صندوق الاسلام 43: أمراض الفاشية الاسلامية

أهلاً بيكم في حلقة جديدة من برنامج صندوق الإسلام

سنواصل اليوم الحديث عن أمراض الفاشية الإسلامية

الفاشية بصفة عامة مصابة بطبيعتها بعدة أمراض تصيب أفرادها مع قيادتها مع مرور الوقت

أول مرض من أمراض الفاشية هو مرض العزلة والعزلة بطبيعتها تؤدي إلى الخوف ونظريات المؤامرة

وللتغلب على الخوف يأتي مرض تعظيم الذات ولعن الأخرين

والعزلة وتعظيم الذات ولعن الأخرين يؤدوا إلى مرض زهايمر التاريخ

يعني إنك تخرج خارج التاريخ وتنسى ما حدث في التاريخ وتبدأ في خلق تاريخ خاص بيك إنت بس لا علاقة له بتاريخ العالم وتاريخ الأمم والشعوب

وفي نهاية سلسلة الأمراض هذه تأتي العدوانية والعنف العنف ضد الذات والعنف ضد الأخرين

والأرهاب هو يعني قمة أو الإنفجار الكبير لهذه الأمراض

لذلك داعش ليست عرض سريع أو ليست ظاهرة حديثة وإنما هي يعني تتويج لقصة طويلة من العزلة الإسلامية ومرض تضخيم الذات ومن النرجسية

الإسلام ولد في كهف ولد في غار غار حراء

محمد لسبب أو لآخر ترك قومه وترك بيته وإبتدى يتعبَّد في غار وإبتدى يرى أشياء

دايماً الإنسان اللي عنده مشكلة مع قومه بيحاول ينعزل عنهم ويحاول يلاقي حل في عزلته

ويبتدي هذا الشخص يتخيل أشياء بتحدثله أشياء عظيمة أشياء مخيفة

زي المَلَك اللي دخل عليه وخنقه وقاله إقرأ، قاله ما أنا بقارئ فخنقه تاني وقاله إقرأ، قاله ماقدرش

طب ما مرة كانت كفاية يعني لأ يخنقه 3 مرات ويقوله إقرأ ما أنا بقارئ

وفي هذا الكهف نشأ دين الإسلام، العزلة هي كانت أول ختم أول علامة من علاماته

وفي تصوري أنا الدين الإسلامي حتى الآن لم يخرج من هذا الكهف

ومازال محبوس ومازال مخنوق ومازال لا يرى النور الحقيقي

القرآن بيحكي قصة أصحاب الكهف اللي إحنا عالجناها في حلقة من الحلقات

اللي هو مقتبسها من قصة ليعقوب السروجي قصة مسيحية عن فتية آووا إلى كهف ضرب الله على أعينهم وقلوبهم فناموا في الكهف 3 قرون من الزمان

ولما صحيوا من النوم خرجوا إلى المدينة فلقوا الدنيا كلها متغيرة

والعملة اللي معاهم ماحدش عرف يستخدمها خلاص هذا الزمن ولاَّ

اللغة اللي بيتكلموها  تتطورت ولغات تانية دخلت للمدينة

فحسوا إن هم في عالم غريب، المسلمين تاريخهم تقريباً بيحكي نفس القصة

خاصةً باقلنا حوالي 1000 سنة خارج التاريخ منعزلين عن التاريخ

بنصنع تاريخ بتاعنا إحنا كده عمال نمجد صلاح الدين ومش عارف مين والعصر الذهبي والأندلس وبتاع

ومحلك سر في العصر الحديث مابنتحركش

عمال نلعن في الإستعمار من أيام الحروب الصليبية

والإستعمار وإحتلال فلسطين لكن إحنا مابنشوفش إحنا عملنا إيه خطأ في تاريخنا

والعزلة دي سببتلنا مشاكل لا حصر لها

إن إحنا مش عارفين إيه اللي حصل في العالم إحنا حاسين إن العالم كله متآمر علينا

أي حاجة تحصل العالم بيتآمر علينا

ودي يعني صفة من صفات الشخص اللي هو لا عنده ثقة في نفسه ولا عنده شئ أصلاً

فهو عشان ماعندوش شئ فأهم شئ عنده هو تصوره لكراهية العدو ليه

لأن العدو ده بيديله قيمه هو أصلاً مالوش أي قيمة

فـ لما إنت لما يكون طالب في المدرسة فاشل وبيجيب أسوأ الدرجات وبيحاول يستعيض عن ده إزاي؟

يقولك الأستاذ مستقصدني يبقى كده يعني زاد من حجمه مادام الأستاذ مستقصده يبقى أكيد الطالب ده مهم

حصل أو يعني قصة بيحكيها الفليسوف الإغريقي أفلاطون في كتاب الجمهورية وتحديداً في الفصل السابع بيحكي قصة أصحاب كهف بطريقة تانية

بيطلب من القارئ إنه يتخيل أن يكون هناك مجموعة من البشر محبوسين في كهف والإضاءة فيه خافتة جداً وهؤلاء البشر مكبلين ومجبرين على البقاء في هذا الكهف

لا يرون شيئاً إلا الظلال التي يلقيها الضوء الخافت هذا على الحائط أمامهم

فيشوفوا ظلال يشوفوا سلاسل بتتحرك يتكلموا فيرجع صدى صوتهم

هو ما فيه مافيش حد غيرهم في الكهف بس هم بيعتقدوا إن فيه حد تاني في الكهف معاهم

ويتفاعلوا مع ظلالهم وبتكون قصة حياتهم وتاريخهم كله هي عبارة عن تفاعل مع هذه الظلال

وبيسأل أفلاطون في نهاية القصة: تخيلوا لو إن شخص أتى إلى هذا الكهف وعنوةً أو بالعنف خرَّج هؤلاء الناس إلى النور هيكون مصيرهم إيه؟ هيتصرفوا إزاي؟!!

قال الناس دي ممكن جداً يعميها النور لأنها مش متعودة تعيش في النور

قال ممكن جداً الناس دي تقتل الراجل اللي حاول يخرَّجهم بره الكهف إنه يكونوا عنيفين (جمع عنيف)

في شمال أوروبا الدول الإسكندانافية Scandinavian بيحطوا لمؤاخذة البقر في الشتا بالأربع والخمس شهور في غرفات مظلمة إصطبلات للحيوانات علشان الجو برد عليهم

وبعد ما يدوب التلج وبعد ما ييجي الربيع بيبتدوا يطلعوهم بره الإصطبل المظلم ده

ف رؤية الحيوانات دي للنور في البدايات بتسبب عنف وبتسبب حوداث وبيهيج البقر وبيمشي وووو وإلى أخره

طبعاً هم فطنوا لهذا لهذه المشكلة ف بيبقى فيه راعي هو اللي بيحاول يهديهم هو اللي بيعرفوا على صوته هم عارفين صوته بيهدِّيهم بيرشدهم يعني لحد ما يبتدوا يتأقلموا على النور مرة تانية

إحنا عندنا في الإسلام مافيش الراعي ده مش موجود

إنت عندك رعاة كل واحد فيهم صوته مختلف وكل واحد فيهم صوته جهوري

إنت مش عارف إيه حرام مش عارف إيه فتنة قتل مش عارف إيه الكفار فـ يشتت جموع البقر اللي خارجة من الكهوف اللي خارجة من الغرف المظلمة

العزلة بتخلي الإنسان خايف ومتوجس، ماهو إنت مانتاش شايف بصورة كافية مافيش ضوء يسمحلك إنك تشوف محيطك

مافيش قنوات إتصال ولا لغة مشتركة بينك وبين العالم الخارجي فتبتدي تتخيل العالم الخارجي إنه دايماً عدواني

إنه دايماً مستقصدك إن فيه مؤامرة غربية صهيونية علمانية إلحادية مسيحية يهودية

كل الكون بيقوم من النوم الصبح يغسل وشه ويقول تعالى نعمل حاجة نضايق بيها المسلمين

مهمين جداً مهمين جداً المسلمين لازم إن إحنا نضايقهم لازم إن إحنا نتآمر عليهم

ليه بقى ؟ بينافسونا في الصناعة بينافسونا في الجيوش بينافسونا في التكنولوجيا في العلوم، أبداً !!

بس هو دي طبيعة الشخص التافه الشخص الضعيف المغلوب على أمره اللي مش عايز يعترف بضعفه

فـ يستعيض عن الضعف بنرجسية غير مبررة بنفخ الذات ولعن الآخرين

شيطنة (من شيطان) وتمجيد الذات إحنا اللي دهنا الهوا دوكوا إحنا اللي عملنا الحضارة

أوروبا الحضارة بتاعتها قائمة على التراث الإسلامي والعربي ومش عارف إيه

مشكلة بتواجه أي مجموعة من البشر بتعزل نفسها عن التاريخ

فتبتدي تقرا التاريخ بشكل سلبي، لا ترى في تاريخها هي إلا كل نقاط النور ولا ترى في تاريخ الأخرين إلا كل نقاط الشر

يبقى أنا المسلم يبقى النبي محمد اللي جه رحمة للعالمين

رحمهم إزاي العالمين دول، ماتعرفش، هو كده!! مادام القرآن راح قال رحمةً للعالمين يبقى هو رحمةً للعالمين

الآخر الآخر ده دايماً شيطان على طول الخط

سواء كان من مشركين شيطان، سواء كانوا يهود المدينة شياطين

سواء كان الغرب: يبقى صليبي إستعماري دموي إنتهازي مستبد

حروب صليبية إحتلال إستعمار هو ده الآخر

يعني مافيش بصيص نور حتى يا اخي، لأ مافيش

طيب بيقروا التاريخ عندنا بشكل غريب جداً

إن هو يقولك إحنا العرب المسلمين أضاءنا البشرية وجينا بدين رحمة للعالمين

وعلمنا الناس العلوم والكيميا والفيزيا وتقريباً الكمبيوتر إحنا اللي إخترعناه بس ماكناش واخدين بالنا أو العالم نسي!

وبعدين فجأةً جم الصليبين وراحوا مكسرين بلادنا ودمرونا وبعد الصليبين جه الإستعمار الحديث إحتل بلادنا وقسمها وعمل سايكوسبيكوا Sykes Picot Agreement  **

وبعدين راحوا زارعين إسرائيل الدول العربية، فـ يا عيني إحنا غلابة وماعرفناش نحل الأزمة دي كلها

هو التاريخ بيتقري بالسهولة دي بالـ  يعني كأنه خط كده مافيهوش ثغرات

طب هاجي معاكوا واحدة واحدة كده، إحنا بنقول إن الأخرون هم اللي دمرولنا كل حاجة، هاوريك فجوة صغيرة جداً في التاريخ بتاعنا

إمتى كانت أخر حملة صليبية؟    في القرن الـ 13 ، صح؟!

 إمتى جه أول حملة إستعمارية على الدول العربية والإسلامية؟

نابليون 1798، عندك 507 سنة الغرب ماقربش ناحيتك، ماجالكش بلادك من القرن الـ13 نهاية القرن الـ 13 لحد نهاية القرن الـ 18

ولا قرب ليك 507 سنة، عملت فيهم إيه إنت؟!!

عملت فيهم إيه ؟! إيه الللي حصل في الفترة دي؟

ماحدش من الغرب جه إستعمرك ولا حملة صليبية قربت منك، طورت في نفسك إنت الفترة دي؟! لأ!!

كنت إنت بتحاول تستعمر الآخر كانت الدولة العثمانية هي اللي بيحاو في الفترة دي إفتتحوا القسطنطينية ووصلوا لحد بوابات فيينَّا

بس إحنا لما نروح ندبح العالم ونستعبدهم وناخد بناتهم سبايا، ده فتوحات!!

هم مش ضحايانا كده، لأ. ده إحنا كنا رايحيين ننورهم

العكس لما يا أخي الحملة الفرنسية جت على مصر ماجابوش معاهم ماكنة طباعة

ماجابوش معاهم إسلوب تعليم وإسلوب قضاء جديد، كان ممكن تستفيد منه،

الدول المستعمرة كلها في العالم مش إستفادت من الإستعمار وحاولت تطور وتعمل نظم

لأ، الإستعمار كله إبن 60 كلب، وإحنا طيبون وصالحون طول الوقت ومابنعملش اخطاء، الأخرون دائماً هم المذنبون

الأخرون دائماً هم اللي عايزين يقضوا علينا، والأخرون دايماً هم عدو خارجي وعدو داخلي

الغرب لازم يكون ليه دعائم داخل المجتمع

يبقى داخل المجتمع المصري لازم أكيد الأقباط شغالين مع الغرب

أكيد العلمانيين شغالين مع الغرب، أكيد اللي ضد النظام شغالين مع الغرب

كلهم كلهم تحت بطانية واحدة وقاعدين يقولوا إيه إحنا إزاي ندمر الإسلام – الإسلام الجميل اللي مالي البشرية نور وورود وزهور – إزاي ندمره ؟!

كنت ساكن في مدينة ميونخ لفترة طويلة، في مدينة ميونخ فيه جبل جبل جميل يعني نجيلة وأشجار

والجبل ده كنا بنطلع عليه نرمي نظره على مدينة ميونخ يعني نشوفها من فوق

وكنت بأحب أروح أتمشَّى هناك أعمل jogging رياضة وعملوا حواليه Park حلو مع بحيرة صناعية جميلة في القرية الأولومبية

اللي إتعملت فيها الألعاب الأولولمبية في ميونخ سنة 1972 القرية اللي كانت ألمانيا بتحتفل بألمانيا الجديدة وجم إرهابيين فجروا القرية عشان خاطر فريق إسرائيل كان بيلعب هناك

وبوظوا فرحة ألمانيا وفرحة ميونخ بالألعاب الأولومبية، بس دي حاجة على جمب كده

إيه حكاية الجبل الأوليمبي الجميل اللي هناك ده ؟

إكتشفت وأنا بأقرا تاريخ المكان لأني كنت ساكن قريب منه إن الجبل ده مصنوع من حطام الحرب العالمية التانية

الحلفاء دكُّوا ميونخ دكاً ماخلوش بيت فيها قايم على حيله زي ما عملوا في مدن ألمانية تانية زي دريستن وهامبوج ومدن تانية في شرق ألمانيا

ف أنقاض الحرب كانت مالية ميونخ فـ عايزين هم إنهم يتخلصوا من هذا الركام، فيعملوا إيه؟

فجمعوا كل أنقاض الحرب وعملوا منها جبل ورشوا عليه مية وجابوا عليه طين وزرعوه وعملوا منه جبل جميل

ليه؟؟  ما هو كان ممكن يقعدوا على الأنقاض والاطلال بتاعة مدنهم ويتباكوا

ويقولوا الحلفاء دمرونا دول كسروا ألمانيا مرتين مرة في الحرب العالمية الأولى ومرة في الحرب العالمية التانية

فرنسا هي السبب، إنجلترا هي السبب والأمريكان إيه اللي جابهم من أمريكا الشمالية يحاربوا مع الفرنساويين والإنجليز؟

 كان ممكن يجعلوا الأخرين هم السبب في أزمتهم

لكن الألمان تعلموا الدرس وقالوا إن لازم إحنا نعترف بأخطاءنا الأول قبل ما نلوم الاخرين

أكيد إحنا اللي عملنا الخطأ الأكبر في الحرب العالمية الأولى والتانية

مش بس ككده ده هم قرروا ي اااا   قرروا إن هم يعملوا تعاون مع أعداءهم السابقين

قرروا إن هم يتعاونوا مع الأمريكان والفرنساويين والإنجليز عشان يعيدوا بناء إقتصاد بلدهم

اللي ساعدهم في ده إنهم غيروا كتب التاريخ، أول حاجة عملوها قالوا لازم نغير كتب التاريخ

كتب التاريخ اللي كانت تمجد ألمانيا وتحقر من العاالم لازم تتنسف

لازم نرى العالم كقرية صغيرة كلنا فيها شركاء ومافيش حد حاجة إسمها الشعب القاري ومافيش حاجة إسمها شعب يسمو فوق باقي الشعوب

كل الشعوب متساوية وكل الشعوب يجب أن تتعاون

فـ الجبل الأوليمبي بتاع ميونخ هو أكبر شهادة على قدرة الحضارة إنها تخلق من شئ قبيح شئ جميل

يعني اللي قرا تاريخ الحرب العالمية التانية هيعرف إن ألمانيا إتأذت كتير

إن الناس ماكانوش لاقيين ياكلوا وكانوا رابطين أحزمة على بطنهم من الجوع

ماكانش عندهم تدفئة والحرب إنتهت في عز البرد

البيوت متكسرة مافيش تدفئة مافيش وقود مافيش أكل مافيش شغل

لكن الناس مافضلتش بتدفي حالها بدور الضحية وإنما قالوا لازم نقف على رجلينا

ولازم نعيد البناء ولازم نخلق من هذا الشئ القبيح شئ جميل

أنا كل مرة أروح على ميونخ لازم أزور الجبل الأوليمبي ده وأقول هي دي الحضارة هي دي المدنية

ألمانيا كبلد ممكن يكون فيها مشاكل كتير جداً وعيوب كتير جداً أنا بانتقدها لما باكتب بالألماني، مش جنة الله على أرضه يعني

ولكن شعوب تعلمت من أخطاءها وماصممتش على الخطأ

لما الفاشية الألمانية دمرت البلد بعد ما خلصت الحرب ماجوش ناس قالوا النظرية صح بس التطبيق كان غلط

قالوا لأ قالوا الفكر العنصري خطأ على طول الخط

الفكر الذي يُحقِّر من الأخرين هو خطأ

وهو لب المرض مالهوش علاقة بالتطبيق الصح والتطبيق الخطأ

النظرية القائمة على أساس إنها بتستعلي فوق البشرية وتنظر إليها باحتقار نظرية خاطئة

فلذلك كل من يطبقها سيطبقها بعنف سيطبقها بـ طريقة خطأ

إحنا بقى بنتعامل مع التاريخ إزاي؟!!

بنواصل لثم الجراح، والصليبيين دخلوا المسجد الأقصى ودبَّحوا 70000 مسلم والدم كان لحد الركب

طب هو المسجد الأقصى أصلاً يساع 70000؟؟ أبداً

بس إحنا عايزين نضخم أهم حاجة خلي الأخر ده شيطان

وبعدين الإستعمار جه ومش عارف إيه ونهب ثرواتنا

طب بلاش ألمانيا، عشان ألمانيا دولة غربية والغرب ساعدها لحد ما قامت على رجليها تاني

هاديك مثال تاني خالص نختم بيه الحلقة

تايوان، تايوان دي بلد كانت مستعمرة من اليابان

اليابان دمرتها تماماً وإغتصبت نساءها

لكن عملوا حسنة وحيدة جداً بنوا جامعة تايوان سنة 1928 وهي الوحيدة اللي كانت قائمة بذاتها لما اليابانيين سابوا تايوان

إيه اللي حصل بعد ما اليابانيين مشيوا التايوانيين مافضلوش يتباكوا ويقولوا اليابان دمرتنا

لأ بنوا البلد وإستخدموا الجامعة دي كـ إرتكازة العلم التنوير

وإبتدوا يتعاونوا مع اليابان اللي هي كانت عدوتهم

وإبتدوا يتعاونوا مع الصين اللي هي بتحاربهم حتى وعايزة تاخد الجزيرة تاني

فالقصة مش قصة التانيين عملوا فينا إيه؟ أو التاريخ جار علينا إمتى؟

القصة هي إحنا عملنا في نفسنا إيه وعملنا (إتعلمنا) إيه من التاريخ وعملنا إيه في التاريخ ؟؟

التانيين خلقوا شئ جميل من شئ قبيح وإحنا في مجتمعاتنا بنحاول نشوه كل شئ جميل نشوه كل شئ مبدع

نشوه الشباب اللي عنده إبداع وعنده قدرة على التغيير

نراكم في الحلقة القادمة

تابعونا على قناة اليوتيوب Hamed.tv

وعلى صفحتنا على الفيسبوك BoxOfIslam


Download text file

Box of Islam 043

You may also like

مين اللي سرق مصر، االحلقة الحادية عشر ، أولاد حارتنا
مين اللي سرق مصر مين اللي سرق مصر مين اللي سرق مصر مين اللي سرق مصر [...]
9 views
مين اللي سرق مصر، الحلقة العاشرة ، مصر السلطة بلدي
مين اللي سرق مصر مين اللي سرق مصر مين اللي سرق مصر مين اللي سرق مصر [...]
6 views
مين اللي سرق مصر، الحلقة التاسعة، الفن في مصر
مين اللي سرق مصر مين اللي سرق مصر مين اللي سرق مصر مين اللي سرق مصر [...]
11 views
مين اللي سرق مصر، الحلقة الثامنه، المصري الحرفي والمصري بلطجي
مين اللي سرق مصر مين اللي سرق مصر مين اللي سرق مصر  مين اللي سرق مصر [...]
2 views
مين اللي سرق مصر، الحلقة السابعة، كنيسة خاتم المرسلين
مين اللي سرق مصر مين اللي سرق مصر مين اللي سرق مصر مين اللي سرق مصر [...]
4 views
مين اللي سرق مصر، الحلقة السادسة، المرأة المصرية
مين اللي سرق مصر مين اللي سرق مصر مين اللي سرق مصر مين اللي سرق مصر [...]
2 views
مين اللي سرق مصر، الحلقة الخامسة ، مصر السماحة و مصر البجاحة
مين اللي سرق مصر مين اللي سرق مصر مين اللي سرق مصر مين اللي سرق مصر [...]
3 views
مين اللي سرق مصر، الحلقة الرابعة، ، دول الفراعنة الكفرة
مين اللي سرق مصر مين اللي سرق مصر مين اللي سرق مصر مين اللي سرق مصر [...]
6 views
مين اللي سرق مصر ، الحلقة الثالثة ، المواطنة والانتماء في مصر
مين الي سرق مصر مين الي سرق مصر مين الي سرق مصر مين الي سرق مصر مين [...]
8 views
مين اللي سرق مصر ، الحلقة الاولى ، مين إللي سرق مصر؟
مين اللي سرق مصر مين اللي سرق مصر مين اللي سرق مصر مين اللي سرق مصر [...]
22 views

Page 2 of 14

اترك تعليقاً