجه بعض بالحقيقة

عندنا كارثة ، عندنا احتقان

ما أعاقبش اللي اتظلم واللي انضرب واللي اتحرق واللي اطحن عشان غلبان ومابيثورش

وماقولش دائما إن الإهارب هو نتيجة للظلم

نتيجة للإضطهاد ، نتيجة للظروف الإجتماعية

لأن مافيش حد مضطهد دلوقتي أكتر من أقباط العريش

هل إنت تتخيل إن العريش

أقباط العريش هايبقى منهم إرهابيين ويعملوا أحزمة ناسفة ويولعوا في الدنيا عشان اتظلموا ؟

هل اليزيدين عملوا كدا بعد ما اتحرقوا وبعد ما اغتصبوا؟

لأ الإرهاب سببه فكر

فكر نابع من أساس نصوص دينك

مش من تفسير العلماء لنصوص دينك

لأ من نصوص دينك نفسها

وطول ما احنا عمالين نلف وندور حوالين بعض

ومش عايزين نعترف المصدر فين عمرنا ما هانحله

لأن المشاكل بتتفاقم والعنف بيزيد

والإرهابين بيكسبوا أرض يوم بعد يوم

بعد ما كنا بنقول مش أحسن ما نبقى زي العراق وسوريا

ابتدت الجزء من مصر كاملًا بقى عراق وسوريا

سيناء بقى خلاص عراق وسوريا

هانفضل ساكتين بقى لحد إمتى ؟

هانفضل نطرمخ لحد امتى

يبقى مش أنا اللي بثير الفتن

اللي بيسكت عن الحقيقة هو اللي بيثير الفتن

نراكم في حلقة قادمة


Download text file

Box of Islam 080

You may also like

صندوق الإسلام  009 : لماذا طعنت قريش في نسب محمد؟
أهلاً بيكم في الحلقة التاسعة من سلسلة حلقات صندوق الإسلام الصندوق [...]
34 views
صندوق الإسلام  008 : لُغز كتابة سيرة إبن إسحق ولُغز إختفائها فيما بعد
أهلاً بيكم في الحلقة التامنة من سلسلة صندوق الإسلام طلعنا الحلقة اللي [...]
24 views
صندوق الإسلام 007 : ماهي وصية محمد الاخيرة قبل وفاتة
أهلاً بيكم في حلقة من صندوق الإسلام طلعنا الحلقة اللي فاتت من الصندوق [...]
11 views
صندوق الإسلام 06 : من قتل محمد؟ ولماذا؟
أهلاً بيكم في الحلقة السادسة من سلسلة حلقات صندوق الإسلام طلعنا من [...]
2 views
صندوق الإسلام 05 : نقاط التحول فى حياة محمد
أهلاً بيكم في الحلقة الخامسة من سلسلة حلقات صندوق الإسلام النهارده [...]
1 views
صندوق الإسلام 04 :  إختراع شخصية النبي محمد
 قبة الصخرة في القدس قبة الصخرة تأسست ما بين 691 وبين 693 ميلادية قبة [...]
5 views
صندوق الإسلام 03 : هل كان هناك نبي إسمة محمد؟
اهلا بيكم في الحلقة الثالثة من سلسلة صندوق الاسلام الحلقة دي هتبدا [...]
1 views
صندوق الإسلام 02 : الإسلام والمافيا الجزء الثاني
الحلقة الثانية من صندوق الاسلام: اتكلمنا في الحلقة اللي فاتت عن [...]
0 views
صندوق الإسلام 01 : الإسلام والمافيا
اهلا بيكم في الحلقة الأولى من سلسلة حلقات صندوق الاسلام، صندوق الاسلام [...]
5 views
Box of Islam Episode 2 صندوق الإسلام - الثانية :  الإسلام والماڤيا - الجزء الثاني
- أهلا بكم في الحلقة الثانية من سلسلة حلقات صندوق الاسلام - اتكلمنا في [...]
18 views

Page 13 of 14

اترك تعليقاً