صندوق الاسلام الحلقة 91: هل غالبية المسلمين فعلاً مسالمين؟

أهلًا بيكم في حلقة جديد من صندوق الإسلام ونواصل الحديث عن معضلة إصلاح الإسلام

بذكر حضراتكم مرة تانية أنا عامل كتاب مع بروفيسور فلسطيني نمساوي عايش في ألمانيا

هو إللي بيدرب الأئمة إللي هيخطبوا بقى في المساجد الألمانية وكدة

وعن إمكانية إصلاح الإسلام وطبعًا لما بنتكلم في إصلاح الإسلام

مسألة علاقة الإسلام بالعنف هي تقريبًا دايما بتكون أول حاجة إحنا بنتكلم عنها

والراجل طبعًا بيحاول يقدم تصور جديد بقى يقدمه للأئمة ويقدمه للمدارس

إن يدرس الإسلام على أساس إن الإسلام مش دين عنف وعلى أساس إن مفهوم الجهاد في الإسلام في سوء تفاهم حواليه

وطبعًا بيستخدم النظرية إللي دايمًا بنسمعها من الأخوة المصلحين يعني المدافعين عن الإسلام

إنه لأ الحرب في الإسلام للدفاع فقط والجهاد في الإسلام مش مقصود بيه الحرب ضد الكفار

وإنما الجهاد الأكبر الجهاد الأصغر هو الحرب لكن الجهاد الأكبر هو جهاد المرء ضد نزواته

وضد غروره حاجة روحانية كدة جميلة

فإحنا بنتناقش في الكتاب يعني عن مفهوم الجهاد

قولتله بلاش الجهاد خالص أنا مايهمنيش موضوع الجهاد دة طبعًا

مش المصطلح هو المشكلة, المشكلة يعني في في  مصطلح تاني في القرآن اسمه القتال

واضح مافيهوش بقى ﴿ كُتِبَ عَلَيْكُمُ الْقِتَالُ وَهُوَ كُرْهٌ لَكُمْ)

من أول الآيات إللي جت فأنت تقولي دفاع عن النفس

هقولك في حاجة اسمها ﴿ كُتِبَ عَلَيْكُمُ الْقِتَالُ وَهُوَ كُرْهٌ لَكُمْ)

هو أنا لو حد بيهجم على في بيتي أنا محتاج أصلًا حد يحفزني أو يؤمرني إني أدافع عن نفسي؟

دة حاجة تلقائية أنا هشيل أي سلاح موجود ولا غطا حلة حتى وهدافع عن نفسي

لكن لما يقولي ﴿ كُتِبَ عَلَيْكُمُ الْقِتَالُ وَهُوَ كُرْهٌ لَكُمْ)

يبقى يعني هو بيغصبني إن أنا أحارب بيحطني في موقف أنا مش عايزه

بيحطني في موقف أنا مش عايزه فإللي بيدافع عن نفسه مش محتاج طبعًا

إن هو يتلقى أوامر إلهية تقوله قوم دافع عن نفسك مافيش كدة

دي حاجة طبعًا تاريخ الغزوات بتاع محمد مبينلنا إن ما بين 80 و90 غزوة مافيش ولا غزوة  منهم وقعت على أرض المدينة

علشان علشان فكرة إن هي حرب دفاعية دفاعية بتدافع عن نفسك في دومة الجندل وبني المستلق

وفي الأراضي البيزنطنية وفي جنوب الجزيرة وشمال الجزيرة؟

دة دفاع إيه إللي عن النفس إللي عمره ما حد إلا في الغزوة إللي هي يعني بتاعت الخندق أو الأحزاب

إللي بيقولوا هما كانوا جاين وهايحصروه في المدينة بس دي حتى ماحصلتش

يعني حتى ماحاربوش رجعوا مشيوا ومادخلوش حتى المدينة

طب لما 90 غزوة أنت إللي رايح لهم تبقى بدافع عن نفسك إزاي يعني؟

وفي حد بيدافع عن نفسه يروح متوسع؟ بيدافع عن نفسه يروح مسيطر على قبيلة؟

طب انت بدافع عن نفسك علشان مايهجموش عليك في المدينة تروح تاخد تسبي نسائهم لية؟

وتروح تفرض عليهم الجزية والخراج لية؟

ماهو منطق غريب برضو الدفاع عن النفس يعني دلوقتي أنت عندك إسرائيل هاجمت سيناء

وخدت مصر وخدت سيناء إحلت سيناء

ماشي أنت دلوقتي عملت ضربة مضادة وروحت بكل قوتك حاربت قتلت إسرائلين وحررت سيناء وإخدتها

تيجي أنت بقى رايح واخد تونس وواخد الليبيا وواخد الأردن وواخد لبنان وتقول دة أنا بدافع عن نفسي!

ماهو منطق غريب دافعت عن نفسك ترجع لقواعدك في حدود مدينتك

لكن طبعًا الجماعة المُصلحين إللي هما معظمهم ناس محترمين جدًا

سواء كان إسلام البحيري أو مهند خورشد أو حتى جزئيًا عدنان إبراهيم رغم إن أنا عندي تحفظات على عدنان إبراهيم

عندهم يعني شيء من الحرج لأن هو بيحاول يبيع إسلام في زمن توصل إلى تعاليم إنسانيه

وتوصل إلى مفاهيم مساوة ومفاهيم إن العنف دة شيء قذر لا يمجد

أي حد يمجد العنف إنهاردة الناس بتبصله نظرة إحتقار وتقول عليه فاشي

فهو عايز يبيع الإسلام البضاعة القديمة في غلاف جديد فدي أزمته دايمًا

إنه دايمًا يحاول يطفي صبغة إنسانية على الإسلام بأثر رجعي

فيقولك لأ دة النبي دة مجرد دفاع عن النفس

لية ماتقولش إن هو العصر بتاعه كان دة بيغزو على دة ودة بينط على دة ودة إللي بيطول مرات دة بياخدها وإللي ..وكدة

مش يعني مش مفهوم إنساني هو إللي بيقود هذة الحرب

يقولك لأ أصل كان بيقولهم ولا تقطعوا شجرة ولا تغوروا

الحرب في الإسلام مرت بمراحل ومفهوم العنف في الإسلام مر بمراحل

ماينفعش تيجي تقولي آيه من مكة أيام ما كان بيقولك (دْعُ إِلَىٰ سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ)

وتقول الإسلام مالوش علاقة بالعنف لأ كان قالها في موقف معين الموقف خلص ولما بقة معاه سلاح

الآيه دي إتمحت من الوجود ماكنش في حاجة اسمها الموعظة الحسنة ولا دعوة حتى

ماكنش في دعوة كان في أسلم تسلم كان فية السيف أو الجزية أو القتل أو إنك تسيب المكان وتمشي حتى

فما إتطور طبعًا  في البدايات  كان يقولهم أعملوا كذا وماتغوروش بليل وبتاع

بعد كدة كان بيقولهم (فَاضْرِبُوا فَوْقَ الْأَعْنَاقِ وَاضْرِبُوا مِنْهُمْ كُلَّ بَنَانٍ)

(وَقَاتِلُوا الْمُشْرِكِينَ كَافَّةً كَمَا يُقَاتِلُونَكُمْ كَافَّةً)

خلاص بقى حرب شاملة هما بيحاربكوا وأنتوا بتحاربوهم مافيش بقى حكاية لا أنا ضد العنف وبتاع

بس المنطق إن هو لية  العنف مازال راسخ؟

يعني كل التعاليم إللي في الماضي, أفكار الحروب خلاص عفا عليها الزمن

والبلاد إبتدت تتعاون مع بعض حسب بقى القانون الدولي

حسب مصالحها والله أنا ليا مصلحة مع دولة زي فرنسا زي ألمانيا زي بولاندا

فرنسا وألمانيا قطعوا بعض حروب, هولاندا وأسبانيا حروب طاحنة

لكن في نهاية المطاف خلاص الأيدولوجيات دي راحت والمصالح حتمت إن الناس دس تقعد وتتعاون مع بعض

إيه إيه سبب بقاء فكرة الجهاد الإسلامي؟

 إللي هي موجودة في القرآن إن ربنا جعل من الكراهية واجب مقدس

إن ربنا بيقول للمسلمين دة أنا بحارب معاك

فَلَمْ تَقْتُلُوهُمْ وَلَٰكِنَّ اللَّهَ قَتَلَهُمْ ۚ

ربنا قتال قتله في القرآن (وَمَا رَمَيْتَ إِذْ رَمَيْتَ وَلَٰكِنَّ اللَّهَ رَمَىٰ)

ربنا بقى هو إللي بيرمي عليهم بقى سواء تراب أو بتاع

ربنا إللي بيرمي طيب ماهو دة إنه بيقولهم في غزوة بدر إن ربنا ممدكم بثلاث ألاف من الملائكة

الملايكة كمان جعلهم الناس الطيبين إللي المفروض لا ليهم لا في الطور ولا في الطحين هة

ربنا عمل منهم قوات صاعكة ومشاه ومركبات

إيه دة إيه المنطق دة؟ مين مين إللي عظم بقى وقدس فكرة الحرب طب ما أنا لو إله وشايف

الحرب دي مجرد ضرورة للدفاع عن النفس هاقولك خلاص حارب ودافع عن نفسك وبرافو عليك وخلاص

مش هشجعك وأمجد الحرب بهذا الشكل مش هخلي الشهيد إللي بيموت في الحرب

هو أعلى درجات مع النابيين والصديقين

مش هخلي مش هدي دايمًا أوامر وأنا قاعد كإله بقى في السما

ناسي بقى إللي بيحصل في بلاد اليونان وإللي بيحصل في الفرس وإللي بيحصل في أوربا

وإللي بيحصل في الصين وفي اليابان ومركز بس على إيه

بتوع مكة وبتوع المدينة مين إللي كسب إنهاردة ياولاد؟

زي ريال مدريد وبارشيلونة كدة إنهاردة ربنا بقى عمال إيه

مشجع برشيلونة وبيكرة ريال مدريد وسايب كل الفرق

مش أنت إللي خالق كل الفرق؟ طب ووادي دجلة مابتبصش على وادي دجلة لية؟

أو العكس إللي حاصل إن ربنا حتى ناسي برشيلونة وريال مدريد ومركز بس في وادي دجلة

وأسمنت أسيوط عملوا إيه مع بعض؟ مركز هو فيهم الأثنين بس  وادي دجلة وأسمنت أسيوط

عملوا إيه إنهاردة ياولاد؟ طب وادي دجلة يالا يالا شوط يالا ياحبيبي جميل

اه ه ه شنو هادا ياعمري وربنا عمال يشجع بقى الإيه وادي دجلة

طب الفرق التانية أنت سايب كل دة؟ وعمال تركز دة بيحارب ضد دة؟ ومين إللي كسب وشجع دة؟

ودة عن دة ويقوله  أنا  هاجيلك ألعب معاك كمان وينزل ربنا يشوط بنفسه يجيب أجوان بنفسه

إيه إيه الأستهبال دة؟

طب مادة إللي بيخلي الراجل المتطرف إنهاردة يتعامل مع قضية العنف والحرب دي

إن دة واجب مقدس ربنا بنفسه جاي مشملل نفسه وجاي يلعب معايا

يقتل معايا ربنا إيده ملوثه بالدم ملوثه بالدم في القرآن بيقتل

أنت زعلان لية بقى من المؤمن إللي بياخد يطبق دة

فيجي طبعًا كل دة طبعًا نرجع بقى للحدوتة بتاعت

لأ أصل إرهاب إنهاردة وعلى فكرة العنف إنهاردة مش الإرهاب بس

يعني دايمًا  لما بتكلم في العنف يروح جايلك ال يعني  النظرة إن إيه

لا لأ الإرهاب دة أولًا ظاهرة جانبية خالص داعش طبعًا لا تمثل الإسلام

دي مفروغ منها عندهم ويشوف الحجة بقى إللي بتيجي من الجماعة المُصلحين يقولك إيه

عد عدد الإرهابيين إللي في داعش وإللي في القاعدة وإللي في بوكو حرام وإللي في حماس

أي جماعات إرهابية بقى وعد باقيت المسلمين هتلاقي إن باقيت المسلمين 99% ومافيش غير 1% بس هما إللي عانفين

ودة طبعًا خُداع لأن الحسبة مابتتعملش كدة أنت عندك طبقات من العنف الإسلامي

أنت عندك طبعًا الناس يعني تقوم من النوم الصبح كدة تقولك عايزين نقتل الكفار

أكيد إن دي نسبة محدودة جدًا من المسلمين إللي هو مجهز سلاحه وقايم عايز يروح يقتل

دول فعلًا هما بتوع داعش والقاعدة وبوكو حرام بس

بس بص على باقيت الطبقات إللي بتحمي دول وإللمي بتقدملهم الفكر وإللي بتدع طلوعهم

هتلاقي إسلاميين بقى إللي هما أعضاء الأخوان والسلفيين وأعضاء الجماعات الإسلامية

والمتعاطفين مع الجماعات الإسلامية هتلاقي دول بالملايين,هتلاقي دول بالملايين

إللي هما بيدعموا إن داعش تروح تقتل, بيدعموا القاعدة

هو مابياخدش سلاح بنفسه ويروح يقاتل معاهم بس بيدعهم هذة الفكرة

وورا الطبقى دي في طبقة من المسلمين المتدينين إللي هما الطبيعين

المتدين هة بيقول قال الله وقال الرسول وفكريًا حتى لو مابيقولش داعش كويسة

بس فكريًا ماشي على هذا النهج الأزهر ينضم لدول ناس كتير من إللي بتروح تصلي في جوامع ومالهومش في الساسية

بس هو يقولك اه لازم نطبق شرع الله ونقطع إيد السارق

ولازم نجاهد في سبيل الله ونحتل أوربا علشان نحقق وعد ربنا

ربنا وعدنا إنه هيورث الأرض عبادة الصالحين

فمايقدرش ربنا يخلف وعده فماينفعش أوربا تفضل كدة متقدمة لأ لازم إحنا إللي هنتقدم وهنكسبها ونحارب ضدها

فلذلك مانقدرش نتخلى عن فكرة الجهاد لية؟

لأن الجهاد هو إللي هيوصلنا لهذا الطريق

هي أمريكا بتحارب فين دلوقتي؟

هيقولك بتحارب في أفغانستان وسوريا والعراق إللي لسة فكرة الجهاد شامة نفسها فيهم

غير كدة بتقولك مابتحاربش أمريكا فيبقى لازم الجهاد علشان خاطر نوصل للحلم دة

فأنت عندك الطبقة دي من المسلمين أنت كدة عديت نص المسلمين تقريبًا

هتلاقي النص التاني من المسلمين ناس كدة عايشين لا ليهم لا في التور ولا في الطحين

وناس طيبين أو مش طيبين بس عايشين حياتهم بعيدًا عن الدين وعن تعاليم الدين

أنت بقى تيجي تقولك شوف الراجل دة بقاله 40 سنة ماقتلش حد

الإسلام يبقى دين سلام

هو دة منطق؟ أنت ماتقدرش دلوقتي كواحد بتعمل بحث تثبت إن المسلم المسالم دة مسالم علشان مسلم ماتقدرش تثبتها

بس لما يجي يقتل واحد وبيستخدم آيات من القرآن تقدر تثبت إن هو عمل دة بسبب دينه

سهلة يعني القصة لكن إللي هو مسالم دة لو واحد طيبق ام في الأتوبيس لوحدة ست كبيرة

هة وقالها أقعدي يأمي هل أنت تقدر تثبت إن دة عمله علشان مسلم؟

ولا عمله علشان إنسانيته؟ ولا عمله علشان موقف معين تجاة هذة السيدة إنساني تعاطف إنساني؟

ماتقدرش تثبت. لو هو قام من الكرسي بتاعه وقال للست كدة أقعدي يا أمي مكاني

الله وأكبر ولله الحمد ممكن نقول ممكن هو كدة عملها بدافع إسلامي

لكن إللي بيقتل هو إللي بيعمل كدة إللي بيقتل إللي بيفجر الأتوبيس إللي قاعده فيه الست العجوزة

بيفجره بدافع إن  كدة بيعمل حاجة لربنا

ربنا إللي نزل الحرب بنفسه وإللي حارب بنفسه وإللي لوث إيده بالدم

وإللي مش محايد, مش محايد بيكرة بشر خالقهم وبيحب بشر خالقهم وبيحرض دول على دول

ودي فكرة التحريض المقدس الكراهية المقدسة هي دي الأساس

هو دة السبب إن البروتوستانت والكاثوليك في أوربا إتصلحوا لية؟

لأن حيدوا الكراهية المقدسة إللي بينهم ووصلوا لطريقة إن نعيش مع بعض

دلوقتي لية الشيعة والسنة بقالهم 1400 سنة ماحصلش سلام؟

حصل هدنة وسكوت أحياناً لكن الحروب مستمرة لية؟

لأن  الكراهية المقدسة هي إللي بتغذي دة وهي إللي بتغذي دة, ودة بتدي حجة ودة بتدي حجة

ودة يجيب آيه ودة يجب آيه, ودة يجيب حديث ودة يجيب حديث ومابنخلصش

لكن لو حد قالهم ياخونا مش مهم ربنا قال إيه في القرآن مش مهم الأحاديث بتقول إيه

المهم إن أنتوا نزفتوا  المهم أدوا مستقبل لأولاكم

لأ. نقطة طبعًا تانية من إللي دايمًا بنتناقش فيها في الغرب أسباب التطرف

أسباب التطرف وخاصتًا تطرف الشباب المسلمين في ألمانيا ظاهرة يعني في أوربا بصفة عامة

الناس مش قادرة تفهمها أنت راجل مانتش عايش في مجتمع فيه حروب

أنت في مجتمع بيديلك فرصة إنك تبقى أدامي

بيديلك فرصة إنك لو درست وإشتغلت هتاخد وظيفة كويسة

هتقولي في عنصرية هاقولك موجودة بحكم إن أنا عشت هناك في ألمانيا وتعرضت لمواقف وكل حاجة

بس الحد الفيصل بقى هو أنت بتتعامل مع العنصرية إزاي؟

 أولًا معظم الناس دول مش عنصريين في بعضهم عنصرين أكيد مانضحكش على نفسينا

لكن أنا بتعامل مع العنصرية إزاي؟ هل أنا أقل عنصرية من الناس دي؟

هل أنا بطالبهم إن هما يحبوني ويحترموني ويوقروني ويحترموا أداميتي

هل أنا بحترمهم؟ وبحترم أداميتهم؟ وبحترم أسلوب حياتهم؟

ولا بقول عليهم كُفار؟ الأسر إللي بتربي أطفالها إن دول كافر سواء الفرنساوي أو الأمريكي أو النمساوي أو الألماني

خلي بالكم دول كُفار خلي بالكم دول أنجاس

ما طبعًا أنا هبتدي كطفل أنشأ وأنا متوجس منهم وبكرهم ومتحفز ضدهم

فهو هيشوف دة في نظرتي وتعاملي هيقابلني بكراهية وهيقابلني بعنصرية فدة بيزود

 الكراهية زي المرجيحة كدة لما بتحط كراهية على الجزء دة من المرجيحة الجزء دة بيعلى

لما بتحط كراهية على الجزء دة من المرجيحة الجزء دة بيعلى

إذًا الأول إيه إللي بيخلي الشباب دول؟

بيقولك لأ أصل هما بيتعرضوا للعنصرية هاقولك على حاجة أنا عشت في ألمانيا

في أمريكا في سويسرا وشوفت طب ما في جنسيات تانية برضو بيتعرضوا لنفس المشاكل

إللي هي أزمة الهوية والعنصرية والتهميش ومشاكل في الحصول على عمل

هتلاقي فتنامين عايشين في أوربا, هتلاقي روس مهاجرين, هتلاقي مكسكيين من بيرو وأمريكا اللاتينية

بيتعرضوا لنفس المشاكل لية ماحدش فيهم بيفجر نفسه؟

لية ماحدش فيهم بيبقى إرهابي؟ لية ماحدش فيهم بيروح يدبح الناس في الشوارع ويقول الله وأكبر؟

يعني ما هما بيتعرضوا لنفس أكتر مجموعة بتتعرض للعنصرية في أوربا الأفارقة السود

إللي هما في الغالب بيبقوا من دول مسيحية مثلُا

لية الأفارقة السود دول مابيروحوش يفجروا نفسهم أو يعملوا أعمال إرهابية؟

لية لما أفريقي أسود منهم بيروح يعمل عملية إرهابية تكتشف فجاءة إنه مسلم؟

ما هيبقى أهو لما الأفريقي الأسود هو إللي بيفجر نفسه وهو مسلم

لكن الأفريقي الأسود المسيحي مابيفجرش نفسهولا الأفريقي الأسود إللي هو دينه يعني إللي هما

الأديان البدائية بقى فودو ولا الشمان مابيفجرش نفسه

طب ما لازم تشوف المشكلة في الإسلام بقى وفي العقيدة

لما تلاقي الإرهاب الإندونيسي بيفكر زي الإرهاب الفلسطيني بيفكر زي الإرهاب المصري

زي الإرهاب السعودي زي الإرهاب المغربي يعني من إندونسيا للمغرب

شوف كام ثقافة وحضارة مابينهم وجبال وبحور؟

لكن بيفكر نفس التفكير وبينفذ دة يبقى الأزمة فين بقى؟

يبقى ماتقوليش الأزمة في … لما صوماليا الفقيرة والسعودية الغنية الإرهاب فيهم بنفس الحجم

يبقى ماتقوليش دة الأزمة الإقتصادية, لما إندونسيا إللي هي مش عربية خالص وإللي هي مودرن

برضو فيها إرهاب وفيها تطرف والمغرب فيها إرهاب وفيها تطرف مع البعد الحضاري الكبير بينهم

يبقى ماتقوليش لأ دة المشكلة بقى في التعليم والثقافة والإقتصاد

طبعًا العوامل دي بتلعب دور بلا شك أكيد

أكيد الطفل إللي بيتعرض لعنصرية بيحصل كذا معاه

بس دي زي إنك بتحط بنزين على النار ب النار أساسًا جاية منين؟

من العقيدة, من العقيدة إللي بتفرق المؤمن عن الكافر

طبعًا الطفل إللي بيتعرض لعنف في أسرته طبعًا بيتعود على العنف من وهو صغير بيشوف أبوه بيضرب أمه

طب مين إللي قال لأبوه يضرب أمه؟

ما القرآن بيقوله وأضربهن إذًا الإسلام ليه دور في العنف الأسري

إللي الطفل بيتعلم إن أول حل هو العنف

طيب طبعًا ثقافة الخوف والتخويف والترهيب بتخلق شخصيات مهزوزة بتؤدي إلى بعد كدة للعنف

طب مين إللي خلق ثقافة الخوف؟ مين إللي قال الثعبان الأقرع؟ مين إللي قال جهنم؟

مين قال  هيبدل جلودهم؟ ما هو دة برضو من القرآن يبقى ثقافة الخوف بتخش في التربية الإسلامية

بتخلق شخصية مهزوزة بتبقى الشخصية دي فيما بعد سهله

إن هي إنقياديه إنها تبقى إرهابية, لما يبقى تقسيم العالم والكراهية ثقافة الكراهية

جاية منين؟ ماهو لما حد يقولك دة كافر ربنا بيقول أقتلوهم,ربنا بيقول هيحرقهم في نار جهنم

ربنا بيقول عليهم نجس. أنا أنسى كل دة وأبقى صديقهم؟

وعادي وأهلًا يامايكل وبتاع ويقعدوا بقى ومافيش أي مشاكل بينهم؟

لأ طبعًا دة بيخلي ثقافة الكراهية إذًا فالعنف والإرهاب الإسلامي مجموعة من العوامل

أهمها, أهمها العقيدة, أهمها النص المقدس, أهمها الكراهية المقدسة

إللي الدين بيبثها في نفوس الشباب إن الكراهية تكون فضيلة

دة شيء من أكبر وأكبر الجرائم في تاريخ الإنسانية إنك تحول الكراهية إلى فضيلة

إنك تحاول تدي الإنسان الإنطباع إنه حين يكره ربنا يحبه

دة منطق غير مقبول بالمرة وهو دة المنطق إللي بيقود إلى العنف وإللي بيقود إلى الإرهاب

وصحيح لازم نصلح التعليم, وصحيح لازم نصلح الإقتصاد, ولازم نقضي على ظواهر زي العنصرية و و إلى أخرة

مافيش شك بس أهم عامل من عوامل تحيد العنف هو تحيد النصوص الدينية التي تدعو إلى العنف

ماتقوليش بس نحطها في السياق التاريخي بتاعها. لأ

بعد ما نحطها في السياق التاريخي نقول بح الآيات دي مالهاش دور في التربية والتعليم

الآيات دي تتحط كدة في بترينة تدخل المتحف يخش المسلم كدة يقول ياااة

دة إحنا كان زمان عندنا الآيات دي والبتاع دة

تستخدم بقى السيرة بتاعت محمد كاكورنولوجي بتاعت حرب

يعني إيه كتاب تاريخ بيحكي تاريخ حروب متاخدوش بقى كتاريخ مقدس

وعندنا أزمة إحنا في الإسلام إن مش بس الله مقدس, ومحمد مقدس, والقرآن مقدس

لأ دة التاريخ نفسه كمان مقدس وكل القداسات دي أو القدسيات دي لازم تتنزع عن هذة الأشياء

علشان الإنسان يتعامل بمنطق وعقلانية مع النصوص وبالتالي يستطيع أن يقوم بتحيدها

نراكم في الحلقة القادمة.


Download text file

Box of Islam 091

You may also like

مين اللي سرق مصر، االحلقة الحادية عشر ، أولاد حارتنا
مين اللي سرق مصر مين اللي سرق مصر مين اللي سرق مصر مين اللي سرق مصر [...]
9 views
مين اللي سرق مصر، الحلقة العاشرة ، مصر السلطة بلدي
مين اللي سرق مصر مين اللي سرق مصر مين اللي سرق مصر مين اللي سرق مصر [...]
6 views
مين اللي سرق مصر، الحلقة التاسعة، الفن في مصر
مين اللي سرق مصر مين اللي سرق مصر مين اللي سرق مصر مين اللي سرق مصر [...]
11 views
مين اللي سرق مصر، الحلقة الثامنه، المصري الحرفي والمصري بلطجي
مين اللي سرق مصر مين اللي سرق مصر مين اللي سرق مصر  مين اللي سرق مصر [...]
2 views
مين اللي سرق مصر، الحلقة السابعة، كنيسة خاتم المرسلين
مين اللي سرق مصر مين اللي سرق مصر مين اللي سرق مصر مين اللي سرق مصر [...]
4 views
مين اللي سرق مصر، الحلقة السادسة، المرأة المصرية
مين اللي سرق مصر مين اللي سرق مصر مين اللي سرق مصر مين اللي سرق مصر [...]
2 views
مين اللي سرق مصر، الحلقة الخامسة ، مصر السماحة و مصر البجاحة
مين اللي سرق مصر مين اللي سرق مصر مين اللي سرق مصر مين اللي سرق مصر [...]
3 views
مين اللي سرق مصر، الحلقة الرابعة، ، دول الفراعنة الكفرة
مين اللي سرق مصر مين اللي سرق مصر مين اللي سرق مصر مين اللي سرق مصر [...]
6 views
مين اللي سرق مصر ، الحلقة الثالثة ، المواطنة والانتماء في مصر
مين الي سرق مصر مين الي سرق مصر مين الي سرق مصر مين الي سرق مصر مين [...]
8 views
مين اللي سرق مصر ، الحلقة الاولى ، مين إللي سرق مصر؟
مين اللي سرق مصر مين اللي سرق مصر مين اللي سرق مصر مين اللي سرق مصر [...]
22 views

Page 2 of 14

اترك تعليقاً